《相交的平行線》: 第二話

"遇見是兩個人的事，離開卻是一個人的決定；遇見是一個開始，離開卻是為了遇見下一個離開。這是一個流行離開的世界，但是我們都不擅長告別。"-生活在他方

 
就係咁，呢3日2夜我就同淇淇同一組。分組之後，組裡面有7個人，除左我同淇淇之外，仲有呀年，呀達，呀泰，Kristine同呀欣。然後主持人首先俾10分鐘時間我地互相認識。咁我地就坐底圍左個圈，淇淇就開始發揮佢嘅領導能力，充份表現著風頭人物嘅性格。
 
「Hello，我係5C嘅淇淇呀，不如我地介紹下自己先啦～」
 
淇淇以輕柔嘅聲線，再加上甜美嘅笑容，當堂吸引了側跟嘅小兵和應。
 
「Hello，我係5D嘅呀年。」……
 


經過一輪的介紹，只差我一個，所以所有人都望住我。我心諗，你地唔駛咁望實我嘛。再加上淇淇佢嘅明眸注視，我嘅心情即刻緊張起呢。
 
「Hi，我係5E嘅呀單，大家好。」
 
 「原來你就係呀單呀」 淇淇突然驚訝著。
 
「噢，係呀。你好，點解你會知我個名？」
 
正當淇淇想解釋時，主持人集合我地話第一個Program要開始啦，而家我地要移師室外進行。
 


「嘻嘻，今晚搵你先再話你知啦。」淇淇行過我身旁 ，正因為佢身高只到我膊頭，所以掂高腳，到我耳邊細細聲話。
 
那一刻我突然緊張起來 「今晚…再搵我？？」 正當我理解緊妳的意思時，背後突然一沉。
 
「行啦，仲思春，再唔行佢地開始啦。」 高佬一手搭著我肩膀話。
 
「你唔係應該陪著呀喬嘅咩，咁得閒呀？」
 
「我已經約左呀喬今晚細說心事，呢啲叫速度好冇。」
 


「哈，Talking with the moon囉，咁即係今晚唔駛預你睇達哥啦」
 
「仲睇達哥？今晚要睇星。」
 
「好好，有異性冇人性啦唉。」
 
「你睇下肥仔佢先啦，一個yo兩個女神，呢啲先叫有異性冇人性囉。」
 
眼見前面呢個肥仔，輕而易舉咁yo住兩個靚女也沒有一丁點嘅壓力，睇呢佢脫毒成功了。
 
第一個program 係Ice-breaking，目的是為了令我地能夠同組員進一步互相認識和破除冰山一樣嘅隔幕。經過Ice-breaking之後，佢地己經比開始個陣熟得多，開始有講有笑。
 
「呀達你頭先劈開個西瓜時真係有啲料到，果然係玩開空手道」Kristine 說。
 
「當然啦，只係碎料，何足掛齒。」


 
「但係果西瓜真係好大個，劈開之後仲要食哂佢堅飽。」 呀年企係另一邊摸著個肚話。
 
「好彩我地有四個男仔咋，如果唔係就會好似J me同呀藍個組咁要靠兩個男仔做主力。」淇淇話。
 
「個肥仔都好勁呀，睇著佢鯨吞個大西瓜，真係嚇到我呢。以為輸梗個陣，好彩我地都有大口欣咋哈哈哈！」
 
「頂你呀孱仔泰，自己食唔到就逼我食，而家又話我大食，你老味呀。」呀欣一路追住呀泰打。
 
「你覺得點呀，做乜唔出聲呀，係咪食完有啲咩唔舒服呀」淇淇過來望著我問。
 
「唔係呀，只係唔知有咩講姐。」
 
「你真係好靜呀，你係咪成日都係咁嫁。」
 


「Er…係掛。」
 
「唔好咁啦，你要融入我地先得嫁嘛。」
 
當時嘅我，真心認為有點強人所難。雖然女神主動同我傾計真係好開心，之但係佢都只不過係循例關心下組員，發揮下萬人迷角色設定。
 
但原來我已經係你心入面佔有很重要嘅位置？原諒我當時未能向你表達我心中所思所想。
 
晚飯過後，我們就進入第二個program──夜行。
 
「夜行係俾我們去一笪離營地唔遠但沿途冇光嘅路，之後逐個行翻營地。」 主持解釋著。
 
當時八月的天氣很熱，熱得有點過份。但幸運的是天朗氣清，夜間郊區光污染沒城市那麼嚴重，四周漆黑得要緊。但同時，天上的月亮，星宿才能清楚展現，甚至連夏季的銀河亦影入眼廉。繁星與銀河，一個接著一個的努力著，讓我們相交。
 
