我去左間 Cafe 打工 , 想溝入面個 Mk 妹女同事: 新 Look 登場！
我和阿翔與文靜牛奶妹在一間商場門外會合，
只見她們二人手裡都拿著幾個紙袋，想是剛剛在裡頭購物過來，
文靜看到我如此打扮時，先是一楞，然後隨即又哈哈大笑起來，
「你做咩搞到自己咁既樣啊？」文靜笑問，
一邊拿起我頭上的草帽，放到自己頭上去。
「我 …… 要改變下嘛 …… 」我說，「唔好睇咩 …… ？」
「無話唔好睇，好特別囉，」文靜仍是笑未停，身旁的牛奶妹看著也是好笑。
「阿翔幫我襯架，」我說，「我有佢，唔洗你幫我脫毒啦，」
我這麼一說，想文靜以後也不能用脫毒的事要脅。
「懶得理你，」文靜笑說，「拿，幫我地拎野啦，」
文靜說著把草帽帶回我頭上，然後把她和牛奶的紙袋都向我遞過來。
「我 …… 我拎 …… ？」我不是苦力啊。
「係啊，你係男人嘛，有氣有力梗係要拎野，」文靜笑說，「仲有啊，你咁瘦啊，
拎多D都大隻D啦，」
「咁 …… 」我想自己好好一個男人替她拿著購物袋，可太不像話了。
那知就在這個時候，阿翔突然踩了我一腳，
我感覺吃痛，向他望去，只見他不停打眼色要我替文靜拿紙袋，
「機會黎啦，快D表現下你幾細心啦，」他輕聲在我耳邊說。
「咁 …… 」我還是猶豫不決，他卻又在我腳上用力踩了一下，「好啦好啦，
我拎就拎啦，拎黎啦，」說著便無可奈何的接過文靜和牛奶妹的紙袋。
「算你啦，」文靜笑得很甜蜜，「行啦，去食飯啦，就前面個間啦，」
我隨著她說的方向一看，不禁大吃一驚。
「唔 …… 唔係掛 …… 」我看這是間高級餐廳。
「係啊，難得我細佬肯同我食飯喎，」文靜說著很歡喜，
而阿翔卻走上了前頭，與牛奶妹並肩而行，留了我和文靜在後。
「唔係呢 …… 」我總覺得自己不能進內。
「得啦，無問題啦，都係一餐半餐食豪D姐，」文靜說，「行快D啦，」
「我 …… 我都想行快D啊，但係 …… 」
我看著自己手裡的紙袋，實在重得不像話。
「無鬼用架，拎少少野都無力，拎返黎啦，」文靜一臉鄙夷的看著我。
「唔關呢樣事啊，不過係我 …… 」我看著那家餐廳，實在不想前行入內。
「好啦好啦，姑寒鬼，我請你啦，好未？」文靜說，「當係多謝你 ……
多謝你 …… 唉，是但啦，總之就我請啦，」
「都唔係錢既問題啊 …… 」我說。
「好啦喎，你隻畜牲，對你好DD，你就得寸進尺啦喎，
你唔食就罷啦，你走啦，」文靜又鬧著小姐脾氣。
「唉，係 …… 」我看著那間餐廳裡頭，沒有半點燈火，
而我帶著一副墨鏡，實在甚麼也看不到，「係我睇唔到路啊 …… 」
「睇唔到路？」文靜初聽不解，但看看裡頭，隨即又會意，「傻仔，
好地地做咩帶住副野喎，除左佢咪得囉，」文靜說，想要伸手摘下我的墨鏡。
「唔得架唔得架，」我連忙用手隔擋，
可手腕上都掛著大大小小的紙袋，笨拙得很。
「點解唔除得啊又，又唔係有型過人，」文靜啐了一口。
「係阿翔幫我襯架，我除左既話，佢就要唔開心啦，」我答。
「咁 …… 」文靜頓了一頓，「雖然你個人傻下傻下，不過都算你有良心，」
她說罷微微一笑，我也不知她是真心稱讚我，還是又假意佔我便宜。
「佢話著衫最緊要有個主題，我除左副眼鏡，就無咁夏日Feel啦，」
我把阿翔的話複述一次。
「你又會信佢都有既，」文靜嬌笑道，「我唔理你啊，你盲下盲下咁入去啦，
一係除左副眼鏡先，入到去再帶啦，」
「其實你先係最無良心啊，」我說。
「咩啊？又關我事既，我係無良心啊，就理都唔理你，自己衝入去啦，」文靜說。
「咁你為人為到底丫，」我想要文靜幫忙。
「點啊？你要點啊？見你係為左我細佬，我勉為其難幫下你啦，」
文靜語氣裝得像是很為難，可我知道她心中是樂意的。
「係架啦，你話架，咁你做我支盲公竹啦，」我說。
「點做啊？」文靜聽著不解，隨即又說，「哦，明啦，拿，你而家直行先，
行到入去轉彎我再同你講啦，」
「唔係咁啊，」我又說。
「咁係點啊麻煩鬼，」文靜沒我好氣。
「拿，」我向她遞出一隻手來。
「哦，原來講到尾都係要我拎D袋，古惑啊你，以後唔理你啦，」
文靜說著前行了幾步。
「唔係啊唔係啊，我意思係叫你拖住我行啊，」
我忙道，怕她走遠以後，再叫她不住。
文靜聽著噗哧一笑，
「哦，原來你係再古惑D，我睇小左你添，」她笑說，
可還是回過頭來，拖起我的手，「行啦，小淫賊，」文靜說得很溫柔，
一邊拖著我走了幾步。
「咪住咪住，」我說，總覺得手裡有點不自在。
「又點啊，我放手架啦你咁麻煩，」文靜又催促。
「唔係啊，唔好啊，我 …… 係咁樣拖得唔係好舒服，所以 ……
可唔可以換過個位啊，」我說。
「係喎，唔記得你生得唔夠高添，咁樣舒服D未啊？」
文靜說著鬆開手來，與我十字相扣。
「嗯，舒服啦，行得啦，」我笑說，與她一起走入餐廳。