如果你既人生好似打機一樣……: 8.8, 玩遊戲既時侯太認真既全部都係on9, 利申on9
「魔法師請開眼，請問是否需要使用能力？」
我點頭，然後指向蜜糖。
佢拍一拍蜜糖肩頭，將佢手中既卡拎走，再換番張葵扇四比佢，然後將佢手上既牌比我。
「明白，魔法師請閉眼。」
因為咁，蜜糖係唔會知道邊個拎左佢身份。
「醫師請開眼。」亦即係我，我再次開眼。
「請指定要拯救既目標。」
我零考慮，指定左身邊既一個人。
醫師既隱藏用途，我將會顯示於世人面前！
我指向右手面既鱷魚。
「明白，醫師請閉眼……殺手請開眼。」
因為之前個回合無人要求投票，所以今個回合比較難估。
唔緊要，咁樣正正可以發揮醫師真正功效！
「第七夜結束……無人死亡。鱷魚被醫師救活！」
好！咁樣有嫌疑既又小一人。
殺手係唔可以殺自己，因此只要係被救過既人，都可以代表佢唔係殺手。
依家被救過既人有呀方同埋鱷魚，再加埋已知係平民既糖。
剩番落黎，有嫌疑既就只有文雀、紬同埋律。
「要求制裁呀夜。」說畢時文雀撥一撥頭髮。
文雀點解會指定無嫌疑既呀方？唔通！
「好，呀夜比人懷疑，首先比左機會呀夜自辯先。」
我搖頭望向呀方，我本身以為文雀係好可靠既隊友，睇黎佢係吸血鬼既可能性係存在。
佢平時係團入面無乜存在咁，依種人做殺手先係最可怕，最殺人於無形。
「哈哈……文雀懷疑我喎。」
「哈哈……係咩？」
佢謂既自辯，就係望住蜜糖咁講出上面果句，然後蜜糖又回覆番。
好火滾！見到就嬲，曾經有一刻我比自己既憤怒控制左，想投佢地YES，拉依對狗男女去浸豬籠！
但係我既理性令到我個心平靜左，唉，我睇你兩個好得幾耐！
「好，咁樣就開始投票。」
「反對。」毫無疑問，蜜糖係會投NO。
佢自己做醫救左呀方咁多次，佢應該最清楚呀方唔係吸血鬼。
「反對。」除非呀方再放閃光，否則我唔會投讚成。
「反對。」鱷魚都投反對票，有佢支持我我都比較放心。
「好，已經有三票反對，所以再數落去都無意思。投票不通過。
「嘖。」文雀睇起上黎好不爽。
莫非佢真係殺手？
如果佢依家要求制裁的話，只要兇手係其他人，佢一定會被瞄準。
所以，好快就知道文雀究竟係唔係兇手。
「第八夜開始。」
「魔法師請開眼……」雖然我已經用左能力，但係呀軒係唔會講比其他人知。
亦都只有蜜糖同我知道我地身份交換左。
「明白。魔法師請閉眼，醫師請開眼。」
我開眼了，目標很明確 － 文雀！
「好，醫師請閉眼。殺手請開眼並指定要殺死的對象。」
如果殺手唔係呀文……依個係一個好好既機會嫁禍比呀文。
好混亂，我既思維好混亂！
「第八夜結束。」
「第八夜結束，無人死亡，文雀被醫師救活。」
咦？點解會咁既？
我本身預係第個會死，因為以我地正義一方既角度黎講，文雀跳出規律的話一定會比人懷疑。
但係隻殺手竟然蠢到瞄文雀？
「呀文你死過翻生，洗唔洗發言？」
「要求處決呀夜。」
！！
點解文雀既舉動都咁反常？點解佢仲要瞄呀方？
無理由，咁簡單既推理文雀無理由諗唔到！
「好，投票開始。」
蜜糖依然好快就投左反對，而我考慮左一陣。
文雀已經肯定唔係殺手，無嫁禍比呀方既必要，唔通佢真係有把握？
「蜜糖，你幾好野喎，連續救到人。」我冒住暴露身份既危險出口術，因為我有樣野一定要知！
「傻啦，如果我係醫，我一定會連自己都唔救係咁救呀夜，可～」佢又向毒撚方撒嬌。
我屌，佢地又放閃光，我要投讚成喇！
「反對。」如果蜜糖講既係事實，呀方無理由會係殺手。
「反對。」鱷魚亦都反對，好彩鱷魚仲係企係我依面。
「三比三，投票再次反對；仲有無人想再發言？」
文雀向我怒目而視，我望住佢，遊戲畫面出現。
零又來了。
平時我要搵隻鬼，今次唔同，隻鬼直接出現係我面前。
佢係好大隻，非常大隻，極之大隻。
相比之下，我就只係一隻螞蟻。
雖然好驚，但係我都係拎起相機，將鏡頭對住隻女鬼。
以佢咁既身形，想避開我鏡頭係無可能，就係咁，我成功地影低左佢。
「嗚哇－－－－－」
女鬼發出慘厲既慘叫聲，然後我返回現實。
眼前既文雀以不好甘心既眼神移開佢既視線。
《任務：令三名少女避開你的視線 2/3》
睇黎頭先既畫面係代表文雀既自尊心非常之大，佢好想証明自己先係正確。
如果咁的話，可以理解到佢點解要連續要求處決呀方。
有時，自尊係需要放下，然後認清真實。
「我可唔可以講多句？」文雀話。
「隨便。」
