【天使之戀-I】《天使降臨，在我心中奏起愛的樂章》: 可惜不是你

 
我自問不是一個十分勤奮好動的人，平時上體育課時我都會睡覺...
 
但無獨有偶，我對這不支薪的工作並沒有感到厭倦...
 
我從小就喜歡幫助別人，正所謂助人為快樂之本...
 
這義工的工作充實了我原本那空虛，木訥無味的人生。
 
而我只是個特殊案例，實際上，由於時間長了，不少義工的熱情也漸漸開始消退...




 
可是Daisy卻仍是幹勁十足，積極地做好每一天的義工工作。
 
當我在和Chloe談話之際，Daisy正一個人提著一大袋垃圾，好像十分勉強...
 
我二話不說，走過去幫她...
 
「咁重，我幫你拎啦」我一手接過她提著的那一袋垃圾。
 
「啊...唔該」Daisy說




 
接過袋後，我便得以看到她那原本被垃圾袋擋住的名牌...
 
一個「彤」字映入眼廉...
 
-------------------------------------------------------------------------------------------------------
「部琴咁重，我幫你拎啦!」我伸手過去接過她的小提琴
 
「無事獻殷勤，一定身有屎!」她笑說
-------------------------------------------------------------------------------------------------------




 
往事甜在心頭，卻只能回味......
 
不知為何，我看著這個女孩，有種好想待她好，保護她的感覺......
 
於是，接下來的所有搬搬抬抬等的粗重工夫我都替她完成。
 
「唔該哂你啊阿正，你真係好人，其他啲男仔頹哂起到，冇啲Gentleman風度!」倩彤笑說
 
「唔洗客氣...」我說
 
「唉喲，正哥你要溝樣衰彤啊?好麻煩架啵佢，我勸你就拿拿聲走，唔好賴屎上身啦!」矮仔堅過來說
 
「你想溝我咩?」倩彤精靈地望著我說
 




什麼情況?!
 
想不到她說話居然如此直接...
 
「梗唔係啦，講呢啲」我說
 
清潔完泳灘後，我們一起走回山上的飯堂...
 
沿途山路不是十分崎嶇，但也算累人...
 
「見你咁勤力咁，平時起學校都做義工架?」倩彤問
 
「唔係啊...係有個籌委推我入黎喳嘛」都是拜阿琴所賜...
 
「咁衰?籌委都係果幾個姐，邊個啊?」倩彤笑說




 
「凌思琴囉，你都知佢衰呢...」我嘆道
 
「哦，我識佢啊，彈鋼琴好勁架佢，你同佢好熟架?」
 
「唔係好熟，去過佢屋企訓咁解姐...」我心想
 
「OK啦...」我說
 
「我有時覺得你好似好面善，好似起邊到見過你咁...」倩彤疑惑地說
 
「有咩?我印象中冇見過你喎...」
 
「啊!」倩彤一不留神，在這山路上滑倒了...
 




我出於本能反應，一手捉緊她的手臂，另一隻手從下抱著她...
 
把她扶穩後，我發現自己的手正停在她的腰上...
 
我尷尬地縮開手，說：「Sor...」
 
倩彤卻根本毫不在意，一點尷尬之情也沒有，只是像劫後餘生那樣，搭著我的肩膀，喘著氣說：「呼...好彩有你，真係唔該哂」
 
「嗯...」
 
「啊!我醒起啦!你係咪sing con上台自彈自唱Maroon5果個?」倩彤突然擺出一個「師父明白了」的表情
 
想不到參加一次歌唱比賽會讓我在學校裡的知名度提高那麼多...
 
「係啊...」我不好意思地答道




 
「我記得，你果陣上台唱黎係為左氹女仔吖嘛!」
 
「可惜...」我心想
 
倩彤看著一臉頹然的我，問：「你同佢嘈交啊?」
 
「嗯...佢今個暑假出埋國讀小提琴，而我就黎左長洲...」我黯然道
 
「Sorry啊...我平時好多野唔諗過就講出黎」倩彤愧疚地說
 
「睇得出」我輕笑說
 
「你唔想叫我阿彤就係因為...?」倩彤看著我，心中也有了答案
 
「嗯...」我點著頭
 
「唔緊要啦，你叫我Daisy得啦」倩彤微笑著
 
「你對我咁好係咪因為我都係叫...?」倩彤疑惑地問
 
「我都唔知」我說
 
我們最終也完成了這段山路，平安地回到宿舍。
 
疲憊不堪的我一下躺在床上...
 
......
 
壽包堆砌成的塔上，一個個勇士都在全力以赴，努力地嘗試登頂爭那壽桃王...
 
「加油!加油!」人們的打氣聲不斷
 
阿彤抱著我的手臂，笑說：「阿正...我都想食果個壽桃啊，摘比我好冇?」
 
「好啊，今年我地分住壽包食先，下年我都參加搶包山!摘個桃比你!」我搣了一下她的臉頰
 
「講下笑喳!咁危險，你上去搶包山有咩冬瓜豆腐既話我點算啊」阿彤咬著唇嬌嗔道
 
「唔好驚，我一直都會陪住你架彤彤」我溫柔地說
 
彤彤...
 
