《相交的平行線》: 第二十八話
「人生得意須盡歡，莫使金樽空對月。」──將進酒
2015年5月11日 上午7時
為了爭取最多的時間玩，所以我們決定早機去，晚機返。我們相約了在如心廣場等，一起乘巴士前往機場。一如既往，某人例遲。幸好我跟高佬對他認識極深，所以把約定時間提前了，先去吃早餐等他。
「肥仔咁耐嫁。」 呀喬說。
「我同呀單已經習慣左啦。」高佬說。
「嗯，佢陣間一定會以登台嘅做型出場，戴埋佢副ray-ben，頂著頂捧球帽，一件半鬆身嘅dicks t-shirt，同時下面配灰色棉質短褲，腳就著最新嘅 AJ future。」 我說。
「會唔會係咁呀。」pinky 問。
「你唔信可以問下J me。」
「其實我都相信，形容得有啲似。」
「而佢第一句說話一定係『唔好意思，晏左起身。』。」我說。
然而，當我們完成了早餐之後，各人望著我背後的門口大為驚訝。
「唔好意思，晏左起身。」 肥仔說。
「有冇咁準呀。」濋濋亦難得感嘆。
「我地太熟悉佢啦。」 高佬說。
「好啦，齊人就行啦。」 妳說。
「但係我未食野喎。」 肥仔說。
「你仲想食野？」 J me責罵的道。
「咁呀單 set 嘅時間表一定有預時間嘅，食埋先啦。」
「冇呀，呢個係懲罰。」 J me道。
「好啦好啦，唔食唔食，唔好嬲啦 J me。」
「肥仔終於搵到個人治佢啦。」 我跟高佬感激流涕。
然而我們一行八人便乘坐飛機前往台灣。對於第一次搭飛機的我來說，其實有點緊張。
「傻瓜好緊張呀？」
「有啲，等我check清楚啲野先。」
「得啦，我幫你check過哂啦。」
我便跟妳手牽手，登上飛機了。本來想在飛機上休息一下的我，沒想到，轉眼間已經到了台灣。幾經轉折，終於來到了酒店缷下行李。
「咁我地點分房好，我地有三間房，有一間4人房，兩間雙人房。」 妳說。
「點解會咁book嘅？」濋濋問。
「因為我諗住有間大房容易啲玩。」
「都係嘅。」 呀喬說。
「咁啦，4個女仔住一間房，一間俾一對情侶瞓，一間俾兩個男仔瞓啦。」 我說。
「咁邊對情侶瞓個間雙人房？」 J me問。
「咁我地三個男仔包剪泵啦。」
「好。」妳說。
然而，我們三人圍成一圈。
「兄弟，我想變真正嘅男人，讓一讓細佬我好嘛。」 肥仔說。
「其實我冇乜所謂。」 我說。
「都係等個天決定啦。」 高佬說。
「咁我放棄啦，你兩個爭飽佢。」
然而，我便退後了一步。
「你做乜唔猜呀，唔想同我瞓咩？」 妳帶點邪惡的笑容問我。
「作為一個藝文青，我唔會講想同妳瞓呢啲咁俗套嘅說話，我只係會同妳講，我想同妳一齊起身。」 我說。
「小淇呀，呢啲叫斯文多敗類，小心啲佢呀。」濋濋亦取笑著。
「係囉，小濋講得啱，我真係要小心啲你，口花花。」
結果，肥仔運氣略勝一籌而得到跟J me 相處的私人房間。
來到台北的第一件事，便是找東西吃。我們到了一間好像有點名氣的牛肉麵店，嘗過各種美味的牛魔皇，之後便在周圍閑逛。因為今天舟車勞動，再加上台灣的天氣已踏入炎熱的盛夏，很快，大家便決定戰略性撤退。
突然，一陣敲門聲把差不多睡著的我弄醒。高佬去了開門，原來是萬分焦急的肥仔。
「師傅師傅，你要救救徒弟呀。」 肥仔說。
每次他這樣說，也是沒什麼好東西。
「妖，你又點呀？」高佬問。
「我究竟要點開始呀，師傅。」
「除哂啲衫咪得囉，洗唔洗我幫你除埋呀。」高佬氣憤道。
