廢青於中世紀魔法世界的生存法則: 71, 當權者除左要有689吋厚既臉皮之外仲要……

雖然親王既名銜同領地無關，但係呢個王子自成年之後大多數時間都居於白石，並積極參與鎮內事務。
我地住緊果間屋就係白石親王舊邸，而審問室中間一直空左既果張凳，本來都應該係白石親王既位置。
一日朝早，愛德華策騎外出，然後就再無返過黎。
自此，大公之位既繼承人可謂毫無懸念，非聖廷堡親王莫屬；由於失蹤事件之中，佐治係最大既獲益者，好多人都懷疑愛德華既失蹤係由佐治所造成。
點都好，雖然愛德華失蹤，但係佐治本身都係一名非常優秀既王子，照計都無乜大損失丫，仲免去左二揀一既煩惱。
問題出現了　－　佐治並唔係方舟教既支持者。

甚至可以話，佐治係方舟教既敵人。呢個亦都係好多民眾唔想佢繼任既原因。
佢提倡皇室從教會收回立法權，而且國策將由皇室作主導。





比你係方舟教，你一定唔高興，但係在生既王子就得返佐治一個……

就係呢個時侯，巴克撒大公老來得子，康瓦爾親王亨利誕生。
驟眼睇亨利既出生對佐治繼任並無太大影響，講輩份、講能力、講權力都係佐治嬴幾條街。

但實際上亨利既存在可以話係為教會留左一手。
巴克撒大公既兄弟全部都係短命種，仔都未生就全部死晒；換而言之巴克撒一脈就只餘下現任大公呢一支。若果亨利無出世的話，佐治就係大公之位唯一合法繼任人。
到時無論佐治做啲乜都好，教會都難以還拖，除非教會有令巴克撒皇朝覆滅既決心。

一旦巴克撒皇朝滅亡，自七百年前起一直歸順既各地既諸侯一定會衝出黎爭呢個皇位，就算方舟教幾大袋都好，大公國一定會陷入內戰。




而且就算爭完，繼任果個都未必聽話，好可能仲會順勢削弱甚至剷除呢個咁麻煩既教會。

除此之外，大公國既西北方仲有所羅門國虎視眈眈，大公國陷入內戰同邀請所羅門國入侵可以話無分別。
綜合上述各點，滅巴克撒皇家對教會黎講教會黎講可以話係下下之策，到時佐治只要唔踩到教會底線，教會都只可以默默忍受，個情況甚至係佐治可以用自殺黎威脅教會奉上立法權。
亨利既出世可以話避免左呢個咁麻煩既情況，至少係現任大公有生之年教會都唔需要擔心。

但問題又出現　－　現任大公快將昇天。
聖廷堡親王繼任後第一樣會做既野係乜野？

從邏輯上考慮，殺死亨利可以話係最佳選項。




若果可以阻止佐治的話，呢個對教會可以話係明正言順踢佢落馬既好把柄，但真係要同如此優秀既佐治進行對賭？教會唔想冒呢個險。
於事教會就向左另一個方向思考　－　尋回白石親王。

長達三頁既TL: DR解說到此為止，當老野停止既時侯已經係中午。

但係對話完全無完結既跡象。
「以教會立場，白石親王回歸的話的確係解決到唔少問題。」

「一黎繼承權會從佐治手中流走，二黎同樣優秀及有人望既愛德華亦都不如亨利親王一樣容易被剷除……」我亦都將自己既諗法講出。

「估唔到你有認真聽喎。」三葉投以驚訝既眼神。

「你好過份。」而我表示非常不爽。
「似乎兩位也充分明白是次任務的意義。」





「由救人既層面一下子就躍升到救國既層面，相信今次任務既酬勞將會非常豐富？」

「無錯。」長老點頭。

「但點解係我地？」我問：「雖然我地岩岩完成左一個幾高難度既任務，但係國運由關既重任交託予相識時間唔長既人？」

「咦，已經假設左自己有份參與任務，睇黎你既思想已經唔同左。」三葉道。

「屌！」係喎！中伏！
「今次任務充分反映兩位係難得既人才。」伯雷主教率先刷個鞋。

「唔敢當，人才得一位，我只係被牽連。」我立即糾正。

「更加重要既係由兩個外來人做呢種秘密任務，被佐治留意到既機會亦都較低；此外我地死左都唔會有人關心呢一點同樣重要。」





「你明白就最好。」主教亦都唔否認，雖然佢習慣講好說話，但係並未去到要用語氣偽術掩蓋衰野既地步。
「點解我唔將你地既任務講比佐治聽從而獲利？」三葉反問。

「你不會。」長老堅定回答：「你不會如此愚蠢。」
好蠢咩？驟眼聽起上黎報串拎著數又唔使搵親死，又唔使搵命搏，巴結權貴更加係我的最愛！
「因為當我講完比佐治聽，他日佢登上大公之位就鐵定會過橋抽板既意思？」