彤......
 
「Woo，你真係中意左件樣衰彤啊?」矮仔堅在我床邊，笑淫淫地看著我
 
「下?做咩啊?」我疑惑地說
 
「你發哂開口夢咁啦正哥仔，彤彤，彤彤咁叫喎，識左人幾個星期姐你，咁猴琴都有既」矮仔堅滑稽地說
 
原來剛剛只是一場夢，怪不得那麼甜...
 
一醒來，雨彤又不在我身邊了，往事又湧上心頭...
 
-------------------------------------------------------------------------------------------------------
「虛宮玉...」我讀著牌匾上寫的字
 
「由右至左架傻佬，玉虛宮啊」阿彤笑說
 
「搶包山就係起呢到搞架啦?」阿彤指著下面的遊樂場
 
「係啊，第日帶你黎睇搶包山好冇?」
-------------------------------------------------------------------------------------------------------
 
阿彤，對不起，我亂給承諾，自己卻兌現不了。
 
我們全體人員在宿舍稍作休息後便到飯堂用餐...
 
每桌上都有一定量的飯菜，數量有限，不能補添，所以...
 
這是個弱肉強食和先到先得的世界。
 
我一邊吃一邊沉思著剛剛的事，吃得十分慢...
 
鄰桌的一個位空了，實在是奇怪...
 
經過早上的撿垃圾環節後，每個人都飢腸轆轆，還竟然有人不來吃飯?!
 
很快，鄰桌的白飯和餸菜就被那四人一掃而空了，他們四人吃著五人的份量，吃得津津有味......
 
我只吃了半碗飯，我這桌也只剩一小碗飯，我也要加緊速度了。
 
這時，一個身穿白色印字tee的少女向這邊走來，看著鄰桌上的一個個空空如也的碟子，說不出話...
 
她好可憐......
 
我想幫助她，但又有點兒尷尬......
 
看著她的名牌，我的目光停留在一個「彤」字上...
 
「Daisy，呢邊仲有」我對她說
 
倩彤走來我旁邊，看著桌上僅餘的一點餸菜和飯盆裡那大概一碗左右的白飯...
 
「呢枱啲女仔比較細食，仲有野剩，坐低食啦!」我說
 
倩彤坐下，生硬地拿起碗盛了僅餘的一碗飯...
 
「你添左飯啦?而家食緊係第幾碗啊?」倩彤問
 
「我添左啦，你餓啦，快啲食啦」我勉強擠出一個笑容
 
「阿正你真係好好啊...」倩彤笑說
 
飢餓的我也只有吃到一小碗飯，但看著她那滿足地吃著飯的臉......
 
我的心好像感到一絲安慰。
 
會不會有人如此單純，如此傻，就因為她的名字也叫阿彤就對她那麼好，默默地為她付出?
 
有，我真的會這麼傻。
 
或者問，我是不是把倩彤當作是她了？…
 
是不是在我對倩彤好時，我能找到一點兒安慰感?...
 
終於到了這義工計劃的最後一天。
 
「今日安排，我地清潔完泳灘之後就自由活動，中午飯堂唔會有飯供應，夜晚七點番黎禮堂參加farewell晚會，仲有talent shows！」主持人大喊
 
泳灘
 
「比我啦」我接過倩彤手上那袋重重的垃圾
 
「搞掂啦！」倩彤鬆了一口氣
 
「Lunch有咩好食？」倩彤問我們的組員
 
「冇所謂啦」
 
「番去玩煮飯仔好冇？」倩彤興奮地說
 
「哇樣衰彤煮野？謀殺咩！咁我寧願落海灘飲海水啦」矮仔堅說
 
「食屎啦頂你」倩彤一腳踢向矮仔堅
 
「食屎都唔食樣衰彤煮啲野啦」矮仔正一邊閃躲一邊說
 
「都攰，廢事啦，番碼頭果邊食野啦」其他人說
 
這時，D組那邊一個穿著黑色短裙的少女突然跑來我們這邊…
 
「條Chloe著成咁，係咪黎做野架…」我心想
 
「阿龍，去邊啊你地？我join埋你地得唔得」Chloe懇求著
 
「得得，梗係冇問題啦」其他男組員狗衝答應
 
我們便一行十一人漫步向長洲市區。
 
「你自己組呢？」我冷道
 
「咦，佢地好悶囉」
 
「我地都好悶架…」
 
「你好唔想我起到咩而家？哼！」Chloe說
 
聽著Chloe說這句……
 
從前，我身邊也有一個非常喜歡向我撒嬌的女孩…
 
亦只有她的撒嬌會讓我心軟…
 
曾經，無論心情有多不好，聽著她那把甜美嬌嗲的聲線，便什麼不開心都忘記了...
 
