如果你既人生好似打機一樣……: 5.3, 所謂技安定律就係劇場版叮噹入面技安一定係個好人
係收到經驗值同確認雷達上既綠點變黑之後，我就帶著勝利者既步伐番左出黎。
我本身想轉右去番前樓梯，但係透過雷達發現下面有一粒綠點靜止不動，因為風險太高，於事我決定係中樓梯繼續落去。
中樓梯係完全密封，除左每一層既出口之外，你係唔可以去其他地方。
亦都因為咁，係到行既每一步，發出既回音都會非常之大。
我帶住桑妮行落左兩層黎到一樓，忽然間聽到樓上有開門既聲音，於事我同桑妮即刻跪低，哩埋係一樓落地下既果半節樓梯。
如果真係比人發現，我地就要係依個咁狹窄既環境短兵相接！
佢既腳步聲造成好大既回音，而且我仲感受到越黎越近。
但就算要係依到開戰，因為視野關係所以我地有先手之利！
只要趁先手一擊擊倒目標的話，都唔係無得打。
我吞一吞口水，剩待下一秒既來臨。
佢無開到門，即刻佢會轉落黎，我即時出腳撩陰，但係估唔到佢竟然反應得切檔住左！
無可能！佢點解會知我地係到架！？
「戇尻仔，想CAMP我？依到有防盜鏡架！」
我望望右上方，果然！
屌，點解我會咁撚戇尻，依一場硬仗避不了！
有玩AOC既人應該都知道，係地勢高作出攻擊會比較有利。
係本來就唔多夠秋既情況之下，我仲輸多樣野，但係係諗點打之前，都係查下能力先！
依條友比猩猩更加大隻，所以我稱呼佢做「大熊」。
《大熊，小頭目級角色
健康度Ｂ、攻擊力Ｃ、防禦力Ａ、智慧Ｃ、幸運度Ｂ、耐性Ｃ＋、靈活度Ｄ……
總體評價Ｂ－，若需要詳細評價請繼續……》
原來係一隻坦！
打ONLINE GAME多既人應該好清楚要點樣對付血牛……
我出掌用力推開大熊，同時氣力BAR出現，我一貫地使出高水準既掌擊！
但係大熊始終防禦力好高，我只係推開左佢小小，製造足夠既空隙比我同桑妮越過去。
然後我地調番轉頭跑向上面，而調整好狀態既大熊即刻追番上黎。
「桑妮，直上，唔洗理我！」雖然我咁講，但係我都一直同桑妮跑緊上樓上，就係三樓果到，我調整左態勢。
今次無防盜鏡喇！依樣野由一開始就唔應該係依條教師專用既樓梯存在！
當我雷達見到綠點將係我面前出現時，我即刻凌空飛踢左果去。
「拉打KICK！」其實我都剩係考試中間個周末睇左一集，但係我估唔到咁就比我學左依一招，而依家仲有機會用番出黎。
《Rider kick 格鬥系技能 攻擊力70 命中率85
普通的腿擊，但若果於高處使用的話有加成，自身的跳躍可被計算在內；
若果擊失的話會承受一定傷害。 》
打其他人就話唔敢用，踢依隻咁大份既大熊無得輸！
依一腳應該有啲料到，不負拉打之名。佢被我擊退，要後退幾步先將啲力完全瀉晒。
我踢完之後立即調頭繼續向上跑，同時一直留意住雷達有無危險。
我見到代表隊友既藍點已經係好上面，所以都放心繼續；睇黎我想拉開桑妮同大熊距離既心機無白費。
其實係依到遇到大熊都唔錯，一黎佢咁既體形，上落樓梯一定重辛苦過我；而且依到係密封晒，無咁易比人發現，咁就唔洗一打二。
「夠薑就企定定同我隻秋！」大熊開始憤怒，但係嬲還嬲，佢無變到金獅子或者薩亞人，依然係龜速移動緊。
但係再係咁落去都唔係辦法，條樓梯始終有盡頭，而盡頭之處就係桑妮所在。
所以我要速戰速決，但係打得機多既我好清楚，打坦既最佳方法就係拉打佢，如果某然同佢埋身肉搏，我一定仆硬街！
另一方面，樓梯亦都有唔好處。各位打機戰都會知道係狹窄既地型，你既移動力同埋閃避力都會下降。
係依一到，如果大熊一撲埋黎，我真係避都無得避。
仲有三層就到天台，我要係依三層之內KO佢。
拉打KICK係好好用，但係依家既佢一定有所防範。
我今次就係上一層，亦即係四樓到等佢，但係我今次係堂堂正正咁企在係佢面前。
「你唔走喇咩？準備比人執一剷啦！」
桑妮已經係中樓梯最上層，所以我都鬆左一口氣，跟住落黎就要技術性擊倒依條仆街。
「快啲過黎啦，爸爸買左薯條比你！」
我作出挑釁，睇隻大熊肥成咁都係因為食得老麥太多。
「鐘意食薯條唔係罪！」挑釁成功，佢毫無防範咁撲左過黎。
係機會喇！
「Rider kick！」唔好嫌我悶，我依家關注既只係效果，而rider kick既效果就非常之好！
比我挑釁左既大熊成隻牛咁衝埋黎，正中我下懷！而同一刻我再次出招，踢中佢既心口，佢向後跌左係三樓同四樓樓梯中間果個轉角位。
我即刻跳起，用力踩係佢個腹部，大熊發出一聲慘叫，但係雷達中代表佢既綠點依然未熄滅。
我跑番落去，係因為唔想將危險引去桑妮到。
今次大熊花左比較耐既時間先企得番起身，然後仲怒叫左一聲，響徹全個中樓梯，好彩依到係密封所以外面先聽唔到；但係聲音不斷係依到迴盪，聽起上黎非常之恐怖，唔知係最頂既桑妮會點諗？
打得多芒亨既我，好清楚佢既一舉一動都係透露左啲野，首先佢花得耐左先起到身，就代表佢已經瀕死。
佢中多招應該就會訓低，但係處於低地型既我唔可以用Rider kick。
唔通要出第二招？
我係三樓同二樓中間等佢，佢見到我既時侯已經乜都無講，一下就撲左埋黎，好似left 4 dead入面既Hunter咁，不過佢係加大碼既版本。
中左依招點都死，所以我即刻避開，佢著地之後好快就企番起身，舉起雙手準備繼續攻擊。
我趁佢舉高雙手，即將乘機撲向佢既下盤，雙手攬住佢對舉，大力一扯。
「雙手割！」
《雙手割 格鬥系招式 攻擊力６０ 命中率１００
必需於近距離使用，對對方下盤作出攻擊使對方失去平衡。對方重量越高，傷害越大。》
前排無記重播撻出愛火花，我見到霆鋒將張燊悅撻得咁爽，然後仲溝埋佢，係張蓆上面kiss然後等ending播完之後做左一堆唔出得街既行為。由於我都想搵個張燊悅黎撻下（更加重要既係之後會發生既事），所以就學埋依一招。
估唔到張燊悅就撻唔到，技安就比我撻左隻，但係點都好，收到exp同埋雷達都顯示出大熊已經比我跌到暈左再無威脅，係時侯上番去同桑妮會合。