禮拜堂。
長老及伯雷主教一左一右咁夾住坐係中間既蘭卡特,而我同三葉就坐係後幾排既位置。

我地之間雖然有一小段距離,但係對話既內容我地聽得非常清楚。
其實佢地已經傾左一陣。

對話既內容非常簡單 - 蘭卡特辭職,佢想離開白石。
我起初以為佢係當眾比人羞辱完無地自容先想走,但係細聽之後先發現佢其實琴晚已經決定好;而頭先發先既事只係再推左一把。
長老同伯雷聽到之後完全無挽留,會唔會太Hurt?





雖然蘭卡特性格係幾難相處,但作為一個士兵統領係非常之盡責。
呢個情況就好似你幫老細打工,一直以黎自問出盡全力,就算份糧唔係好好都無怨言;到你開到聲話要走果陣個老細竟然留都唔留你,就好似否定左你一直以來既努力咁。
而蘭卡特既離職通知期只係得今日同聽日,聽晚就會舉行救回菲兒既慶祝會順便搞埋蘭卡特歡送會。
老老豆豆,對於救返菲兒係咪咁大件事值得全鎮上下一齊慶祝呢點我非常有保留;而蘭卡特既歡送活動,軍校人既人會真心歡笑蘭卡特,此外其他人就會笑住咁送蘭卡特走……
非常相似又相異既對比。
聽到半路既時侯,三葉就拉住我離開。

此時已經接近黃昏,今朝返到白石鎮之後幾乎無停過,而徹夜未眠既我呢刻好想訓教。
「真係唔舒服。」三葉氣忿道。





「咩唔舒服?」

「比兩個死老鬼利用左。」

「利用左?」

「無錯。」
此時我倆正好經過鐵馬橋,三葉隨手拾起一塊石頭然後往河用力一甩,飛出既石頭於水面上彈躍數次找沉入水中。
「佢兩個有心趕走蘭卡特。」





「矣?」

「而動機我唔清楚。」

「咁關我地乜事?」蘭卡特乞人憎所以先會比人趕走,而三葉先唔講,我咁人見人愛車見車載,點會有人想趕走我?我老豆老母都未趕我出門口啦!
三葉聽到之後就好用力咁擰轉頭望住我,氣勢之強連我都比佢嚇一嚇,唔小心必左兩滴尿出黎,陣間又要洗底褲。
「佢今日可以咁樣對蘭卡特,他朝都一樣可以咁樣對我地。」三葉繼續上路,此刻我地剛好離開鐵馬橋,走上山坡。

「會唔會係因為蘭卡特既貴族身份咋?你都知依家有單咁既野……」我既語調慢慢降低,我未蠢到周街講單咁既野既地步,根據老梗既動漫情節,呢個時侯亂講野一定會比人聽到。
「你既講法不無道理,但我直覺覺得事情並唔係咁複雜。」

「哦,直覺。」一聽到呢個字眼我就知可以準備轉話題:「陣間返到去你問菲兒咪知。」
而我一提到菲兒個名既時侯,三葉又忽然停低。

「做乜?」呢個女人有古怪。




「……………」

阿。
菲兒被滅門,都鐸要付一半責任。

另一半責任自然係落於三葉身上。
「我覺得你唔使太擔心。」我道。

「理由?」

「直覺。」

「好爛既理由。」
屌!頭先邊個大大聲將直覺當係理由架!





「將直覺當係理由係女性既專利。」三葉回答之後就繼續走上斜路。

「原來你都仲有係女性既自覺。」我獲得少女兇兇一瞪以作回應。
轉眼間已經回到親王邸,我推門入屋既時侯,三葉依靠住門邊既外牆說道:「你入去先。」

「………哦。」
都係既,我入去睇下情況先都好,話唔定菲兒同都鐸已經唔著衫攬埋一舊,陣間教壞三葉就唔好;我睇到就無乜所謂,仲可能會拍低Post上網些牙添,反正我既內心早已經爛無可爛。
脫鞋之後我立即望入玄關旁邊既客廳,見到佢兩個係到……

嘩,搞到黎客廳咁激??唔係……原來菲兒讀緊書比都鐸聽……
我既心情就好似上網搵片J到興恰恰既時侯開左條教育電視片黎睇一樣,非常失望。
「嘉穎!」菲兒見到我之後立即叫出我既名字,而一直閉目聽緊菲兒讀書既都鐸只係對我投以厭惡既眼神。
Sorry囉,做左電燈膽。但係你唔好恰我呀,我自殺架!
「你地做緊乜?」雖然情況一睇就睇得明,但係我都係問左個低質問題黎打開話匣子。