好想…好想再聽你向我撒嬌，你要什麼我都會答應你，好嗎？
 
「喂，靚女…」另一名男組員走來跟Chloe搭話
 
我回頭一看，發現倩彤正自己一個走在最後…
 
正如我們第一次上體育課那時一樣…
 
「冇得自己煮，唔開心啊？」我走倩彤身旁說
 
「車，冇野，有咩所謂姐」她一點也不介意
 
我們走在路上，倩彤不時留下看看路邊店舖的紀念品…
 
「呢個靚唔靚啊？」倩彤拿起一個木偶玩弄著
 
「乖啦阿彤…」我笑說
 
倩彤聽後，放下木偶，呆呆地看著我…
 
「肚餓啦，行啦…」我靦腆地說
 
我和倩彤就走在隊伍的最後，大家尷尬得說不出話…
 
「你成日對我咁好，我會以為你想追我架！」倩彤主動破冰
 
「諗下好啦你」我笑說
 
倩彤目不轉睛地看著我頸上的小提琴吊墜，說：「你女朋友叫Lucy啊？」
 
「嗯…」我黯然道
 
「好靚既名…同中文名一樣咁靚」倩彤說
 
「哇，乘乘機機讚埋自己？」
 
「佢叫咩彤啊？」
 
「雨彤…」我哽咽地說
 
在我心目中，這是最漂亮的中文名...
 
「佢好靚架？」倩彤問
 
「我成世人見過最靚，最得意既女仔…」
 
進入了鬧市，大家都開始買起各式各樣的小食吃起來，倩彤也不例外。
 
「大粒又彈牙既魚蛋！」魚蛋檔的老板喊道
 
倩彤立即買了一串魚蛋，滿足地吃起來…
 
我看著她手上的那一串魚蛋，心裡又開始隱隱作痛…
 
-------------------------------------------------------------------------------------------------------
「哇，啲魚蛋超大粒啊!」 她看著甘泰永魚蛋的出品，看得目瞪口呆...
 
「你試下」她那麼興奮，但自己還未吃就把魚蛋伸到我嘴前...
 
「好滑，好彈牙...」我仔細地品嚐著
-------------------------------------------------------------------------------------------------------
 
「好肚餓啊？食粒囉」倩彤把魚蛋伸到我嘴前
 
我接過一粒魚蛋，一邊吃一邊說：「冇…只係以前我地成日一齊飲一杯野，一齊食一樣野，佢無論幾肚餓都好，都會比我食先…」
 
「聽落佢好似好好咁喎，你地真係好幸福」倩彤笑說
 
「係，或者唔幸福既係佢，遇到我咁既人…」
 
倩彤聽後便默默地吃著，說不出話。
 
不知為何，今天我突然對倩彤完全放下了戒心，把她當作成我的樹洞...
 
吃遍長洲小食，吃個飽後，我們便起程回宿舍…
 
「哇，樣衰彤你手腳咁快既？兩下散手就搞掂阿正啦？」矮仔堅興奮地大喊
 
「你亂up咩啊？」倩彤走向矮仔堅那邊
 
原來他們正圍在連心鎖前…
 
「咦，彤love正喎，你又係姣果堆黎既」矮仔堅讀著鎖上的字
 
我一步一步走過去，停在鐵網前，輕撫著這刻著我們名字的粉紅色小鎖…
 
-------------------------------------------------------------------------------------------------------
「阿正…你想唔想比我鎖住你個心？」她溫柔道
 
「遙小姐你唔洗靠呢啲啦，對眼都已經晨早鎖實左我…」我拿起她的雙手
 
小提琴女孩咬著唇，用水靈靈的雙眼楚楚可憐地凝望著我…
 
夕陽下，我在這鎖面的右邊寫了一個「正」字…
 
小提琴女孩接過筆，在左方寫了一個「彤」字…
 
我輕捉著她的手，一起在中間畫上了一個心，然後把這連心鎖鎖在網上。
 
她抱著我，頭伏在我的胸口上，我們的頸上各掛著一個小提琴吊墜，底下刻著對方的名字…
 
小提琴女孩嬌嗔道：「今世剩係抱住我一個，好冇？」
-------------------------------------------------------------------------------------------------------
 
