雖然流主成功恢復了記憶,可是伊甸園創造器卻被MR搶走,連鐵膽也慘被虐殺了...
 
 
「鷹...」流主搭著鷹的肩膀說:「我唔會叫妳節哀順變...但我會應承妳...一定會要MR血債血償!」
 
 
從四眼口中得知,原來他已經查到了MR的大本營就在戰區的北方、隔在一座高山後的一個戰前鐵路車廠裡。於是,為了一報鐵膽之仇,也為了奪回伊甸園創造器,他們決定馬上動身趕路。
 
 
「離開左戰區之後,我就一直跟蹤住MR嘅活動。然後得知佢地會喺貨櫃碼頭一帶有行動,所以我就跟左過去。當時我有見到正勢力嘅船,但係就無見到鐵膽...之後我匿埋靜靜觀察,直到佢地有個拎住白色金屬工事包嘅人離開,我就潛入去睇下嗰度係咩地方。結果,就撞到你地。」四眼憶述說




 
流主懊惱說:「咁即係佢地已經拎走左伊甸園創造器...」
 
阿寶不解問道:「但係MR要伊甸園創造器嚟做咩?佢地應該連伊甸園創造器係咩嚟都唔知個喎...」
 
「點都好啦,總之一定要剿滅MR,搶返伊甸園創造器。」流主續問四眼:「...你真係肯同我地一齊行動?」
 
四眼點一點頭:「嗯。雖然我唔係正勢力,但係我地目標一致都係想對付MR,而且鐵膽、鷹同你地都係我朋友,我唔覺得一齊行動有咩問題。」「況且...都唔係第一次啦。」他續說
 
 




由於天色已晚,天氣也因為踏入冬季而愈來愈寒冷,流主他們即使心急如焚,也只有停下腳步,在路上隨便找個地方渡過寒夜。
 
 
鎖匙萱說:「依頭近戰區,我怕怕會有其他人埋伏,我去附近巡巡先。」說著,她便獨個兒離開了
 
「淨係佢一個會唔會太危險呀...?」四眼有點擔心
 
孖根卻說:「...我地跟埋去反而會拖累佢。」
 
 




流主他們躲在山邊一個隱匿的小木屋裡...在眾人都在裡面休息的時候,不需要怎麼休息的孖根則獨個兒在屋外抽煙。
 
 
「啊?咩原來妳食煙嘅咩?」剛好走出屋外的流主有點意外地問
 
「間唔中啦,通常都係你地瞓晒覺我先食,所以你地唔覺啫。」孖根抽了一口煙續問:「你呢?唔瞓覺走出嚟做咩?」
 
流主嘆道:「唉...我有啲嘢諗唔通...」
 
孖根沒有說話,只是默默看著流主表示自己正在聆聽。
 
「...其實我講左個大話...」流主坐在孖根旁邊說
 
「......繼續。」孖根愣了一愣,她好像對流主說謊感到有點意外
 




流主苦惱說:「...我都唔知算唔算有心講大話,因為當時...個情況唔適合講個真相出嚟...」
 
孖根抽了一口煙說:「...你覺得啫。」
 
流主沉默下來,呆呆看著遠方靜思...
 
孖根續說:「不過你唔好話我知你講左啲咩大話。」
 
流主不解:「...點解呀?」
 
「我唔想優先知道你嘅秘密,如果你當大家係一家人,特別係鎖匙萱同阿寶,你就應該當面同大家講。」孖根說
 
「但係依件事事關重大...好難開口...」流主無奈說
 
孖根抽了一口煙,然後把煙蒂掉在地上,用腳把它踏熄:「愈難開口嘅嘢...通常都愈需要盡快開口。」




 
 
鎖匙萱圍繞在小木屋的附近小心翼翼地巡邏,確認四周的情況,避免被任何敵人埋伏偷襲。她爬到一輛翻倒了的棄置貨車上,眺望著附近的環境...
 
果然,她的憂慮是正確的,距離小木屋的不遠處正有十數個人影正慢慢向流主他們接近...她馬上用望遠鏡看過去...
 
 
「弊弊...」鎖匙萱一看,不禁大呼不妙
 
 
鎖匙萱看到的並不是MR或土匪...而是帶著多足怪的超級變種人!她嚇得馬上蹲下來,再繼續用望遠鏡觀察...那些超級變種人都持槍步步為營地前進,而且方向非常明確...也就是說流主他們的位置已經曝光了!!
 
 
「唔得啦...要快快返去通知佢地!」鎖匙萱汗顏說
 




 
她從貨車上跳下來,便馬上飛快地溜回去,不消片刻便已經回到去小木屋的位置。然而,那些超級變種人也剛好在同一時間抵達!鎖匙萱只有暫時躲在草叢裡...
 
 
「超級變種人!?」在屋外的流主十分愕然
 
「哼...」孖根一時間也束手無策,一兩個超級變種人還好...十數個的話,根本就沒有勝算
 
 
流主他們都無計可施,只有和小屋裡的大家一起束手就擒...
 
