如果你既人生好似打機一樣……: 2.8, 青春(偽)

 
嬴左！我地嬴左！
雖然依一場唔係乜野好重要既牙較戰，但係依一刻全班即刻跳起歡呼，好似係陸運會嬴左最佳班級獎咁。
 
我望向觀眾席，見到同班同學既笑容，雖然我毒到唔係所有人既名都記得，但係佢地既笑容係幾咁親切！
唔通依d就係所謂既青春？
 
青春對我黎講曾經係幾遙遠，以前我係螢幕前面睇住d動畫小說，覺得入面既人扮晒興奮，好戇尻、好唔真實，但依一刻我真真正正感受到！
 
一輪歡呼之後，對面班隻大猩猩都過黎同我握手。




 
「雖然係今場只前我剩係覺得你係一個廢人，但係打完場波之後我就知道，5C班除左Ace同鞏偉之外，仲有一個勁人。」聽到猩猩咁講，我唔理佢係奉承定係真心都聽得特別順耳。
 
好似我依種毒撚，真係配擁有依種生活？
 
番番入更衣室，我沖完涼之後依然回想住頭先發生既每一幕，我唔敢相信我自己可以做到咁既野。
「好波！」不斷有平時唔同我講野既男同學對我稱讚，雖然覺得佢地好見風轉舵，但我都禮貌式咁笑住回應。
 
雖然我係一個仆街，但係我係一個識人情世故既仆街，而另一方面。
 




「當時我出盡九牛二虎之力，忍住背脊既痛楚一撲，將果個中硬既波檔住，救左波仔所以我地先嬴到咋！」呀方條毒撚依家同其他人吹緊自己有幾勁幾勁，而其他人聽見都係笑完就算。
 
佢已經由一個出POST無人理既CD-ROM進化成為一個至少厄到膠同負皮既真心膠。
 
我將個斜孭袋一野車埋去呀方個頭到，佢哎呀一聲然後摸摸後腦。
「番屋企啦，仲係到戇尻尻咁。」「番咪番囉，洗乜打人喎……」
 
出到更衣室，已經見到一早換好衫既水牛同埋呀飯等緊我地，呀飯因為綁唔到佢條馬尾所以要水牛出手幫佢，態度甚為親暱。
 
其他人見到一定唔敢做電燈膽，但係知道來龍去脈既我就毫不避忌咁走埋去問。




「咦，桑妮呢？」
 
「佢要準時交人，所以走左先。喂，水牛你綁好啲啦！」
家教好嚴既桑妮，放學之後半個鐘之內就要番到屋企。
 
「依家去邊？」我問，其他人立即覺得好奇怪。
「廢話，梗係番屋企打機啦！」呀方即刻搭住我肩頭好興奮咁講。
 
「我都諗住番屋企。」水牛放低雙手。
 
原來無敵既水牛都有弱點，因為呀飯唔滿意水牛既手工，所以決定拆左條馬尾再綁過，露出一頭秀髮；因為呀飯同好多老師都好熟，其他訓導MISS見到都當睇唔到。
「咁我地走先喇。」我同呀方揮手。
「拜拜，波仔你記住呀！」呀飯用食指指住我，講既應該係今晚M記聚。
 
「水牛你真係好鬼無用，綁條馬尾都綁唔掂！」當我同呀方行去校門口果陣，隱約聽到呀飯對水牛既嬌罵聲。




 
「波仔呀，其實有樣野我想問好耐。」係我地行出校門口之後，呀方突然問我。
我無出聲屌尻佢，即係暗示我批準佢繼續問。
 
「水牛同呀飯其實乜野關係？我覺得佢地好曖昧。」
連終極毒撚，愛情經驗值係負數既呀方都咁問？
 
「總之，佢地唔係拍緊拖，亦都唔會拍拖。」
「哦，乜係咩。」呀方聽到我咁平淡而堅決既答案，唯有帶著一頭問號咁轉去其他話題。
 
而毒撚方講既話題都不外乎打機，係短短既路程之後，我已經黎到樓下，住遠小小既呀方就要繼續行，於事我地分開左。
 
開更呀伯去左巡樓，所以我暗自慶幸唔需要再見到今朝果種咁嘔心既event情節。
轉眼間，我已經番到黎屋企面前，受惠於道具bar，平時要企係門口前面成分鐘搵鎖匙既我好快就入到門口。
 




依家三點九，離今晚M記之約仲有三個零鐘。
換轉係平時既我，一定第一時間打開部電腦，但係依家我只係坐左係張梳化上面閉目養神。
 
 
我又再回想頭先既情節，對話框又再出現，發覺我原來漏左好多訊息。
例如我擊倒狗乸時獲得接緊係無EXP既EXP，擊倒金剛時獲得既巨額EXP，任務完成時既獎賞，同埋一系列既好感度變動。
 
我唔明白EXP同能力值增減既實際用途係乜，但打得機多既我好清楚總之依D野有好過無，所以亦都無叫出小智追問。
 
好感度變動方面，係走火警任務完成之後扣左既呀方好感度，係午餐果陣已經回升番，除此之外其他同學對我既好感度亦都上升左，尤其係呀飯同桑妮。
 
但係我留意到，水牛對我既好感度完全無變動過。