立下約誓時，說要海枯石爛，要永結同心，多麼任性，多麼堅定，多麼感人…
 
結果都穿不過大千世界的誘惑迷霧，最後只能作一張廢紙。
 
啊…好痛好痛……看著這鎖，一陣撕心裂肺的悲痛湧上來，教我求生不得，求死不能…
 
我痛苦地強忍著自己的眼淚，裝作無事地走開。
 
回到宿舍，稍作梳洗後，我躺在床上，只想一覺睡去，什麼都不想……
 
晚上
 
「起身啦阿正！七點啦，全世界去hall集合 矮仔堅把我拍醒」
 
「個晚會啊？」我睡意矇矇地說
 
「係啊，到時talent show果part你同黎倩彤一齊上去深情對唱啦！ 等睇你好戲啊」
 
「頂你咩，講呢啲，都話同佢冇野囉」
 
「得啦得啦，彤love正，冇野啦冇野啦」
 
……
 
朋友，你不懂。
 
我們到達禮堂後，有豐富的自助晚餐…
 
我盤坐在地上享用著晚餐，這時，一個身穿背心和超短裙的性感美女走來我身旁坐下…
 
「條Chloe著成咁，都係想招男友姐…」我心想

「阿龍，一陣talent show同你一齊上台合唱好冇？」Chloe問
 
怎麼會這樣？這個女人怎麼如此突然……
 
「我唔係好識唱歌架…」我隨便編個藉口
 
「你sing con攞第二架，你當我傻架？」
 
這回我真的無話可說了。
 
「定係你唔想同我唱喳？」
 
「你知就好…」我心想
 
「我喉嚨有啲唔舒服啊嘛…」我說
 
「哼，得啦，剩係同黎倩彤玩，你好野！」
 
無聊…她在吃什麼醋呢？
 
其實，我這生中，只跟一個女孩合唱過…
 
或許，我不想跟Chloe唱是因為我不想讓別人取代她在我心中的位置…
 
Chloe生氣地走去跟其他男生聊天。
 
「而家開始我地既talent show時間，第一位上台既係黃浩然同學，佢要表演魔術！」司儀大喊
 
「Woo」他的表演十分精彩，台下歡呼聲不斷…
 
接下來是一名女生走上台，她是…
 
倩彤？！
 
「今次義工計劃真係好有意義，大家一齊都好開心，我希望用一首歌黎紀念我地起到有過既快樂」倩彤說
 
音樂響起，是「Here's to never growing up」…
 
「Singing radiohead at the top of our lungs

With the boom box blaring as we're falling in love

I got a bottle of whatever, but let's get in this truck

Singing here's to never growing up」
 
-------------------------------------------------------------------------------------------------------
我按捺不住自己的情緒，情不自禁地拿起她的手，凝望著她......
 
「衰人，」 她咬著唇，說：「抽水」
 
「啊，我冇無心架，sorry...」 我急忙放開她的手
 
「傻佬」她噗哧一笑，好像毫不在意的樣子
 
「咁辛苦搬完啲野就應該獎勵下自己！」
 
說罷，她便站起來，走去打開音響和取了兩支咪來。
 
音樂響起，是充滿活力的「here's to never growing up」......
-------------------------------------------------------------------------------------------------------
 
棕色的長髮…
 
是雨彤嗎？
 
倩彤表演完畢後坐在角落，狼吞虎嚥著幾塊蛋糕…
 
「唔怕肥咩？」我笑說
 
真係好好味吖嘛！ 她一邊吃一邊說
 
呆呆地看著倩彤吃芒果蛋糕的樣子，她和的影子好像有點重疊在倩彤身上…
 
還記得我們在一起的第一天...
 
-------------------------------------------------------------------------------------------------------
我和她走到茶木裡坐下，對甜品一無所知的我不知道要點什麼好...
 
「你想食咩啊?」我問她
 
她連餐牌都不用看就興奮地說：「我想食個mango toast，」然後可憐地看著我，說：「但係一個人一定食唔哂...」
 
「嗯...你中意啦」
 
「你成日食呢啲架？」
 
「人生唔甜點有味啊？」她笑說
 
「又刀又叉咁，其實要點食呢舊野？」我問她
 
「用筷子食最實際！」她拿起筷子夾起一塊方型的吐司伸到我口前…
-------------------------------------------------------------------------------------------------------
 
我看著倩彤一口一口地吃著芒果蛋糕......
 
「成日食呢啲架你？」我問
 
「芒果真係好好味啊！」倩彤滿足道
 
「又冇人同你爭，慢慢食啦阿彤」我輕笑著
 
阿彤呆了，低頭吃著，說不出話…
 
「喂，阿正，我地黎劈過啦，當係慶祝你地兩個新人」矮仔堅捧著一堆啤酒過來坐下
 
「飲囉！」我打開一罐啤酒喝起來
 
「Cheers！」阿堅與我乾杯
 
我一直喝，喝了幾罐，阿彤卻不動手…
 
「阿彤，唔飲啊？」我問阿彤
 
一名男生走上台上，說：「我要演唱既係Maroon5 既Goodnight goodnight，多謝」
 
悲傷的旋律奏起，一下扣著我的心…
https://www.youtube.com/watch?v=uNSBq6hvU1s
 
一個個音符打在我心上，兩行淚痕出現在我臉上…
 
「You left me hanging from a thread we once swung from together... 」
 
You left me...
 
而我還未走出來...

「I licked my wounds, but I can't ever see them getting better
Something's gotta change」
 
與你分離的那一晚，你在我的心瓣上撕開了一個大洞...
 
我跟雷哥等人去尋歡作樂，去機舖，去酒吧，逍遙自在，流連忘返......
 
有車有錢財，有後台撐著...
 
但為何我的傷口一點兒，一點兒都沒有癒合過?!遙雨彤，為什麼?!


I've licked my wounds and I can never see them getting better…
 
聽到這句，我立即守不住自己的淚線，痛哭起來…
 
雨彤…
 
你在哪裡？我好想，好想…
 
真的好想你！
 
「I wake up every morning wishing one more time to face her...」
 
你知不知道我有多想再看看你笑，輕撫你的臉?
 
「I'm sorry, I did not mean to hurt my little girl」
 
阿彤，我的不是有意的，原諒我好嗎?
 
