異塵餘生香港2277: 27 交易

為了替鐵膽找到醫生，流主他們跟著少女來到貓頭鷹的總部。
 
 
「你睇落唔似係政府軍，又唔似係正勢力，你係咩人？」康師傅突然問流主
 
「我只係一個普通人．．．」流主說
 
「好，咁就由你決定交易啲咩。」康師傅說
 
鷹緊張說：「吓！？．．．咪住先，我地依度五個人加一隻狗，唔係應該每人交易一次咩．．．？」




 
「再唔決定，就當你地唔做交易，唔好浪費大家時間。」康師傅說
 
「唔．．．」一時間大家也看著流主，但是他卻決定不了
 
康師傅忽然奸笑說：「你頸上面嘅係咪Bitch Kingdom嘅狗帶？我地識得拆喎。」
 
 
聽到這句話，流主頓時雙眼睜大了。他知道康師傅明顯是有意為難．．．伊甸園創造器的情報．．．MR的情報．．．鐵膽的命．．．現在還有他自己的項上人頭．．．．．．流主十分掙扎！
 




 
「再唔係，你地不如打過，死剩嘅咪可以做決定。」康師傅咄咄逼人
 
「唔．．．」鷹看著流主他們，竟然真的想拔出手槍
 
四眼也緊握著放在槍袋的手槍．．．
 
「點呀？」康師傅用一個挑釁的眼神看著他們
 
 




