一輛KFC外賣電單車從樹林另一個方向駛至剛才射燈照住既位置。
「石壁!」我向三葉大喊。

而三葉亦馬上明白我既意圖,立即就再次施展Earth Strike。
我乘此空檔立即騎上電單車大叫:「上車!」

未等三葉有回應,我就踩盡油門,而電單車亦馬上加速。
我從倒後鏡見到三葉追係我後面,並未有要求我減速。

忽然三葉一躍,轉眼之間已站於電單車尾部放置外賣既箱上面。




「穩住!」三葉下令道。

之前我已經係白石鎮試過禁二一八五個零召喚電單車,既然係咁點解我頭先唔用黎走佬呢?
「盡量啦……我都無牌。」

我並無考電單車牌,上次係白石鎮貪好玩騎左上架電單車既下場就係撞埋堆稻草入面。

若果我當時撞到既唔係稻草,後果不堪設想,所以如非必要的話,我都唔想用依招。
附近既地勢已經由稀木林變成草原,所以唔怕會撞上任何障礙物。





至少三十秒之內唔會。
而依一刻,我無選擇,而且情況都適合。
三葉橫架法杖開始施法:「夠膽向後望我就殺左你。」

我從倒後鏡望到三葉既短裙除風搖擺,要偷睇裙睇?唔使擰轉頭既!
但係佢著住果條係+9既鐵壁短裙,我竟然乜都見唔到。

不過根據薜丁格的短裙定理,一日睇唔到都唔可以肯定佢有無著,你睇下,我又有意淫既空間!
「小姐頭先你提到唔用寶玉既情況下有七種解決既方法……咁若果你用寶玉呢?」





「秒殺?」

「咁你拿拿聲啦!」各位應該睇得出,其實怪物既目標係三葉,但係驚既係我。
「用寶玉的話,會吸引到龍。」

三葉頓一頓後續道:「附近有我唔想見到既龍。」
「劫?」我第一時間諗起當晚間接地救左我既龍。

「你見過佢?」三葉顯得意外,語氣亦都不似之前一樣咁有自信。
「已經係兩星期前既事,當時佢一擊就收熊侏首領皮,我到依家都仲記得……」

此時三葉躍起,並懸浮於半空之中。
半秒後一個巨型魔法陣出現於怪物腳下,魔法陣圖案非常複雜,不如三葉召喚魔杖用既亞視台徽型魔法陣般簡潔。
此時所有討厭魔法既熊侏竟然調頭就走,只有拳鼠繼續衝往三葉。





而迎接拳鼠既就只有一句英文。
「MICRO-NOVA」

地面上既魔法陣發出強光,半秒後於魔法陣正中央之上出現一團暗紅色既火炎,又再半秒之後,火炎往內收縮,然後爆炸並發出強光。
而魔法所造成既火舌並無擴散至魔法陣外面,相反於魔法陣裡面既一切,全部都被火炎所吞噬,等待火炎散去之後,所餘下既就只有被燒焦既屍體,原本長滿野草既地面都變成荒地一片。。
於草原上,仲生存緊既只有我同三葉。

三葉果然一招就清晒堆拳鼠,唔知三葉同劫隻揪會有咩結果呢。
「所以劫就打傷左熊侏首領?」三葉問。

「係。」我將黎到嶽砶之後第一晚所發生既事簡略地講左一次。
與此同時我檢查拳鼠既屍體,睇下有無可以用既道具。

至於點解我唔將拳鼠肢解當食物用呢?
並唔係我怕燒焦既屍體獵奇,你諗下,乳豬都只係燒焦左既屍體,我地都一樣食得津津有味!當三葉係洞悉我既意圖之後就勸我唔好,聽佢講強大既魔法會遺留唔少能量,而一般人應該避免接觸殘餘既魔力,聽起上黎同幅射有啲相似。




「一切謎團已經解開。」三葉恍然大悟。

「矣?咩謎團?」

「拳鼠攻擊熊侏既原因。」
以我觀察,拳鼠單體戰鬥力比熊侏高出好多。係拳鼠一拳可以打暈熊侏既同時,熊侏要一輪功夫先可以擊退拳鼠。根據愛迪生寫既進化論,物競天撰適者生存,為左控制更多既領土同資源,拳鼠會攻擊熊侏搶地盤都好合理。
「倒不如話咁懸殊既戰力之下,熊侏仲保得住自己既地盤先係奇聞。」

「以此為基礎,你再推論下拳鼠今時今日方攻擊熊侏既原因?」
我係高登訓練多年,磨擦力已經變得強大無比。

「師父,明白了。」我回答。
「你再推測下跟住我會點行動?」三葉問。

「投降可唔可以輸一半?」但任我磨擦力再強,想推測三葉心裡面諗乜野都係無可能。
已有 0 人追稿