「阿正，你冇事吖嘛？」阿彤轉過頭來問我
 
眼前的可人兒長著一頭棕色的秀髮…
 
「阿彤？」我驚呆了…
 
你不是去外國讀音樂了嗎，怎麼會在長洲？！
 
我再看清眼前這女孩，她真的是雨彤！
 
我立即一下把阿彤擁入懷中，說：「彤彤！我好掛住好掛住你啊…」
 
「阿正…」
 
「我真係真心中意你架…出面大佬比果啲榮華富貴，我咩都唔要，我剩係要你一個！」
 
我情深地說：「對唔住，係我衰，我應承你以後唔出去打交，比多次機會我，原諒我好冇？」
 
「阿正，我係倩彤啊…」
 
我繼續哽咽地說：「彤彤，無論發生咩事都好再離開我好冇？」
 
矮仔堅的聲音傳入耳中：「喂，認真架阿正？你攬住果件樣衰彤黎架…」
 
等等…這觸感與往日有點兒不同，還有，這秀髮也沒有玫瑰花香…
 
我鬆開手一看，原來我剛剛擁抱著的是倩彤，不是雨彤！
 
「Dai…Daisy? Sorry啊…」我尷尬地說
 
「嗯…」倩彤十分靦腆
 
「原來阿正你對倩彤咁係因為你…女朋友都叫阿彤？」阿堅慨嘆
 
「唔通今朝我地見到果個心鎖真係？…」倩彤疑惑地說
 
「嗯…」我再打開一罐啤酒喝起來
 
「Sorry啊，我之前仲日日抽你水，估唔到原來…」阿堅愧疚地說
 
「咪再飲啦阿正！」倩彤按著我那拿著酒罐的手
 
「唔飲又可以點？」我頹然道
 
「你有咩唔開心啊？發生咩事啊？同我地講吖…」倩彤說
 
「你地想聽故仔？」我問
 
「嗯…」倩彤和阿堅都擺出一副準備洗耳恭聽的樣子。
 
我醉薰薰地說：「上年暑假，有個Mk仔同人打交，搞到要起一間療養院到做社會服務令，起果到佢識左一個女仔…
 
果個女仔成面貼哂胶布同藥棉，所以個個都唔中意佢，甚至一齊蝦佢…
 
Mk仔挺身而出，保護個女仔，從果刻起，女仔就認定左個男仔係一個唔會以貌取人，值得信賴既人，從而愛上左佢…
 
Mk仔做完社會服務令之後，就繼續讀書，起新既學年佢起機緣巧合下識到學校女神中既女神…
 
女神完美既外貌再加一個迷人既咬唇就深深咁鎖實左Mk仔既心，男仔對佢一見鍾情…
 
女神係全校公認最靚既絕色美女，受無數狂蜂浪蝶追求，而Mk仔只係個讀E班，默默無聞既邊緣學生…
 
但唔知點解，其他靚仔有錢仔都能完全冇辦法得到女神歡心，女神就剩係中意同Mk仔傾計，對住佢笑，對住佢嗲，同佢玩，同佢出街，對Mk仔放下所有戒心，十分信任佢…
 
Mk仔同女神成為左好朋友，甚至有啲曖昧，離戀愛剩係差一步...但就起呢個時候，一個壞人插手，用奸計分化佢地兩個，令佢地兩個對對方產生誤會，女仔好激動，而個男仔就以為自己配唔上個女仔而唔敢搵佢...
 
MK仔有個有錢同學起西貢住別墅，佢就開始成日喱起佢個有錢同學屋企到，食山珍海味，過住有錢人既生活，其他咩都唔想理，剩係識逃避現實...
 
但其實女神個心仲起個MK仔到，一直等緊佢，甚至有時會為佢而喊，只係佢傻到唔識珍惜，唔識勇敢去追求女神...而果個半路殺出黎既壞人開始大膽咁去馬，成日痴住女神...
 
MK仔每次睇到女神同個壞人一齊時都會感到好心酸，覺得自己好廢，條件好差...佢唔係男人，剩係識得將女神拱手讓比人。佢就咁起學校一日頹廢過一日，過住行屍走肉既生活...
 
直到有一日，一個天使向佢顯現，彈出一首「算什麼男人」比MK仔聽，賜比佢無窮無盡既力量，燃起佢內心對女神埋藏已久既愛，令佢重拾信心...
 
男仔鼓起勇氣，就好似一頭蠻牛咁橫衝直撞，做左好多瘋狂既野...佢唔識唱歌，但居然為左女神去報sing con，日練夜練；佢唔識彈琴，但夾硬去死背琴鍵，練到廢寢忘餐，就係為左學識彈一首歌，自彈自唱比個女仔聽黎道歉...
 
果首歌就係Goodnight goodnight。
 
唱完之後，個男仔竟然痴線大膽到拎住個咪，當住全校師長面，同個女仔個對唔住...換黎個女仔兩行感動既眼淚...
 
之後果日，起陰差陽錯之下，個男仔發現左一個大秘密...
 
驀然回首，那人卻在燈火蘭珊處...
 
原來MK仔起療養院到幫既果個毀容既女仔竟然就係佢女神...
 
