我去左間 Cafe 打工 , 想溝入面個 Mk 妹女同事: 好難揀，好難揀，文靜定小月好？！
「喂，我地呢度係女僕Café啊，好地地做咩搞隻比卡超黎啊？」文靜抗議。
「錯啦錯啦，墨守成規邊有進步？要Think Outside the Box啊，知唔知啊？
我地同行競爭咁大，真係靠幾個靚女就搶到生意咩，要開拓市場，明冇？」
Mark哥說著仍是一臉自信。
「整左隻比卡超入黎，咁呢度仲係唔係女僕Café啊？」文靜反應還是很大。
「我做生意洗你教咩？」Mark哥正色道，可隨即又哈哈大笑，「講下笑姐，
不過你呢個都係好問題，所以呢，我隻比卡超，」他又拿起另一隻大盒，
拿出比卡超的身子來，「我隻比卡超係著住女僕裝架！」Mark哥笑說。
我看著一驚，這樣也行嗎？
「拿，肥仔扮卡比獸，女人型扮喵喵怪，都係著住女僕裝既，
你地做既野好簡單姐，每日企係Café企到完場，影相收150一張，
你地抽返入面10%，清楚未？」
那三人只是點了點頭。
「係啦，仲有，我地要搞多D宣傳，每朝都無客點得架？
宣傳呢？宣傳平時邊個搞開架？」Mark哥又問。
「Facebook一路都係糖果整架啦，不過佢又唔見左人咁耐，
都唔知仲會唔會返黎，」文靜答，原來那個從未露面的女僕是負責宣傳的。
「好，文靜你負責幫我搵返糖果返黎，」Mark哥說，「不過係佢返黎之前，
其實我都早有預備，哈哈，」
Mark哥說著拿起一個小紙箱來，「除左上網宣傳，由今日起，
我地要落埋樓派傳單，細佬，你走唔甩架啦，」
Mark哥看著我，「你每日落去派到八、九點左右，再上黎洗碗啦，
不過你一個人係下面又唔得，一陣人地以為我地間Café係hehe點算，
咁啦，你搵多個女僕陪你落去派傳單啦，咪話我唔益你，比你揀啦，
你要邊個陪你派傳單啊？」
「我 …… 我揀 …… ？」我心裡一喜，
若選了小草陪我派傳單，我豈不就跟她朝夕相對了麼？
呵呵，機會來了。
我滿臉歡喜的向小草端了一眼，她似是會意，然後只聽她冷冷的道了一句，
「我唔落去架，下面咁熱，個妝都溶啦，」
我聽著心裡一個霹靂，卻又不敢要小草她為難，
我的大計註定是要泡湯了，可又選那個是好？
「快D啦，我都無耐性架，」Mark哥催促。
我看看除了小草以外，就只有Kay媽、文靜和小月三個，
我和Kay媽不算熟稔，實在不敢要她伴我做這苦差，
換句話說，可以選的其實也就只有小月和文靜，
唉，Jude說話還真是靈驗，我這麼快便要從她們之中二擇其一，
但又想文靜剛剛生了我的氣，還是算小月好了。
「小月啦，我揀小月，」我對Mark哥說。
Mark哥點了點頭，正要說話，卻被千大哥打斷了，
「喂，我地上黎就係要幫我二弟追小月啊，你比佢同人落去派傳單，
我第一個唔做啦！」千大哥說。
原來他們背後是有如此居心。
「得得得，稍安毋躁，細佬，除左小月你任揀啦，」Mark哥對我說。
這下可真是考倒我了，除了小月，也就只有文靜啊，
但不知文靜會否樂意，於是我又向她看了一眼，
只見她兇神惡煞的看著我，似乎也不想我選她，
唉，但除了文靜，我又可以選誰？
大不了被她在頭上敲上幾下就是了。
「咁 …… 咁 …… 咁 …… 文靜啦！」最終我鼓起勇氣說。
「我？」文靜滿臉不悅，
我看著她如此反應，心下不忍，正想要跟Mark哥說改選Kay媽，
Mark哥卻突然捉起文靜的手安慰，
「我既文靜Baby，我講左就係啦，你無理由當住咁多人落我面啊，
你都係落去陪佢派一個月姐嘛，最多加你10%人工啦，好未？」
說到錢，文靜那有不肯？
「無人貪你10個 % 喎，不過你既然講到，咁又好難拒絕既，」
錢真是文靜的致命傷，有錢的話就可以對文靜為所欲為。
「Bravo !」Mark哥呼了一聲，「你地派傳單用既野我都準備好啦，
拿，細佬，你扮小次郎，我特登整左套男僕裝，今次算係償左你既心願啦，
而文靜呢，就扮武藏，著返平時套女僕衫得啦，淨係帶個假髮同換一換個裝，」
「真既 …… 我有得扮男僕 …… ？」
我聽著興奮，想起初見工時的情景，今天真是一雪前恥了。
「下，要扮鬼扮馬架？唔做啦咁，」文靜可不像我般喜悅。
「得，最後一口價，15%，做，定唔做？」Mark哥繼續利誘。
「咁又唔係錢既問題 …… 」文靜撅撅嘴，「不過你既然講到，
唔接受你15%都即係唔比面你啦，」文靜還是接受了，「不過 ……
不過我係唔想扮個厚粉阿嬸姐，好肉酸啊 …… 」
「岩，無問題，包做到你滿意，」Mark哥笑說，
我也是滿心歡喜的期待他會有甚麼好點了，「拿，好簡單姐，咁調轉就係啦，
細佬你扮武藏，文靜扮小次郎，咁樣錯配先有睇頭啊，哈哈，」
「我 …… 我 …… 我 …… 我要扮女人 …… ？！」我聽著大驚。
「係啊，比你試下著女僕裝嘛，」Mark哥笑道。
「我 …… 我點可以著裙啊 …… ？我係男人黎喎 …… 」我反對。
「但係主人你上次係小月屋企訓覺都係著裙啦，」
小月突然搭嘴，說得場內眾人都靜了下來。