此時，鷹終於按捺不住拔槍，四眼也立即舉槍！然而，意想不到，他們竟然不謀而合地用槍指著康師傅！
 
 
「殺左你，我一樣可以要脅醫生幫鐵膽做手術！」鷹凌厲的眼神表明了她的決心
 
「或者威逼你將MR嘅情報交出嚟。」四眼的語氣也不像在開玩笑
 
這時，康師傅站起來，慢慢拔出配劍：「．．．睇下點。」
 
 
其他的守衛見狀也立即拔出武器，準備隨時攻擊。鷹和四眼雖然已經有死的覺悟，但是現在明顯是在自尋死路！即使殺得了康師傅，他們都必定會陪葬．．．
 
 
「．．．救鐵膽啦。」
 




流主並沒有大吼，也沒有大叫。但是這句話對大家來說卻鏗鏘有力、如雷貫耳，一息間，大家也靜下來了，緊張的氣氛也隨即冷卻下來。
 
 
「一個簡單嘅交易。」康師傅收起配劍：「無問題，費用係5,000蚊，保證佢健步如飛咁出返嚟。」說畢，守衛便把鐵膽帶走了
 
「．．．你唔會跣我地掛？」鷹質疑著
 
「我地係生意人，講嘅係信用。」康師傅笑說
 
流主向四眼道歉：「對唔住．．．我知道你需要MR嘅情報．．．但係．．．」
 
「嗯，你無做錯。比著係阿林，都會做同樣嘅決定。」四眼說
 
「多謝你地．．．」鷹垂著頭說，個性剛強直率的她想不到也有含羞答答得像個小女孩的時候
 




「得啦。」四眼也少有地笑著
 
「康師傅，鐵膽接受醫療期間，我地可唔可以喺度等？」流主問
 
「可以，你地需要嘅話，可以去東樓過一晚，守衛會安排地方比你地，不過唔會提供任何物資。另外，仲有一件事．．．」康師傅說
 
 
此時，數個守衛竟然把救了流主他們的少女帶出來押在康師傅面前！
 
 
「師傅．．．你聽我解釋．．．」少女掙扎著說
 
流主緊張起來：「康師傅，咩事捉住佢！？」
 
康師傅對少女說：「鎖匙萱，妳知妳自己做左啲咩，仲有咩好解釋？」




 
「我．．．我都係迫於無奈先．．．會出手．．．」鎖匙萱眼有淚光說
 
「係咩？咁妳救佢地，都係迫於無奈囉喎？」康師傅說
 
鷹忍不住上前問：「咪住先，你地講緊咩？佢救我地有咩問題？？」
 
四眼說：「貓頭鷹平時唔會救人唔係因為冷血，而係佢地有規定．．．成員不論任何理由，都唔可以救人．．．」
 
「有無搞撚錯！依啲係咩規定嚟！？」鷹激動地說
 
康師父說：「妳以為點解我地貓頭鷹可以生存喺戰區咁多年？除左我地有力量之外，就係因為我地能夠保持中立，絕對唔會出手幫任何人，所以先唔會有敵人。」
 
「就連自己人都唔救？」流主問
 




「成員有能力可以自衛反擊。相反，咁容易就落喺人地手上嘅成員，唔值得我地冒住會樹敵嘅風險去救，我地甚至會滅口嚟阻止情報洩漏。依啲嘢，所有成員一早已經有晒心理準備。」康師傅說
 
「哼．．．荒鳩謬。」一直沉默的孖根忍不住說
 
「師傅．．．係佢地救左我．．．我先幫返佢地架咋．．．」鎖匙萱解釋說
 
「咁妳點解釋妳為左幫佢地而射殺MR？仲有免費提供屬於組織嘅補給比佢地？妳以為我啲監察兵係盲架？」康師傅說
 
「我．．．」鎖匙萱無言以對
 
「妳唔使再諗藉口啦，規矩就係規矩。」康師傅說著，竟然把配劍架在鎖匙萱的頸上！
 
 
鎖匙萱無話可說，全身發抖、淚盈滿眶地低下頭．．．
 
這時，流主終於還是按捺不住，接受不了這個荒謬的結果。他舉起手上的雷射步槍，對著康師傅。
 
 
「．．．你都幾多管閒事個喎。」康師傅說
 
「無錯，佢係一個好鍾意管閒事嘅人。」孖根說著，也把手放在槍袋上
 
康師傅說：「哼，我知妳係邊個，雙槍神射手痴孖根。」
 
四眼也舉槍說：「咁你仲唔放人？」鷹也立即跟著舉槍
 
「你地唔好傻啦！」鎖匙萱哭著說：「你地得幾個人，唔係貓頭鷹嘅對手架！」
 
流主堅定地說：「起碼都拎走佢條命。」
 
「．．．．．．哼．．．哈哈哈。」康師傅收起配劍說：「算啦，用你地依班郁下都用槍指住人嘅卒仔換我條命，點計都唔化算。鎖匙萱唔係情報科嘅人，知道嘅嘢唔多．．．今次，就唔殺妳。」
 
「師傅．．．」鎖匙萱鬆了口氣
 
「不過，活罪難饒。從即刻起，妳唔再係我地貓頭鷹嘅成員。」康師傅說
 
 
鎖匙萱默默低下頭，她自知能撿回小命已經非常難得，因此也不敢再多話。她把刻有貓頭鷹標記的項鍊脫下來放在地上，便獨個兒悄悄離開．．．
 
 
康師傅說：「你地唔使擔心，我做生意好均真。一件事還一件事，你地可以喺度等你地朋友做完手術先走。」
 
 
康師傅說完便在守衛護送下鬆容離開。
 
 
「我想去搵鎖匙萱．．．佢係因為我先會搞成咁．．．．．．」流主說
 
「．．．我．．．想留低等鐵膽．．．」鷹有點不好意思地說
 
「對唔住，我諗我都同唔到你一齊去啦。」四眼說：「我小隊得返我一個，MR嘅資料又唔多，我想聽日再同貓頭鷹交涉下。」
 
「咁好啦，多謝你地．．．無你地，我諗我已經死左．．．好開心識到你地。我地．．．有緣再見。」流主笑說，四眼和鷹也報以一個友好的微笑
 
 
雖然流主和他們只是相識了半天，但已經一起出生入死、共渡了多過難關，感覺有如數載．．．流主帶著不捨而又戒備的心情，和孖根及狗肉沿路慢慢離開貓頭鷹的基地．．．