所以女神對佢先毫無戒心，信任佢，等待住佢，愛佢...
 
就起Mk仔要向女神告白果日，女神竟然比同班同學欺凌，班友攞界刀界穿哂佢條裙，仲想界埋佢頭髮！
 
個男仔就起千鈞一髮之際阻止左佢地，女仔一下攬住男仔，痛哭起黎…佢地兩個之間所有誤會終於化解哂…
 
第二日，男仔帶個女仔去商場，憑一首All of me向佢表白，贏得左佢既心…從此，佢地兩個就正式起埋一齊…
 
兩個人雖然冇好多豐富既物質，冇去半島食飯，冇出去旅遊…一齊既校園生活好簡單…
 
但簡單得黎卻好快樂，每日朝早起火車站攬下對方，放學後拖住手仔行下商場，只可以一齊夾錢食個幾十蚊既下午茶都好，只要有對方起身邊就夠，別無他求…
 
幾個月之後，佢地揀左日一齊去長洲玩…
 
果日佢地好盡興，係女仔一生過得最開心既一日，亦係呢對小情侶擁有既最甜蜜最難忘既回憶…
 
佢地見到Lock of love，情到濃時，愛得不能自拔既佢地就一齊鎖左一個連心鎖，抱住對方，男仔承諾會抱住佢一生一世，永不分開…
 
女仔係全校女神既時候，MK仔固然會做好多野去氹佢開心，對佢好好...但當女神成為左佢女朋友之後，Mk仔慢慢開始將佢女朋友對佢既好當成係理所當然…
 
女仔對Mk仔冇任何要求，一直小鳥依人咁痴住佢，起佢背後支持佢，對佢溫柔體貼，好得無微不至，但Mk仔就係唔識珍惜…
 
有一次Mk仔出去同人打交，仲分到錢，於是就請女朋友食野，但有左錢，果晚女仔反而笑唔出，仲苦苦哀求男仔唔好出去打交，男仔就係咁意應承住佢先…
 
女仔成日叫Mk仔讀好書，成日拉佢一齊溫習，但Mk跟本就仔無心向學，甚至開始覺得佢女朋友煩…
 
有一晚臨Exam前，Mk仔既朋友再叫佢去打交，佢為左江湖道義即刻應承…
 
佢女朋友一聽到佢要打破話自己唔打交既諾言後就徹底心碎，喊住咁求佢唔好去打交，Mk仔就更加覺得佢無理取鬧，覺得佢煩，甚至罵番佢轉頭…
 
女仔喊著咁用分手呢威脅佢，但Mk仔盲信出面所謂既「兄弟情義」，「出黎行講義氣」，所以決定掉低最真心愛住自己既女仔，即刻去幫果班所謂既「兄弟」…
 
果一晚，女仔喊得好慘，但Mk仔冇回頭...
 
從此，Mk仔許下既佢地既諾言，女仔付出既真心，佢地既山盟海誓，就咁化成左一個句號…
 
人就係咁犯賤，起到既時候唔識得好好愛護佢，失去左之後先識得珍惜...MK仔又重蹈覆徹，同第一次離開女仔時一樣，每日心如刀割，又好似失去左人生意義咁，只可以過住行屍走肉既日子...
 
Mk仔跟住佢班「兄弟」一齊去尋歡作樂，但佢無論做咩都好，再都感受唔到一絲既快樂...佢個心就好似穿左一個窿咁...
 
佢朝早訓醒，中午食飯，夜晚起床上碌住都好，都無時無刻唔掛住個女仔，因為佢只係一時衝動，而其實佢個心從來都冇變過，佢唔可以冇左個女仔起佢身邊，佢真係好中意好中意好中意個女仔... 」
 
倩彤聽完這故事後，臉上也出現了兩行淚痕...
 
說到這裡，我實在忍不住痛哭起來，痛苦地敲著地板...
 
「阿正...唔好咁啦」倩彤哽咽地說
 
「彤彤...我真係好愛你!如果比多次機會我揀既話，我咩都唔要，我剩係要你!!!」我悲慟地喊著
 
「阿正…唔好再飲啦」倩彤按著我的手
 
「專情既男人最痛苦…」阿堅嘆道
 
「當有人成日對你好既時候，你就會習慣成自然，而人就係咁不懂感恩，人地次次都你身邊支持你既時候你唔會感謝佢，但只要佢有一次唔順你意，你就會批判佢對你唔好…」倩彤認真地說
 
「阿彤佢真係好溫柔，對我好好…」我哭道
 
「比著我係佢我都會嬲，自己一次又一次既付出居然只可以真心換絕情…」
 
她繼續說：「但係女人都係心軟既動物，如果係好似你講咁既話，咁你女朋友一定真係好愛好愛你，所以你實有機會再感動多佢一次…」
 
「感動多…一次？」
 
阿堅突然搭話說：「我先冇咁傻啊！理得佢咩大佬，咩江湖道義，呢啲野佢地講就生猛，實際呢？係真心中意既，比我就絕對打死都唔會放開我最心愛既女仔！邊個對你真心，唔通你自己唔識睇咩？」
 