「我留意到隻醫換左人，雖然我唔知係邊個，但係我相信你一定係留意到開局既形勢先會肯定邊一個會係醫師而奪取佢既身份救其他人…………你跟住落黎救人既決定非常重要，今場嬴唔嬴到靠你。」自尊心咁重既文雀竟然講番咁既說話，到底係我誤解左佢女鬼所代表既野，定係……
「第九夜開始，請所有人合埋眼。」
跟住落黎要考慮既問題就係 － 要唔要再救文雀。
文雀固然係隊友，但若果隻殺手轉殺其他目標，咁我就白白地浪費左一個搵兇手既機會。
殺手因為勝利條件，佢係投票入面一定會不斷投yes務求加速死亡。
律同紬既投yes黨行為雖然可以解釋為小學雞唔識玩，但亦都可以解釋為佢地係兇手。
只要搞清楚佢兩個，是但一個比我救到，咁就可以肯定另一個人係殺手。
定係我應該救自己？
我依家先知道原來做醫揀救邊個果陣壓力係咁大，相信頭先蜜糖做決定果陣都係咁諗。
好想知道佢頭先究竟係唔係講真話！但係依家所有人合埋眼根本唔可以有眼神接觸。
即係跟住落黎依個回合既決定係需要靠估！
「第九夜結束。文雀死亡。」
最後我決定救左自己，因為我覺得自己依家唔可以死。但係文雀就因為我錯誤既決定而敗退。
唔通文雀先係岩既？呀方真係吸血鬼？
如果呀方真係吸血鬼的話，依家情況非常之差。
盲目地跟從呀方既呀蜜，一定會否決處決呀方，令到佢更加安全。
但如果律或者紬係吸血鬼的話就唔同講法……
可疑既人仲有兩個，跟住落黎，我就要務住被殺既危險去確認兇手既身份！
但係係繼續之前，有一樣野我要確定，究竟蜜糖講既係咪真話？
我望住蜜糖，等待佢眼神離開毒撚方既一刻。
接觸了！遊戲畫面立即出現。
於漆黑一片的黑暗之中，有一名穿和服的小女孩手中拎左個好細既波。
佢身邊仲有好多玩具……火車呀、飛機、遊戲機、積木等等。
隻女鬼留意到我，即刻向我咆哮，然後舉起右手，令到原本放係地上既玩具浮空。
佢右手慢慢移向我既方向，然後一揮，成卡火車就向我飛奔過來。
我即時向右一撲，然後鏡起相機，我按下快門一刻，佢竟然用積木檔住！
「我唔想同你玩……我唔要……我剩係要呀夜！」隻女鬼竟然忽然喊起上黎。
唔通條女係真心鐘意呀方？
係我思考既同時，佢忽然轉左個極度猙獰既表情，然後雙手舉起令到所有玩具浮起，向我拋擲過來。
面對依種攻擊，我根本無從可避！
「嗚哇－－」
我閉目起雙眼，然後下一眼面前出現既，只係呀方同蜜糖繼續係到放閃光。
睇黎條女無講到大話，佢真係一直補呀方……
咁樣的話，就只剩下律同紬。
「第十夜開始，請各位玩家閉眼。」
我對律同紬都一無所知，所以只係好隨便咁選擇救紬。
漫漫長夜結束，日出降臨。
「第十夜結束，律死亡。」
既然係咁，我可以敲定兇手係邊個。
律翻開身份牌，毫無意外地係平民。
「有無人想發言？」
「有。」鱷魚搶先舉手。
「團長請問你有咩想講？」軒仔好禮貌地發問。
「要求處決呀夜。」
連鱷魚都懷疑係呀方？無可能！
頭先佢本身都同意我，但係依家佢都改變左立場？
唔通要放低自尊，面對現實既係我？
「哦哦，連團長你都懷疑呀夜，投票開始。」
紬讚成，蜜糖反對。
二對一，然後得番我依一票。
「呀波，處決你既兄弟，你意見如何？」
我唔知道，我好迷惘……
如果殺手係紬的話，下一回合完結時而我救唔到人的話，就會得番三個人……
三個人的話，只要我同鱷魚同意，必定可以致紬律於死地。
但如果殺手係呀方，而我今回合投反對，再加上下個回合救唔到人的話……
蜜糖一定會支持呀方，即使佢有一票鐵票，剩低既兩個都可以以二比一處決呀方。
無論點都好，我都唔會輸住。
我始終都係相信自己既推理唔會有錯。
「反對。」
「無問題，二比二，投票駁回。」
鱷魚望住我，眼神非常之失望：「呀波，你需要面對現實。」
唔通我真係做錯決定？
「第十一夜開始。」
如果紬係兇手，佢會殺邊個？如果呀方係兇手，又會殺邊個？
鱷魚頭先要求投票，兇手好有可能會指佢。
但如果佢反其道而行，殺其他人呢？
即使點都好，我地平民方最後一定會勝利，但係我只想肯定自己係正確！
我決定補鱷魚，因為按之前既規律黎講佢係最有可能中伏。
「第十一夜結束，一人死亡。」
「波仔，請你翻開你既底牌。」
我？我死左？
我唔甘心，點解我會錯左？
我翻開自己底牌，眾人都不太意外。
由依一刻開始我唔可以再發言。
「好，請問有無人要進行投票？」
「要求制裁呀夜。」鱷魚續道。
無左我阻止既情況之下，投票順利通過。
「呀夜，請你翻開底牌。」
「唉哎，輸左添。」呀方翻開底牌。
Ｊ，吸血鬼。