如果你既人生好似打機一樣……: 8.6, 玩群體遊戲或者Board Game既時侯，第一個被圍死既人請自我檢討
「雪妖請開眼，並指定要鎖定既目標………請你合埋眼。」雪妖揀得非常之快。
「然後到魔法師打開眼。」
我將開雙眼，全場所有人閉目低頭，完全無漏出任何蜘絲馬跡。
「用唔用能力？」我搖頭，用能力既機會得一次，咁早用實在太浪費。
「明白，請你合埋眼。」我一直張開眼，直到確定軒仔唔會比任何人係打開眼既情況下落指令，我先合埋眼。
「警長請開眼……指定想要調查既目標。」
補充一下，呀軒係遊戲開始前續個睇我地既底牌，所以知道我地全部人既身份，佢會用做手勢既方法話比警長知目標既底牌number。
「明白。警長請合埋眼……護士請開眼及指定要救既目標。」
隔離個爐啲人嘻嘻哈哈，同依面既寂靜一片有好大對比！
「好，護士合埋眼……殺手請開眼，然後確定你要殺死既目標。」
海風聲。
「好，請你合埋眼………所有人打開眼，回合結束。第一夜一人死亡。」
第一個死既到底係邊個呢？
「死既係……」
邊個會咁柒第一個死呢？
「澪，請你翻開你既身份牌。」
「我頂！」「哈哈哈哈！」第一個死既人可以獲得獎品 － 眾人的恥笑
澪既牌係七號，除左代表佢係平民之外，仲外表佢真係好柒。
「有無人想估邊個係殺手？」
澪坐係我對面，一般既邏輯黎講，係會殺左自己望到既人先。
如果咁計的話，呀方同鱷魚好有可能係兇手。
當然，殺手亦都可以反其道而行，所以咁計係完全無好處。
今個回合完全無有用既線索，為左唔想傷及無辜，所以我地未開始投票。
「既然係咁，第二夜開始。」
又過左一輪指令，我仲未有用能力既打算。
「第二夜結束，無人死亡。呀夜比人救左。」
「丫，你條契弟有啲負碌喎。」我笑道。
護士一開始仲難玩過殺手，因為仲未有規律出現。
因此，護士通常會救同自己人制關係最好既人，照咁睇的話似會救呀方既人就只有蜜糖同埋佢自己。
當然，我既推理唔係必然，係無乜線索既現階段，一般人好易會作出過度解讀將自己迫上思維既死角，於事我調整思緒，防止依個情況出現。
但係唔可以排除係隻冰妖冰中左殺手既可能性，如果下個回合再無人死，咁隻冰巫就好可能會確定到邊個係兇手。
比較令人關注既係，下一晚究竟會死幾多個人？殺手會唔會再瞄準呀方？
「有無人想發言？」所有人搖搖頭，於事軒仔續道：「咁樣的話第三夜開始。」
又一輪指令之後，已有結果。
「第三夜結束，結果係……」
「第三夜結束，無人死亡。呀夜又負碌過關！」
「嘩！」眾人嘩然。
「YES！」「Bingo！」我留意到蜜糖同唯都輕聲地歡呼一聲，唔知佢地咪特登。
究竟係隻冰巫連中兩次殺手，定係隻醫連救呀方兩次？唯同蜜糖都非常之可疑。
如果蜜糖係醫然後狂救呀方的話非常合理。
相信在場除左我之外都會有人留意到蜜糖係醫既可能性，但由於唔想珍貴既醫師被殺手瞄準，所以我無出到聲。
總之，如果蜜糖比人懷疑的話，我地出黎投no就得。
「開始有眉目喇喎，有人想估未？」
向另一個方面諗，到底邊個同毒撚方咁大仇口想殺尻佢？
「好，第四夜開始。」
唔知隻警察查唔查到啲乜野，只要隻差佬唔死，每回合都確認到一個人既身份，嬴就只係時間問題。
當然，隻警察有無說服力就係另一個問題。
一輪思考同聆聽之後，比較值得留意既係醫師既決定下得好快。反而之前好爽快既雪妖就諗左一陣。
睇黎蜜糖係醫既機會高達八成。
「各位請開眼，第四夜結束。」
我張開眼，到底結果會係點呢？
「吸血鬼復活，殺手人數增加至二人。」
「搞錯呀！隻醫剩係救呀夜唔救其他人，點做野架？」梓道。
「弊喇，有兩隻鬼，點算呢？」追風亦都有反應。
「有無人想發言？」軒仔問。
唔同前幾回合既沉默，唯舉手話：「要求投票，制裁追風。」
！！
終於有人出手！
「好，我比機會你辯護先。」
「真係唔係我呀，呀唯你唔好屈得就屈……我咁誠實，信我啦！」一個坐輕鐵唔買飛既人自稱誠實。
非常可疑。
但係依家已經有兩個殺手，如果再亂咁開刀，我地輸硬。
「咁各位開始投票啦，認為要處決追風既請舉手。」
紬、律、唯全部都舉起手，然後隔離既文雀出乎意料地都舉手同意。
「文雀乜你咁睇我架？」追風即刻同隔離既文雀做左個好失望既表情。
「唔好意思，你比我既印像好差。」追風應該受到好大既打擊。
糖、毒撚方、我、鱷魚都投反對票，所以依家投讚成同反對票既正正以追風為中心分開兩邊對立。
有殺錯無放過並唔係我既方針。我相信有腦既鱷魚都會諗到，而蜜糖同毒撚方，我估佢地都只係亂黎。
最後未投票既就得番梓，所有目光集中於佢身上，唔知佢會點投呢？
「我投反對，因為我唔想殺錯人。」
在場所有人都好意外，相信連追風都係。
因為輕音組全部生還者都投左YES，老老豆豆我本身以為班小學雞會唔識玩亂尻咁投。
「好，有無人想改變意見？」軒仔象徵式地問，暫時無人改變意見。
「咁我正式宣佈，投票以四對五被否決，遊戲繼續進行。」
第五夜開始。