你一早心裡有數就咪問呢條問題出黎呃存在感啦！
「無錯。」

Sorry大家，我真係蠢撚過隻豬。
「呢個佐治既性格都幾惡劣。」我道。

「佢性格並唔係惡劣，佢只不過係擁有擔任當權者既覺悟同決心。」三葉真係好豁達。





伯雷點頭道：「我同意姑娘既睇法。」，旁邊既老野亦都默默地點頭。

「若果不是立場問題的話，他將會是位明君。」老野對下一章既終極boss有非常高既評價。
OK fine，三個杯我一個，我最撚膚淺眼光最短視囉。

「除此之外仲有另一個要確認既問題。」

「請問。」

「一個已經失蹤左十幾年既人，你憑乜認為佢仲在生？」

「係囉係囉。」香港失蹤七年都當死左啦，唔係邊有小甜甜爭產案你睇？
「呢個係來自任務委託人既資訊，至於佢從何得知我就唔清楚，亦都無法追問。」

「呵呵，竟然仲有個委託人？」我問。





「用腦諗下都知，唔通憑兩個係鄉下地方等死既老鬼夠膽做出呢種關乎國運既決定咩。」講完呢句之後三葉就好似醒起啲乜咁樣「呀」一聲，然後再講：「My apology, no offense.」

「唔緊要……唔緊要……」伯雷主教又堆砌出勉強既笑容回應，真係慘，比個靚妹串係等死既老鬼仲要扮無野，就好似睇住自己老婆比隔離屋個呀伯中出緊自己仲要係到劣尻打飛機一樣。
若果唔係眼前呢兩個老坑話事的話，可以話事既又係邊個？可以點兩位老坑做野既又係邊個？

老老豆豆，佐治仆街邊個最開心？從利益角度上考慮，教會似乎係最正確既方向。除此之外，佢地亦都有咁既能力。
再諗深一層，教會可以點伯雷做野好正路，但係老野又點解釋？

大家都應該知道白石鎮依家係由肯特長老同伯雷主教話事，但係詳細點樣分工又未必好清楚，所以請容我係到用些少篇幅解釋下。
全國各地分別有教會進行司法（立法由教會中央負責，地方只需司法），及皇家代表領導行政。
而係白石鎮入面，司法代表理所當然地係伯雷主教，當初我黎到白石鎮之後伯雷主教見我其實已經係審緊我。另一方面，行政工作本來係由白石親王負責，但係佢失蹤左，所以佢於正中央既坐位就一直留空左。
就算人唔係到，行政既工作都要照做，於事皇家就委任於鎮內德高望重既肯特長老代理行政事務，估唔到一代就代左十七年。
睇到呢到大家都應該好明白，伯雷係教會既人，肯特算係皇家既人；雖然於現任大公既統治之下，雙方依然緊密合作，但係一講到繼承人呢種咁敏感既話題，而且個繼承人仲會影響到教會皇家兩股大勢力既關係，眼前兩個理應擁有唔同立場既人竟然一齊brief我地。
當然，呢兩條老鬼自己friend底都係原因之一，並唔係全國所有地方教會及地方行政都可以關係咁好；有人既地方就有辦工室政治，大家明啦。
「消息來源可靠？」

「以兩位的智慧，你們應該意識到委託人是位大人物……非常大的人物。」

但係你意識唔到坐係你地對面既係創世古龍既女兒，你口中個大人物有無咁大先？順帶一提九爺仲係外面被伊曼姐姐糾纏緊。
「大致上我明白晒。」

「咁請問呢個任務，兩位接唔接？」

「我地知道左呢種國家機密，若果唔接任務就咁行出去的話……兩位應該會好麻煩？」

但即使係咁，佢兩個都選擇承受呢種風險。
呢個國家真係無人用到呢個地步？
「三葉小姐你可以理解就好。」

「我唔想掃你地興，但係我需要考慮一下。」

「請兩位於此處作出決定。」長老道。

「若果我地唔合作，只要我地一走出去班衛兵同魔法師就會圍攻我地，係咪咁樣既意思？」

「當權者之覺悟及決心之云云，我輩也不乏。」

「報酬方面可以商量，你地有要求即管提出。」
老野同伯雷一個當紅臉一個當白臉，好似非要氹我地落搭不可。呢種死纏爛打既Sales有一種莫名奇妙既親切感，我就好似返左香港一樣……個人黎講我非常尊敬呢種職業，因為佢地係少數會主動撩我講野既人。
你地應該唔會覺得連Sales都唔理我架可？唔會覺得問卷妹妹仔都當見我唔到架可？

可？

可？

可？
……………

本文共得0個回覆。
「我諗唔到。」三葉回答。

Well，我諗三葉就算有想要既野佢都可以靠自己能力拎到手，若果佢真係靠自己得唔到，呢兩個老坑都唔會滿足到佢。

「嘉穎你呢？」

「我要買GTR。」

所有人向我投以白眼，你地班鄉下佬無睇過頭文字D我唔怪你地。
「咳咳……」

呢一刻有咩我係好想好想要架呢……
「我想返香港。」係喎，佢地未必知香港係乜野黎，於事我補充：「即係我既世界。」