阿堅的話一字一句鑿在我心上…
 
「我係咪傻到咁？邊個最愛我係咪真係唔知？」我心想
 
「為左阿浩去打交，同班三唔識七既黑社會講道義，連阿彤都唔要…」我內心繼續自責著
 
「中意人就氹番人番呢！咁好既女仔，唔追番佢既話，你會後悔一世！」倩彤說
 
「後悔…一世？」
 
此刻我真的恍然大悟了…
 
彤…我真的愛你，我不能失去你…
 
翌日
 
我酒醒過後，來到飯堂吃早餐，一下與隔壁桌的倩彤四目交投，大家都十分的尷尬…
 
在不知情的外人看來，就覺得我這猥瑣男昨天酒後亂性，一下把持不住色心，熊抱著倩彤。
 
我雖算不上是個道德模範，但想不到我竟要背著色魔的罵名來結束這段義工生涯。
 
我們收拾好背包後，便乘船離開長洲，回到我們足足一個多月沒有踏足過的市區…
 
「呼…都係長洲空氣好」倩彤吸了一口中環的空氣後說
 
「一齊搭地鐵番屋企？」倩彤問
 
「我應該渣電單車…」我的機車停泊在碼頭附近一個多月了
 
「車埋我！」
 
「車埋我！」
 
阿堅和倩彤同時說出這句話。
 
無論如何，機車不能坐三個人吧…
 
「我屋企起北角喳阿正，好近喳嘛，樣衰彤住沙田咁遠！油費唔平啊…」阿堅先發制人
 
「咩啊，我住沙田，阿正話佢住馬鞍山啊，咪順路囉，車你去北角先兜路哂油啊！北角咁近都唔搭地鐵，仲好講！而且人女仔黎架嘛！」
 
「咦，女呢架？哇你條男人婆唔講我又唔知喎，咁重，阿正車唔郁你架…」
 
「講咩啊頂！」倩彤一下旋踢踢向阿堅
 
我看一看倩彤，她正背著背包，而阿堅則是提著一個行李夾…
 
「拿…阿堅，其實呢，你拖喼，我就冇可能車到你既…」我說
 
「頂，重色輕友啦頂」阿堅晦氣地走向地鐵站
 
倩彤坐在機車的後座上，小心地扶著車尾…
 
「要點扶架其實？」倩彤問
 
「我揸得快既時候你就用力壓住，剎車時就拉實」我笑說
 
「哦…」
 
「哇！…後邊好似好難扶啊！」我一開動機車，倩彤立即受不住驚嚇
 
「扶我囉咁，簡單又直接」我無奈地說
 
「好啊好啊…」倩彤聽後狗衝答應，立即伸手抱著我的腰
 
在她的手抱著我的腰的這一瞬間…
 
還記得與她交往的第二天早上...
 
-------------------------------------------------------------------------------------------------------
「唉，仲以為有女，番學就有人陪唔洗自己一個咁毒，點知都係咁」我心想
 
踏進冰冷的月台，呆呆地等待列車到站…
 
突然，一股溫暖的感覺從後方傳來，是一雙纖柔的手從後抱住了我的腰…
 
「哧…」我不禁由心裡笑出來
 
我捉起我腰上的那雙手，轉過身來，看到綁著馬尾，戴著淡粉色粗框眼鏡，穿著管弦樂隊的西裝外套和白色校裙的小提琴女孩正站在我面前，咬著唇看著我…
 
我十分驚奇地看著她，她則是用下唇包著上唇，嬌嗔道：「抱我！」
 
我笑著把軟綿綿的她擁入懷中，她就像個小女孩那樣依偎在我的胸口…
-------------------------------------------------------------------------------------------------------
 
曾經，常有一雙纖柔的手抱著我的腰，那觸感既柔軟又溫暖，還帶著驚喜，帶著愛…
 
今天，阿彤坐在我車上的後座，抱著我…
 
只可惜這個阿彤...她是倩彤，不是雨彤。
 
「唔洗就住我，當你冇車緊人就得架啦！」債彤豪邁地說
 
「我啲街坊街里都叫我馬鞍山車神，我起恆安區都算小有名氣…」
 
「係啊係啊，繼續吹！」
 
我一改以往的作風，今次小心地駕駛著…
 
畢竟我背負著一條人命，總不能兒嬉對待吧…
 
「洗唔洗渣咁慢啊，男人老久！」
 
「哈哈」我尷尬地笑著
 
我又不是在載著一個害羞的小女孩，像她這狂放的女中豪傑，何必如此介懷呢？
 
我加速行駛，在車群中左穿右插，很快過越過了大海，來到對岸…
 
「你住邊？」我問
 
「第一城果頭放低我得架啦」
 
車駛進了沙田，在行駛其間，突然一個老伯停在路中心:o)
 