「如你所見,閱讀。」

「合埋眼都可以叫閱讀?」
「三葉呢?」都鐸無視我既質詢直接就轉左話題。

「係屋外面偷聽緊。我上去恰下先,兩位慢慢。」老老豆豆,呢兩條友一定準備放閃光彈,為免被誤炸我都係做返啲毒撚會做既野 - 遠離人群。
走上二樓既時侯,三葉已經坐左係自己房門外面。
「你咁快既?明明頭先仲係門口。」

「我係龍。」OK,我接受呢個解釋。
佢間房有露台,而個露台又係大屋既正面,以佢既身體能力跳上露台其實唔難;再唔係簡單啲用Teleport又得。
我先唔問點解佢有高床軟枕唔坐坐呢到,因為我覺得只要我開口一問我又無得訓。

「如果你唔介意既,可唔可以等我恰陣先。」
「嘉穎。」





「又點?」我半個人都已經行左入房,佢都要阻住我。

「陪我一陣。」

「可唔可以等我訓醒先?」然後我將房門關上。
* * * *
訓到爽歪歪,此時外面個天已經黑晒,係時侯落M記買個Double足三兩(tm)餐食下。

唔係喎,呢到撚有M記咩?
今次大獲,有咩可以食呢?
我打開房門,發現三葉就挨住牆壁坐係我門口旁邊。

「唉……」我嘆一嘆氣,然後續道:「你想傾乜?」
「你想呢?」

你係到等左我幾個鐘話想傾計,依家你問返我想傾乜??
「咁不如醫左肚先。」

講食,呢到並無啖好食,但係呢個時間乜野鋪頭都關晒門,仲可以食乜?
雖然係咁,我同三葉都係出左門口,而經過客廳既時侯,果對癡男怨女竟然仲係到一個讀書一個聽書,媽,好撚閃呀!你兩個唔餓架咩?
唔係喎,聽講有情飲水飽……屌,唔小心又自虐左下添!
黎到門口既時侯,我問:「小姐想去邊呀?」

「Anywhere but here.」忽然彈句龍語出黎,有型啲咩?
我又嘆一口氣,然後拎出手機輸入Call車熱線21800000。

電單車於視線之外既地方駛近並停係我面前,驟眼睇完全無傷痕,好似新既一樣,我幾驚琴晚炒車之後會用唔返呢招……
騎上車之後,三葉亦都坐係外賣箱上面既位置,我講左一句毫無意義既「捉實」之後就踩油直行。

深夜既白石鬼影都無隻,我就係咁一直行到東門外面。
呢個時間仲有既野食既地方我只諗到一個。

沿住東方大商路走左一段時間開始見到稻海,於事我就此轉入稻田中既道路,長軀直進入森林深處。
「嘉穎你最近係咪越黎越大膽?」一直沉默既三葉終於開口問。

「有咩?」睇黎佢已經意識到我打算去邊,我諗你都應該意識到。

「隨便你,佢發脾氣唔關我事。」

「有大家姐你照住我我先唔驚咋。」

「咩話?我聽唔到。」雖然嘴裡說不要,身體卻很誠實。依家我條命仔咁重要,佢一定唔會比森宿亂黎……佢唔怕佢呀哥發癲咩?
上次行入森林既時侯條路明明非常難行,但係今次啲樹根草蕞竟然自己退開,開左條路出黎,所以我完全唔知道方都可以前進。
不久之後,電單車已經駛達巨石及巨木處。

我落車之後禁CUT線,電單車就漸漸消失。
「保險起見你都係拎住先……」三葉將寶玉遞比我,由於我最近開始意識到呢舊野既重要性,我加倍小心地拎住。
但係都鐸用佢果粒紅晶又檔刀又打人臉……我有無必要咁重視呢?
「鈴、鈴、鈴」三葉搖晃土豪法杖,鈴聲響起。

亞祖微弱既月光竟然射穿樹冠,照於巨石之上,與此同時四周既樹木亦都被一陣強風拉扯。
「你仲要唔要命?」少女問。

「要!」我立即跪低,以免方丈又動武。
華麗既視覺效果過後,森宿已經伏於巨石之上。
已有 0 人追稿