「喂，邊個行先啦，我有啲驚呀……我唔行先呀。」 淇淇震驚著。


 
「邊個行先啦，我都好驚喎。」 呀欣話。
 
「咁我地四個男仔行先囉。」呀泰提議。
 
「咁咪要我地兩個女仔行最尾姐囉，唔好啦。」淇淇話。
 
「毒男你行最尾，我地三個行先啦？」 呀泰話。
 
「呀欣呀，都係你行先啦，幫幫我壯膽啦。」淇淇說。
 
「好啦咁。」 呀欣說。
 
「咁呀單你行最尾有冇問題呀？」 淇淇輕柔問我。
 


「我冇所謂呀。」
 
終於，我們決定好順序就開始行，當淇淇正等待出發的時侯，
 
「呀單你行最後驚唔驚嫁？」
 
「ok啦，又唔會蕩失路。」
 
「咁我見到前路一盞燈都冇，咁黑又唔知有啲咩會出黎……」
 
其實我感覺到淇淇依然好驚，所以我決定嘗試下氹下佢。
 
「有個月亮陪著你呀嘛，唔洗怕。」
 
「雖然姐，但……」
 
正當淇淇仲想講時，工作人員已經安排佢要開始行啦，而我就再等5分鐘之後先出發。
 
「咁陣間見啦呀單。」
 
「小心D，陣間見。」
 
在這5分鐘，我不曾為漆黑的前路而憂心。我只是在想，今早自我介紹時，淇淇所表現的驚訝，為什麼妳會如斯？我的名字對妳而言，又是怎樣的一個代名詞？是一個知道名字的陌路人嗎？還是我已經享負「毒」名？想著想著，5分鐘過去，該我出發的時候了。
 
儘管我向著漆黑的前路踏步，但天上的確有很多星星。北極星在我正前方閃耀，原來營地在北方，那我一定不會迷路了。佼潔的月亮在正上方照著我，幫助我望清前面的路。走到一半的路程，我看到前方有兩道月光繞過樹影聚焦在樹下的少女身上，妳……映入眼簾，是淇淇。但妳並沒有立即注視到我，而是不斷的利用月光查察地面。這次是月亮，把我帶到妳面前。
 
「你搵緊咩呀？」
 
妳被我發出的聲音嚇了一跳。
 
「我唔見左今朝抽個粒波子呀，臨出發時都檢查過係度先出發，但想再攞出黎個陣已經唔知跌左係邊。」
 
「咁我幫你搵下。」
 
我們沿著大樹的周圍看，雖然月光照著，但樹旁仍是漆黑一片。找著找著，看到前方有點反光的顆粒，拿上手看，是紅色的波子。
 
「搵到啦！」
 
「俾我睇下？」
 
「係我個粒呀！唔該。」 這一刻，月光映照著她白白的臉，而臉上顯出一抹淡淡的紅暈，是種失而服得的幸福。村上春樹說過「剛剛好，看到你幸福的樣子，於是幸福著你的幸福。」我看著他，不經不覺被妳吸引著。妳總是有這種能力，總能夠吸引著別人的眼球。
 
「不如我地一齊行囉？」妳一語劃破這寂靜。
 
「哦，好呀。」
 
「係呢，你仲未話我知點解你會知我個名喎？」
 
「你真係想知？」
 
「唔想知我又點會問」
 
「係因為……係因為……我之前就聽過你個名啦。有次女童軍聚會，有個隊員佢係要成日係圖書館當值做管理員。佢個次突然間提起係圖書館成日見到個好奇怪嘅男仔，每一日放學都見到係度睇書，但係從來唔借書喎。一睇就睇到學校圖書館收館嘅時候。而佢有次要影印，咁我個朋友終於知道個男仔叫咩名，個個就係呀單你啦。我個朋友講過你都好鍾意睇米蘭昆德拉同村上春樹嘅書，所以我對你真係好有印象，之後我有再問你會睇咩書……。」
 
「海明威同卡夫卡。」我說著
 
「你都真係好鍾意啲翻譯文學。」
 
「咁我都會睇下張愛玲嘅。」
 
「其實你都睇好多書喎，咁你最鍾意邊本呀？」
 
「從現在起，我開始謹慎地選擇我的生活，我不再輕易讓自己迷失在各種誘惑裡。我心中已經聽到來自遠方的呼喚，再不需要回過頭去關心身後的種種是非與議論。我已無瑕顧及過去，我要向前走。」
 
「生命中不能承受的輕!！！」
 
「咁你呢？」
 
「如果你認識從前的我，那麼你會原諒現在的我。」
 
「原來係傾城之戀。」
 
一個極似允兒的女仔，在話語之間，不多不少散發出文青的氣味，這個女生，慢慢的，慢慢在我心中擴展著。我想遏止。心臟是一座有兩間卧室的房子，一間住著痛苦，另一間住著歡樂，人不能笑得太響，否則笑聲會吵醒隔壁房間的痛苦。我害怕著，害怕著結束；我喜歡著，喜歡著一起。