如果你既人生好似打機一樣……: 2.1, 共同敵人係令人團結既最有效方法
下一堂係睇肉堂，丫唔係，係體育堂先岩。
對我依d死毒撚黎講，想睇d囡囡著得少布既地方就只有兩個，thisav同埋體育堂。
設計依件體育衫果個一定係男人黎，因為我未見過有其他學校既體育衫係會少布成咁，你估依家睇緊動畫咩？
雖然平時男同女要分開活動，但係偶然都會有d混合活動，今日就係其中一次。
係更衣室入面，我一早已經換完衫，因此係到觀察呀方既怪異行為。
「點解好好地一隻襪，你要將中間摺到船襪咁先著？」
「你唔覺得短襪加普通既襪好小學雞好柒架咩？」佢一邊摺襪，一邊好理所當然咁答我。
我真係想問佢點解唔整番好個頭，搞掂塊臉上面既粒粒先咁講。
我一聲恥笑：「嘿，你醒少少啦呀方，無女會望你架。」我苦口婆心勸佢慳番d時間，比女望既機會只屬於水牛。
「笑什麼？你也是毒撚！」睇黎呀方仲未屈服。
我忽然覺得佢今晚會係M記磨爛蓆既機會極高！
我地學校會將兩班溝埋一齊上體育堂。
今日教體育既林蛇因為想我地輕鬆下，所以安排左場班際閃避球對抗賽。
我地C班對隔離D班。
雖然兩班關係唔差，但係一到左比賽既時侯，你既團結意識就會好重，將對手當成仇人一樣。
所以當你既圈子入面有一個被杯葛既對象果陣，剩低既人都會十分團結，不幸地呀方就係依個人。
當然啦，講左好耐既小班教學都仲未實行，我地一班三十幾四十人無可能全部落場玩，所以林蛇要求我地每班都揀八個人出黎。
我其實唔係好識玩閃避球，但我對閃避球既印像就係總之避得開就得啦！
因為時間同場地所限，所以我地玩既唔係完整版本既閃避球，而係閹割同加料版，有中學特色的閃避球。
對話框又黎料！
《任務：閃避球對抗賽》
條件：５Ｃ班勝出是次對抗賽。
條件無寫到明要我落場，所以我諗都係好似平時咁係場外食花生就得。
「5D 5D IS THE BEST!」隔離班已經成副戰鬥格咁。
「八大金剛，你地出戰啦！」5D班狗乸已經發晒姣咁尻嗌，其實依班狗乸就算唔出聲，果八個人都會自動波出現。
因為佢地八個入面，有三個係籃球校隊，兩個係足球校隊，剩低果D都係體育健將。
「呃……我搞比賽既原意係希望男同女都可以係考試之前輕鬆下，所以每班都要有四男四女係場上先得。」八大金剛聽完之後無乜反應，因為佢地覺得今次比賽都係坐定笠六，有反應既反而係班狗乸。
「揀我啦！」「我要去！」「唔制呀，我要落場同四大金剛玩！」班女一知道可以有機會落場同金剛過兩招就即刻濕晒，閃避球姐？唔係打真軍喎依家。
相反我地依面就冷靜好多，當你既敵人做出某樣行為既時侯，你會刻意做出相反既行為。
例如當你係地鐵上面見到有Ｄ蝗蟲做Ｄ好無公德心既事果陣，你就會忽然聖人上身，將自己帶黎既垃圾帶走，唔會留係車廂。
「Ａ屎，你鐵膽黎架啦。」雖然係咁，但係女同學們依然好下意識咁圍住係水牛附近。
「我都要參加。」依個人叫做鞏偉，係班上面都係一個運動同成績唔錯既人，但係人緣就無水牛咁好，一直都單方面當水牛係競爭對象。
《鞏偉