「唔係呀，我好似唔識點講咁呀。」肥仔就像一個媳婦，一面委屈的道。
「高佬你就咪鬼嬲佢啦，我地會轉酒店嫁嘛。仲有，古語有云，酒能亂性。」 我說。
「係喎，我而家去買，我地一齊飲啦。」肥仔眼睛一亮。
「得啦。」 高佬說。
然後，肥仔便走了，我們洗過澡，便到了大房間敲門。應門的是濋濋，她頂著濕漉漉的頭髮問著。
「做咩呀？」
「冇，你地沖哂涼未，睇下開始玩未姐。」 高佬說。
「差淇淇呀，佢而家沖緊。」
「咁我地入嚟啦。」高佬說。
「唔得，未沖哂涼入咩呀入。」 呀喬緊張的道。
「嚟啦，喬喬女神，你唔係忍心你個男神bb係門口坐下嘛。」
「唔得，男神都冇得傾。」
「嚟啦，喬喬女神。」高佬繼續係門外跟呀喬耍著花鎗。
「佢地成日都係咁嫁？」 濋濋問。
「係呀，每一日都係。好噁心呀可？」
「唔係呀，好幸福就真。」
「咁你應該對呢張相有興趣。」 然後便把之前跟淇淇偷拍的V-day相給濋濋看。
「嘩。」 濋濋看後驚訝得掩著口。
「我之前同淇淇影嫁，記住佢地係當街當巷都會咁做。」
「真係好幸福。」
「咩呀，有咩睇。」 高佬問。
「你張相。」
「咦，呢張有用，sd 俾我啦。」
「哦。」
傳送過後，高佬便在手機按了幾下。然後呀喬的手機響了。
「你再唔俾我唔入去就public嫁啦。」高佬大叫。
「你威脅佢，你都得嫁你。」
高佬為了進去還真是無所不用其極。
「當然啦，情趣嚟。佢想我入去嫁，但只是過過唔到自己個關，而張相就俾個籍口佢去說服自己。」
「犀利。」濋濋說。
此刻，淇淇終於洗完了出來。
「你地好嘈呀。」淇淇說。
「哼，你個賤人，入嚟啦。」阿喬氣鼓鼓的道。
然而，我們終於踏入了女生的閨房。進去之後，看見妳們的衣服，高佬便跟我投以一種笑淫淫的眼神。原來，晚間才是旅行的重頭戲，就像是宿營一樣。
「咦，J me佢地呢？」 妳問。
「肥仔話去便利店買啲野食野飲返嚟喎，J me 同佢一齊去掛。」
敲門聲傳來，時間剛好。
「嘩你地買左咁多野返呀。」 Pinky說。
「都唔係好多姐。」 J me說。
「最緊要係呢樣。」 肥仔拿出來時，我跟高佬才意識到闖禍了。
「嘩，你做咩買咁大支酒，仲要兩支添。」 呀喬說。
「呢支好野呀，black lable whisky。反正都唔係香港啦，駛咩咁拘束，玩番舖顛嘛，人一世唔係有好多次咁嘅機會。」 肥仔說。
「都係，反正我想試飲好耐。」 Pinky 說。
「咁有冇啲game 一路玩一路飲。」濋濋問。
「照舊啦。」 高佬望一望我說。
「嗯，好。」 我答。
「照舊？」 妳問。
「嗯，係我同高佬未識肥仔之前，姐係中三嘅時候，呢條友好鍾意好似MK 咁周街成日飲酒。而當時，我地飲到悶時會攞兵器出嚟玩住飲。」
「兵器？攞刀劍？」 肥仔問
「唔係，係道具嘅意思，而我地嘅兵器就係啤牌。而我地嘅玩法就係Truth or Dare 嘅啤牌改良版。玩之前抽大細揀一個人開始先，我地有八個人，我地攞 一對A、K、Q、J、10 、9出嚟。之後每人抽一隻，抽好之後，就作為底牌。開始嘅人可以任意揀一個人鬥大，輸嘅人可以揀飲一杯酒加做Truth or Dare，又或者飲兩杯酒當抵消，亦可以飲三杯叫贏左嘅人Truth or Dare。而打和就冇事。」 我解釋著。。
「會唔會飲得太多呀，好似好快會醉哂咁。」 濋濋說。
「咁酒減一半囉。」高佬說，然後各人和議著。
遊戲即將上演。