誰能逼我將就: Ch.51

我終於知道，墨早就已經知道那段新聞的存在。

雖然她以不慍不火的態度提問，但我仍然要小心的回答。

「我早幾日俾電話妳，就係想同妳講英琦約咗我出去。我已經同佢講清楚，我地暫時都唔會再見面。妳可以睇下段片，我…我冇掂到佢。」

「我知呀。」墨微笑著說

「但係妳唔嬲咩？」我奇怪的問，雖然我是準備了大量解釋，但墨的反應也不至於那麼平淡吧。



「你係咪覺得我好似唔識嬲你，好古怪咁？」墨問我。

「唔係…只係我覺得妳應該會有小小小小唔高興…」

墨主動的坐到我身邊，跟我並排著。雙眼一直看著前方，感覺很幽怨似的：

「睇到新聞嗰一刻係有小小嬲，所以我冇打電話俾你，直接打電話俾世伯同伯母。」

「原來係咁。」



「不過呢，好快我就冇嬲嘅感覺。我唔想因為覺得自己需要嬲，而去故意用力嬲一個人。」

墨的說話，我不能立即明白。

「即係咩？」

「即係話，我唔想嬲你…如果要大家都要嬲，我諗要計返阿朗去我屋企嗰一晚。最後我丟低咗你喺我屋企，我周圍走就係唔想阿朗搵到我，最後我去咗個朋友屋企過咗一晚。」

「我冇事。」我不想墨太自責，所以故意說成沒事。



「你點會冇事，嗰日俾阿朗打到嗰個位仲痛唔痛？」墨用手指戳戳我的面。

「咁耐喇小姐，就算爆骨都好返啦。」

「哈哈，低能仔……純，我係咪好古怪？」墨再一次問我這個問題。

「其實，可能只係妳諗法同其他女仔唔同。係呀我有事問妳，點解妳中心真係會搵阿爸做導師，呢個原因唔係我地作出嚟咋咩？」

「我同高層班老闆講，佢地覺得幾有趣咪照我意思交俾我做囉。」

「多謝妳，我見到阿爸好有自信。」

「今晚係咪食飯呀？」

「好呀。」



講座完結之後，阿爸阿媽跟我們一起晚飯。飯局中我們有說有笑，阿爸有特意感謝墨的邀請，而且他不停說著剛才上課時的情景。我知道他感覺到驕傲，我也以他為傲。

「世伯，如果你可以嘅，每個星期都可以嚟。不過車馬費唔會太多，希望你唔好介意。」墨邊為阿爸倒茶邊說。

「唔好咁講，爾墨，妳覺得世伯冇搞亂檔嘅，我日日嚟都得呀，哈哈。」

「點會呢，我地飲杯丫。」

今晚很高興，阿爸喝了一點點的酒，最後由我和阿媽送她回家。臨走之前，我在暗角處摟著墨親了一親，時間長度大約是難捨難離的一分半鐘。

「妳自己返屋企要小心呀。」

「知道喇。」



我吃力的陪著阿媽，把阿爸送回家後，第一時間便是把他放到床上。我扭扭自己兩臂，阿爸的體重真不簡單。

「純，咁我沖涼先，你睇住你阿爸先喇。」

「知喇阿媽，妳沖涼先。」

阿媽去了洗澡之後，我坐在床邊看著阿爸。我已經很久沒有試過，跟他的距離有這麼近，我看著他入睡的樣子，想起小時候我也是坐在這個位置做著同一件事的。

看著看著，我發現了一點東西。在床底附近的位置，有一個盒子，那個安放阿爸舊照片的盒子。上一次我看到那張舊報紙，我知道也會在裡面。

我站起來，走到那個盒子前面蹲下。我在想，我應不應該冒這個險，去找出那張舊報紙，將以前的事翻弄得一清二楚？