「頂！」我一下急轉再急剎，化解這次危機
 
「哇！」這下突如其來的衝擊使倩彤捉不穩，整個人撲在我背上，「啪」的一聲，她的頭盔撞上了我的…
 
「好險啊…」倩彤喘著氣說
 
路中心的老伯卻不說話，只對我們報以一個微笑…
 
「究竟係咩料…」我一頭冒水
 
經歷過此意外，再次駛動車子時我仍心有餘悸，於是便在餘下的路程上都十分小心，而我後座的女孩亦沒有再叫我加速了…
 
我就這樣安穩地倩彤送到第一城。
 
「唔該哂…」倩彤脫下頭盔遞給我
 
「反正順路」我說
 
「番學見啦，我下年五B，你呢？」
 
「六D囉」… 我慚愧地說
 
「希望你早日氹番另外一個阿彤啦」倩彤笑說
 
「我會努力…」
 
「係喎！你黎唔黎一開學果個ball啊？」
 
「Ball?冇聽過喎，而且我都唔識跳舞…」
 
「學生會搞架，好似話係新一年比所以新舊既學生會同學認識下」
 
「玩呢啲？…」我還沒搞清楚情況
 
「到時黎啦總之，開學第一個星期六啊！ 走先啦byebye」
 
「Byebye…」
 
我就這樣別過了在我最空虛時陪伴了我一個月的倩彤，我生命中的第二個阿彤。
 
像我這種人，並沒有做了很多好事，但回想起過去一年的日子，其實上天卻待我不薄…賜給了我一個獨特機會去認識我最心愛的女孩，在我第一次受傷時派阿琴來陪我度日…
 
我不懂珍惜，致使自己又再一次失去小提琴女孩，而這次，上天又派另一個阿彤來安慰我，開解我，陪伴著我。
 
我還真是個幸運的傢伙。
 
沒了倩彤後，我又回到一個人的世界，每天只能在家打打遊戲，睡一下覺，就這樣休息了一個星期…
 
「阿正啊，你日日咁宅起屋企點得架？出去行下啦！」老媽喊道
 
「得啦得啦」我敷衍著她
 
吃過晚飯後，我隨便換了套衣服就走下樓，周圍逛著…
 
一走出屋苑，就是西沙路花園，這片花園真是跟學校的很像…
 
呆呆地看著這片花園，一個身影浮現在我眼前…
 
她一頭棕色的秀髮被紮成馬尾，身穿白色校裙，左手拿著一部小提琴，右手拿著弓……
 
「彤彤，部琴咁重，我幫你拎好冇？…」我對她說
 
「彤彤？…」我再叫道，但她還是沒反應…
 
我揉一揉眼睛再認真一看…
 
她怎麼不在？！
 
剛才看到的只是幻像嗎？…
 
我頹然地繼續走在路上…街上暗淡的燈光使孤獨感更濃…
 
我一直走，走到覺得熱了便走進一座商場裡，乘一下冷氣。
 
看到一間綠色的餐廳外有一大批人在排隊，抬頭一看…
 
是「茶木」。
 
------------------------------------------------------------------------------------------------------
我跟她一起吃著這芒果雪糕，而她則是用刀在切著那塊大吐司，然後把一塊塊吐司撥到我那邊…
 
但我吃著吃著就發現，原來她不單純是在切給我吃，還好像是在切些什麼形狀…
 
不一會兒後，她便切出了「L O V E」四個大字…
 
「玩食物？」我裝作嚴肅地說
 
小提琴女孩聽後咬著唇，鼓起泡腮，生氣地望著我…
 
我拍拍她的臉，她裝作生氣地移開我的手，然後吃起那四隻英文字母來…
 
我們就在這樣打打鬧鬧下吃著這雪糕塔......
------------------------------------------------------------------------------------------------------
 
那天是我們初戀的第一天…
 
兩個人一起吃著一份甜品，那感覺簡直甜到入心…
 
可惜現在只剩下一個人的苦澀。
 
離開茶木，繼續向前走，看到一家琴行…
 
想當日我不惜花光自己的積蓄，買了一部昂貴的小提琴…
 
看著櫥窗上掛著的一部部小提琴，不禁感慨地握起我頸上的小提琴吊墜…
 
現在我才明白，原來那天在我生日時，她為我戴上的不僅是吊墜，還是一個魔咒，愛的魔咒，教我這生都對她念念不忘的咒。
 
看著這飽經磨煉的水晶小提琴吊墜，心裡實在是百感交集…
 
底下刻著的英文字Lucy仍舊可見，只是好像多了幾分滄桑…
 
她信任我，認定了我，給我此定情信物…
 
我們誤會過，痛苦過，亦甜蜜過，過程中未有快樂亦有悲傷，但與她共度的每段時光都值得回味…
 
亦正是如此，我們之間的經歷才更不平凡，更刻骨銘心，大家之間的感情才更難離難捨，更真切！
 
刺骨的冷氣讓我抵受不住這空虛，我只好回家躲在被窩中...

分手那天，我看著你走遠...

所有承諾化成了句點。

獨自守在空蕩的房間，

愛與痛在我心裡糾纏......

我們的愛走到了今天，

是不是我太自私了一點?

如果愛可以重來...

我會為你放棄一切!

想你的夜，多希望你能在我身邊!

不知道你心裡還能否為我改變?

想你的夜...

求你讓我再愛你一遍!

讓愛再回到原點。