如果你既人生好似打機一樣……: 7.3, 作為廢青，被朋友既呀哥威嚇如何不失霸氣？
黎到門口，我吞一吞口水。
雖然呀飯都係住屋邨，但唔知佢屋企會係點架呢？
唔知今晚有無雞脾食呢？定係會比人極速送客？
打開道門之後，我無見到終南山既景色，亦都無十八銅人陣係入面，只係普普通通既一個家。
不過都係強烈感受到成間屋好有中國特色，不愧係練武世家。
牆上面掛左佢地家旋成員練武時既英姿，首先有一副女俠同另一個中年男少一齊耍拳既合照，估計係呀飯老豆。
然後隔離分別有三幅差唔多樣既少年耍拳照，一個玩太極，一個玩柔道，仲有個玩空手道。
估計都係呀飯既三個呀哥。
而最右手面，有幅相係一個好細既男孩係到扎馬。
我望住幅相，而呀飯留意到之後即刻將幅相拆左落黎。
「唔準睇！」
原來個「男孩」係呀飯黎？
我即刻洩笑兩聲，將幅相放入房之後行番出黎既呀飯即刻撓起雙手做個好嬲既樣。
「點解你呀哥全部都係咁型既相，但係得你一個係張……哈哈……」
「你係唔係有意見？」
「唔好講咁多，快啲入黎幫手。」
「哦～」呀飯回應女俠，入廚房之前雙手舉起型成爪狀何我恐嚇一下。
然後我都跟左呀飯入廚房。
「有咩我可以幫手？」
「幫我切左野先，我已經洗左。」女俠指住放左係一邊既蔥呀，菜呀之類既野。
「無問題。」我回應。
呀飯遞左把刀比我：「咁我就負責監視你啦，你做得差的話就唔準你食。」
「嘩，咁你責任真係好重大喎！」
當我舉起刀準備切第一刀果陣，個腦忽然……！
遊戲畫面係毫無預警既情況之下出現，而出現既遊戲係……
煮你老母！？
Cooking Mama係一隻Nds既遊戲，之後好似連唉瘋都有。
主要係利用touch screen黎模擬煮飯既情序，即經何時你求其上一架小巴都實有一兩個港女拎住部nds黎玩依隻game。
佢地好多都係煮飯九流，但係玩煮你老母可以變成高手。
點解寧願花心機玩假既煮飯都唔學真既煮飯？
眼前棵橫放住既蔥上面，有一條虛線，代表我要係果到落刀。
就算我好隨意咁尻切，無跟住條虛線，切落去果陣都係好直咁一間間。
咁唔真實既！唔怪得啲女咁鐘意玩！
係我一輪尻斬之後，得出黎既係切得非常整齊既蔥。
「估唔到你刀工幾好喎，比一百分你。」
呀飯同煮你老母一樣，比左個評價，係爭在無雙眼發光咁望住我。
跟住落黎既一輪工作都超唔真實，but who cares？依一刻我覺得自己變左廚神。
「又話平時唔煮野？煮起上黎都唔差喎。」呀飯點頭道。
「一般啦。」我說畢之後用手背抹抹對上既汗。
「跟住落黎交比我，你兩個出去先行休息。」
之後我就係客廳張梳化到正襟危坐，換轉係我自己屋企我已經打橫咁臥在係梳化上面，但係由於依到係個無比陌生既環境，所以我都係扮下乖仔好啲。
打開電視，播緊蔥蔥衝地球。
「白日夢內象是全無管制，多美麗教人聯想精靈雙眼看東西……」
我唔會特登睇，但由於各種原因，我竟然識得唱晒全首歌。
平時唔聽廣東歌既我，去到唱K果陣我諗得依首我係唱到。
但係唱依首應該會仲柒過唱滾，考慮到以上情況所以一直以黎對唱K我都係避之則吉。
「哈哈哈哈……」本身番左房既呀飯出左黎，拎住部新活態度係到笑。
個鐘頭仲要向住我。
「等我放上facebook forward開去先！」
我即刻雙腳跪低，然後五體投地狀咁同佢講：「女俠，求你放過我。」
「嘿嘿，你用乜野黎贖番條片先？」
「我甘願做牛做馬！」我開玩笑道。
「都係唔好，你咁無用，等我即刻post上網先！聽日你紅左一定要多謝我！」呀飯即刻跑番入房，而我跟隨。
「咪走！」
「彭。」呀飯已經關埋門，而我亦都係到不斷拍門。
「開門呀，求你放過我啦。」
入面無回應，於事我一路拍門。
我一路拍門發出巨響，連係廚房煮緊野既女俠都探頭出黎睇下乜事。
「等我upload完就開。」房入面既呀飯回應。
唔好呀，我形象已經夠差，放埋段片上網我真係可以轉定校都得。
係我不斷拍門之後終於開門了。
隔離道門。
入面走出一個上半身赤裸，而且有紋身既青年，用朦朧但係兇狠既眼神望住我。
「你邊個？」
「呃……你好。」我即刻扮死狗，睇黎頭先既拍門嘈醒左佢。
《攻擊力下降》
寵物小精靈有一種特性係叫做威嚇，當隻怪一出場果陣對手就會減攻，依家我就係依種情況。
佢間房非常之暗，再加埋佢種種有霸氣既外表，真係細膽小小見到都會淆底。
「范雪怡。」佢用一個好唔耐煩既語氣，大力扣門，然後番自己房。
然後就係霸氣男房門關左之後，呀飯就乖乖開門。
依一刻既我仲比霸氣震懾住，已經唔記得左比人影低左果單野。
我低聲問：「你呀哥？」
呀飯帶住空洞既眼神點點頭。
女俠此時由廚房行出黎問呀飯：「呀國醒左？」
呀飯無答到佢。
然後女俠黎到呀國間房前面問：「你今晚係唔係屋企食飯？」
「遲啲答你。」佢既聲音非常之沉厚。
本來既輕鬆氣氛已經破壞左，我番左去廳到睇寵物小精靈，呀飯無出到黎。