 
鷹疑問:「鎖匙萱呢?佢唔係去巡邏嘅咩?」
 
孖根說:「可能已經比佢地捉左。」




 
「但係又唔見佢喺度喎...」阿寶察看著,但並未發現超級變種人有捉住了鎖匙萱或任何人的跡象
 
「咁即係佢走甩左...」流主苦笑說:「我地只要撐住,佢一定好快會返嚟救我地。」
 
此時,一個較高大的超級變種人走向流主說:「終於搵到你啦!喺戰區比你好彩走甩左...今次絕對唔會!」
 
阿寶一臉無奈:「流主...你地到底得罪左幾多人?」
 
高大的超級變種人笑說:「哈哈,五個人,可以食兩三日啦!」說罷,他猛力一腳踢向流主,把他踢得倒地上吐出鮮血,續說:「就由你開始食先!伙計,營火!」
 
 
高大的超級變種人一聲令下,其他人便開始四處搜集可以生火的東西。
 
 
「死啦死啦...一定要快快救佢地......但係得我一個...」鎖匙萱十分焦急
 
 
這時,跟隨著超級變種人的多足怪好像發現了鎖匙萱的動靜,更開始慢慢向她的方向爬過去!
 
 
「弊弊弊弊...」鎖匙萱立即稍稍後退,嘗試隱藏自己身影
 
「啊!係妳!」一把又厚又低沉的聲音突然從後傳來,把鎖匙萱嚇得彈跳了一下!她回頭看過去...竟然有一個超級變種人不知何時跑到她的背後來!
 
超級變種人續說:「妳...妳認唔認得我呀?」
 
「...吓??」鎖匙萱一頭霧水
 
他微笑說:「我地喺戰區見過面架...我仲放左妳地走...」
 
「...啊!」鎖匙萱想起來了:「你就係嗰個奇怪嘅超級變種人!」
 
「妳記得就好啦...」說著,這個超級變種人居然尷尬起來...
 
鎖匙萱不禁呆了一呆,然後回神說:「咁...咁就啱啱啦!你可唔可以叫你啲朋友放左我啲朋友呀??」
 
他面露難色:「唔...佢地唔會聽我講架...」
 
「我求求你啦!試下同佢地傾傾先啦...」鎖匙萱苦苦哀求
 
「但係...」他十分為難
 
「試試啦...佢地係你朋友,又點會唔聽你講呢!」
 
「...係嘅咩?」
 
「緊係啦!試左未必得得,但係唔試一定唔得得!」
 
「......咁我試下啦...」
 
 
說畢,這個奇怪的變種人果真直刺刺地走到他的同伴前...
 
 
高大的超級變種人看到他便問:「...豆?做咩呀?」
 
奇怪的超級變種人摸摸頭說:「首領...可唔可以放左佢地呀...?」
 
超級變種人首領聞言即皺眉頭說:「你痴線架?你自己唔鍾意食人就唔該你自己企埋一二邊食甴曱食樹皮,唔好煩住晒!!」
 
奇怪的超級變種人垂頭喪氣:「啊......」
 
 
豈料,這個奇怪的超級變種人居然就這樣毫不忌諱地向鎖匙萱匿藏的位置走過去,其他的超級變種人也大感奇怪...
 
 
然後他對躲起來的鎖匙萱說:「首領話唔得呀...妳都係快啲走啦...比佢地發現就無命架啦...」
 
 
此言一出,現場的超級變種人和流主他們統統都呆住了...當中最不懂得如何反應的...當然是鎖匙萱...
 
 
「人...人類!仲有人類呀!捉住佢!!」超級變種人首領大喝
 
 
首領一聲令下,所有的超級變種人都向鎖匙萱一湧而上!鎖匙萱見行蹤已經曝光,便只有放手一搏,拔槍攻擊!然而,以她的衝鋒槍根本就傷不了他們一根汗毛...
 
 
其中一個超級變種人笑說:「哈哈哈!妳啲BB彈邊傷得到我地架!!」說著,他便高舉手中的鐵棒追擊鎖匙萱
 
「哇哇!!」鎖匙萱面對圍攻只能勉強地左閃右避,情況驚險萬分
 
然而,奇怪的超級變種人卻一臉無奈說:「唔好傷害佢呀...」
 
 
可是,面對如此數量的超級變種人,鎖匙萱身手再好,終究還是不慎被捉住了...
 
 
「哈哈!小妹妹,幾好身手喎!」捉住了鎖匙萱的超級變種人一手抓住她的雙腿,把她倒吊起來
 
「放開我呀!!」鎖匙萱馬上用衝鋒槍向超級變種人開火,不過一如預料都被他用手擋住了...
 
「哼!仲反抗!」超級變種人突然發怒,一拳向鎖匙萱打過去!