異塵餘生香港2277: 36 Bitch Kingdom
流主他們離開地下排污設施回到九龍灣，仰頭看看，天色已經黑茫茫一片了。
「哎呀！我地嘅英雄返嚟啦！」原來電子民早已經在城門前等候了
「好嘢！！」十數個居民也跑出來竭誠歡迎流主他們凱旋歸來
流主問：「變種蛇嘅情況點呀？」
電子民雀躍地說：「你地喺排污設施做左啲咩？啲變種蛇突然間好似恐慌咁亂咁走，我地即刻一路追住佢地，用噴火槍殺呀、殺呀．．．幾鬼過癮呀！我地仲．．．」
流主插話說：「我地喺排污設施度搵到背後操控變種蛇嘅元兇。」
電子民說：「咁就好啦！宜家啲變種蛇自己走晒，即係你地已經殺左個兇手啦！我地真係唔知可以點樣多謝你地．．．．．．嗱，咁，喺九龍灣住幾晚，食咩玩咩入我數！買嘢比折．．．」
「唔使啦。」流主說：「你嘅好意我地心領啦，既然啲變種蛇已經走晒，即係東邊嘅通道已經安全，我地想盡快趕路。」
電子民說：「但係宜家天黑囉喎！廢土夜晚好鬼危險架．．．計我話呢，你地喺度過一晚，我拎幾支正嘢過嚟同你地啤啤佢！唔怕話你知呀，我自己收埋唔少私伙嘢．．．」
「我地真係要走啦．．．多謝你。」流主點一點頭便轉身離開
電子民馬上追上前：「呃．．．咁．．．咁你地收左依隻全息磁片佢啦！佢係我地工程師寫，專係比守衛機械人用嘅驅動程式，裡面有大量唔同種類嘅專業工作數據。例如煮嘢食啦、建築啦、裁縫啦、畫畫啦、唱歌啦、講棟篤笑啦、甚至當性玩．．．」
「得架啦．．．多謝。」流主不勝其煩，接過全息磁片便拂袖而去
流主他們買了些少補給便離開九龍灣，連更徹夜向東面的Bitch Kingdom出發。沿途，他們都俯首默言，連平常開朗活潑的鎖匙萱都顯得意志消沉。
狗肉好像懂得大家的心思，一直憂心忡忡，垂下耳朵低鳴：「嗚．．．．．．」
孖根摸摸狗肉的額頭說：「唔使擔心，佢地未睇得開啫。」
鎖匙萱忍不住問：「孖孖妳唔會覺得難受咩？個電子民．．．連一句都唔問下便便去左邊．．．」
孖根答：「便利先生只係一部機械人，而且九龍灣仲有幾十部便利先生。何必為左一件死物感到難受？」
鎖匙萱說：「但係．．．我地咁樣犧牲便便．．．唔係好殘忍咩？佢．．．佢唔想死架．．．」
「便利先生唔想死，係因為佢個AI設定左佢嘅性格係咁，而唔係佢自己有乜嘢欲望。」孖根說
「但係．．．」鎖匙萱垂下頭顱：「佢唔係自願去死．．．仲要犧牲左都無人多謝佢．．．記得佢．．．唔通因為佢唔係人類，就注定要為左人類而犧牲？．．．咁樣太殘忍．．．」
孖根問：「咁當時妳有無其他方法？」
鎖匙萱沒有回答。
孖根續問：「九龍灣嘅居民同一部便利先生，妳犧牲邊樣？」
鎖匙萱無言以對。
孖根說：「妳殺過幾多人？幾多生命？唔通佢地又係自願去死？啲動物係自願比妳食？咁樣又唔殘忍咩？」
鎖匙萱沉默下來。
孖根說：「一物生，就自然有一物死。唔係唔殺生或者唔犧牲其他生命就等於珍惜生命，應死嘅始終都要死，何況只係一部機械人。製造機械人嘅目的，就係代替人類去做一啲危險嘅工作。」
即使鎖匙萱盡量禁住眼淚，但聲音也已經沙啞起來：「咁樣．．．唔係好可悲咩？為左自己．．．去犧牲其他生命．．．」
「無錯，係好可悲。」孖根說：「所以我地要更加珍惜生命。」
「．．．點先係珍惜生命？」鎖匙萱問
孖根說：「唔好濫殺無辜。但係如果真係有原因要殺，就要令佢死得值得，死得有意義，咁就唔會死得無辜。妳要殺死一隻動物去維持自己嘅生命，妳就盡量用盡佢嘅一切，少少都唔好浪費。除左珍惜其他生命，亦要好好咁珍惜自己，如果自己有咩事，妳對唔得對住成千上萬比自己食左落肚嘅生命？」
鎖匙萱少有地沉思了一會，然後說：「所以我地連夜趕路，如果流主頸上嘅炸彈爆左，便便就死得無辜？」
孖根說：「聰明女。」
一直保持沉默的流主突然說：「．．．我只係因為認同蛇小姐對人類嘅睇法，所以先有啲悶悶不樂啫。」
孖根笑說：「咁你不如加入食屍鬼嘅行列啦。」
流主也笑著回答：「哈．．．．．．比我考慮下。」
他們沿著公路向東走，終於在數小時後到達目的地了。
孖根凝重地問：「流主，你真係肯定要入去？你知班BK係咩人嚟。」
流主點一點頭：「．．．嗯。」
Bitch Kingdom，一個女權主義的極端武裝組織，大本營位於香港廢土的東邊。她以一所醫院為中心建設，外圍以荊棘鐵絲網和大量棄置車輛作城牆。由於附近地勢空曠並無任何高樓大廈，因此這個基地在戰略上有著十分的優勢。
流主他們雖然清楚Bitch Kingdom 的手段和作風，但是被載上了搖控炸彈的流主，根本沒有任何選擇的空間，只能硬著頭皮，送羊入虎口。果然，才剛走近城門，已經有數個載著粉紅面具的BK手持武器出來迎接。
其中一個BK有點驚訝說：「哇．．．你地知唔知依度係咩地方呀？」
流主有點緊張地回答：「我知，依度係Bitch Kingdom呀嘛。」
BK說：「咁你地都仲嚟．．．？你都幾大膽喎。」
流主說：「．．．我地係嚟希望妳地可以幫我拆左條狗帶炸彈．．．」
BK們看了一眼流主頸項上的狗帶，然後竊笑了一下說：「嘻．．．無問題，我幫你地帶路。」
於是，流主他們便跟著BK進入大本營。
鎖匙萱悄悄說：「又會咁順灘嘅．．．仲諗住佢地實會留難我地或者趕我地走添．．．」
孖根說：「我都有啲意外，佢地竟然無一見到我地就開槍，反而同我地講嘢．．．」
流主說：「可能佢地好似U記咁．．．唔係見人就殺掛．．．」
在大本營裡，所有的BK都沒有載著面具，而且衣著都很輕便，有的甚至沒有怎麼穿著衣服．．．她們都圍著火堆，跛立箕坐地吹煙把酒、喧嘩笙歌，女性的矜持蕩然無存．．．然而，每當在她們身旁經過，她們都會對著流主他們投以奇怪又詭異的目光．．．
流主不禁冷汗直流：「我．．．．．．係咪比人視姦緊．．．」
鎖匙萱說：「我第一次聽到咁荒謬嘅笑話而笑唔出．．．」
引路的BK說：「前面就係啦。」