健康度Ａ、攻擊力Ｂ、防禦力Ｃ＋、智慧Ｂ、幸運度Ｅ、耐性Ｂ、靈活度Ｃ＋……
總體評價Ｂ，若需要詳細評價請繼續……」
但係上天就係咁唔公平，當鞏偉日日好認真想嬴水牛果陣，其實水牛只係HEA住咁去應對，一直以黎一舊屎都無比過佢。原來我到依家都仲未睇水牛既能力，但係我依然怕自己承受唔住刺激，所以放棄。
但係點都好，有個鞏偉參戰，我地班嬴既機會都大Ｄ。
「我睇女仔方面，都要我黎做代表架啦。」呀飯拍拍心口，自信十足。咁又係，呀飯都係女仔入面比較好動既人，佢既身材十分健美，就好似希臘神話入面既雅典娜一樣。
《范雪怡，
健康度Ｂ、攻擊力Ａ、防禦力Ｃ、智慧Ｂ、幸運度Ｂ、耐性Ｃ、靈活度Ｂ＋……
總體評價Ｂ，若需要詳細評價請繼續……》
嘩，呀飯攻擊力咁驚人既……丫係喎，佢全家都玩跆拳道，連自己本身都係黑帶。
「咁既然呀飯都玩，我都玩下啦。」依個女仔叫做Mandy，份人都真係man man地，同呀飯唔同，佢係先天性男仔頭……即係生理特徵上都好男仔。
「仲有無人玩呀？」呀飯問下後面班女，佢地個個都你推我讓，其實嘴裡說不要，身體卻很誠實；就算我唔係林保怡，從佢地既身體語言都睇得出佢地好想落場同水牛玩。
「桑妮，咁難得既機會你唔會錯過架啦？」諗番起頭先桑妮係後樓梯講過既野，如果佢真係咁嚮往朋輩生活，佢想玩都唔出奇。
「如果無人想玩我就玩啦。」桑妮一招扮豬食老虎就獲得一席，其他扮矜持既港女真係得個恨字。
「得番一個位咋喎。」呀飯再回望一眾女生，只要邊個恥力夠敢第一個開口，就有機會同水牛王子玩喇！
「我……我都想玩。」係朱純真！
朱純真係水牛既狂熱單戀者已經唔係秘密，佢寫過幾封情信比水牛，但水牛都無直接拒絕，非常之有男神收兵既風範！
WELL，佢既條件都十分之平凡，成績唔算好，個樣又唔係靚，運動又一般果隻，即係旺角跌個招牌落黎都責死幾個果種。佢咁既條件都想溝水牛，真係憑我徹底的勇氣，愛是最大權利。
《朱純真，
健康度Ｃ、攻擊力Ｃ、防禦力Ｄ、智慧Ｃ、幸運度Ｃ－、耐性Ａ、靈活度Ｃ……
總體評價Ｃ，若需要詳細評價請繼續……」
耐性Ａ都抵佢既，如果少Ｄ耐性都無可能單戀同一個人成三年。
女仔齊人，個波又交番黎男仔依一面。
「波仔，今日你咁勇，不如落場玩番鋪啦！」會咁講野既女仔，真係IP都唔洗CHECK就知係呀飯。
「我驚累輸你地咋喎。」講真我真係麻麻地想玩，任務完成左我會有能力加成，如果輸左唔止無，仲唔知會唔會有懲罰添。
「有機會你要珍惜呀。」桑妮語重心長咁對我講。
的確，以前我成日投訴自己無機會，依家機會黎左我無理由唔珍惜。
「怕乜野丫，有水牛CARRY你！」呀飯間唔中都會打下機，所以遊戲術語佢都會識小小；CARRY既意思就好似字眼一樣，帶埋你去嬴咁解。
「拿，你話架咋，輸左唔好賴我！」我食指指住呀飯，佢一手捉實我食指然後扭住，搞到我食指鬼咁死痛：「你試下輸丫，你就知味道！」
因此，我既參戰都已經決定左。
問題係剩低一個……
「既然水牛同波仔都玩，咁我都玩下啦！」
O,FUCK