異塵餘生香港2277: 78 證據不足

到達了欣澳的流主他們，得知近日原來發生了人類謀殺食屍鬼的謀殺案，為了查清真相，他們便來到鄉土找已被拘捕但堅稱自己是無辜的疑犯一問究竟．．．
 
流主問：「咁妳有無見到係咩人殺死嗰幾個食屍鬼守衛？」
 
女人惶恐說：「當時．．．根本就無其他人．．．」
 
發哥上前搭話說：「雖然妳係咁講，但係表面證據上妳幾乎十成九係兇手，包括射殺守衛嘅子彈同妳當時手上嘅手槍型號一樣，甚至支手槍射出左嘅子彈數量同射殺守衛嘅子彈數量亦都吻合。」
 
女人萬般無奈：「我真係無殺人架！」
 




「．．．有邊個證明到妳唔係講大話？」發哥問
 
「我．．．我真係無講大話架！」女人哭說
 
流主問發哥：「我地可唔可以都去貨倉度睇下？」
 
「．．．可以，不過都只係浪費時間，如果嗰度真係有嘢可以證明佢係無辜，我地一早都已經搵到。」發哥說
 
流主想了一下說：「．．．話唔埋嘅。」
 




 
於是，他們又再跟著發哥來到案發的貨倉一看究竟。不過由於天色已黑，發哥先行離開了。
 
流主他們分頭行事，在貨倉的四周尋找線索．．．
 
 
「．．．咩都搵唔到。」阿寶使用手電筒照看著每個角落
 
豆摸摸頭說：「．．．我依邊都無．．．」
 




鎖匙萱惆悵起來：「會唔會．．．真係個女人講大話．．．」
 
流主使用嗶嗶小子的照明燈觀察著貨倉的牆壁：「．．．睇嚟嗰幾個食屍鬼守衛當時係有反擊．．．根據牆上嘅子彈窿．．．佢地應該係用自動步槍。」
 
鎖匙萱驚訝：「咁都睇得出！？點睇架？教我教我！」
 
流主解釋說：「啲子彈窿嘅大細同深度都好接近，而且每個子彈窿嘅距離都一樣，證明當時有人嘗試追住一個會郁嘅見標掃射。另外，子彈窿嘅方向好混亂，代表當時人可能好驚，亦有可能當時人唔係好睇得清楚個目標．．．可能目標嘅身手好敏捷好快，快到根本睇唔清。」
 
阿寶搭話說：「咁即係個女人唔係兇手。」
 
鎖匙萱不解問：「點解嘅？」
 
阿寶說：「好明顯啫，一個女人點可能喺槍林彈雨下，百發百中咁殺死幾個食屍鬼守衛而自己唔受傷？」
 
鎖匙萱說：「孖孖咪得囉，你唔比人地真係咁勁勁嘅咩？」




 
阿寶不耐煩說：「咁妳覺得幾個食屍鬼守衛夠唔夠制服到孖根？」
 
鎖匙萱想了一想說：「．．．咁肯肯定唔夠啦！但係關咩事？」
 
阿寶一臉無奈：「無嘢啦，返屋企訓覺啦妳。」
 
「咩．．．咩喎！」鎖匙萱不忿得鼓起臉頰，向孖根撒起嬌來：「孖孖呀！寶寶又蝦我呀！」
 
孖根一手按住鎖匙萱的額頭說：「咁即係當時真係有另一個兇手喺度。」
 
「但係係邊個做呢？咩人可以有咁嘅身手呢？動機又係咩呢？」流主思考著
 
阿寶說：「如果搵唔到另一個合理疑犯．．．純粹靠我地嘅推斷應該唔足以證明個女人係清白。起碼班食屍鬼唔會接受。」
 




豆擔心說：「咁．．．佢地係咪會處決個女人架．．．」
 
「係係喎．．．佢地會幾時處決個女人呀？我地仲有幾多時間呀？」鎖匙萱問
 
流主說：「宜家都諗唔到啲咩架啦，我地去旅館休息一下，聽朝一早再去搵發哥啦。」
 
眾人皆沒有異議。
 
「狗肉，走啦。」流主呼喚狗肉
 
「汪！汪！」狗肉搖擺著尾巴高興地從貨倉跑出來
 
「哇！」鎖匙萱發現狗肉滿嘴邊都黏滿了黏答答的透明液體：「你做咩亂食食呀？？仲搞到成個嘴嘴都係！」
 
孖根看著狗肉嘴上的液體，好像想到了甚麼．．．




 
「汪！汪！」狗肉雖然被責罵，但還是高興得追著鎖匙萱跑
 
「走開呀！污嘴狗！」鎖匙萱不斷走避
 
 
可惜，一切並不如流主他們的預期．．．第二天的早上，打算找發哥討論謀殺事件的流主他們，赫見欣澳的居民和鄉土的食屍鬼都聚集在鄉土的城門前．．．
 
 
發哥站在城門前一個臨時搭建的的台上，用揚聲器說：「依個人類女人，因為謀殺左幾個食屍鬼守衛，宜家正式公開處決。」
 
 
只見那個無辜的女人被綑綁著手腳，無助地跪在地上哭泣．．．圍觀的食屍鬼群眾不斷高聲叫罵，「人類信唔過」「恩將仇報」「可恥」等謾罵說話此起彼落。相反人類那邊則大感無奈，更有部份人類表示與殺害食屍鬼的疑兇劃清界線。但其中，最心痛欲絕的，當然是那個女人的母親．．．
 
 




老婆婆哭得聲嘶力竭死去活來：「我個女真係無辜架．．．我求下你地啦．．．你地要殺就殺我．．．放過我個女啦．．．」她甚至更跪在地上向發哥磕頭
 
「對唔住，殺人填命，天公地道。」發哥說著便用手槍指著女人的後腦
 
就在發哥要扣下扳機之際，流主他們剛好趕到：「槍下留人！！」
 
「流主！」看到流主他們出現，程天和老婆婆喜見一絲希望
 
「佢係無辜架！放左佢啦！」流主上前說
 
發哥略感意外：「．．．你地搵到證據？」
 
流主說：「其實諗下都知啦，一個普通女人，又點可能殺得死幾個食屍鬼守衛？」
 
發哥問：「咁你有無啲咩更加實在嘅證據？你所講嘅只不過係你嘅推測。」
 
「係就係推測．．．」流主確實並未掌握更實在的有力證據
 
「．．．無證據嘅話，我都愛莫能助啦。」發哥再次想扣下扳機
 
「有有有！！」流主焦急起來，只有孤注一擲，用謊話嘗試先阻止處決：「係．．．係隱形裝甲！」
 
發哥聞言頓即愣了一下：「．．．證據呢？」
 
流主看到發哥的反應，心知已經成功唬住他：「只有當時有另一個兇手，先解得通成件事。而最有可能就係隱形裝甲，因為．．．」
 
「．．．咁即係無證據啦。」發哥說畢，竟突然扣下扳機，毫不猶豫一槍把女人的頭顱打穿！！
 
 
由於事情發生得太突然，眾人都在一息間被愣怔住了．．．甚至是圍觀的人類和食屍鬼也大感意外。看著自己無辜的女兒頭顱被打穿，老婆婆哭成淚人，她蹣跚地走上前，抱著自己一生中最寶貴的女兒仰天痛哭．．．老婆婆滿手鮮血，待女兒的屍首如一個小女孩般溫柔地輕撫著她那已經被子彃打出了一個大洞的臉頰．．．抖動的嘴巴幽幽地說著來不及說的話．．．然後緊緊把女兒抱入懷內．．．失聲哭叫．．．
 
即使是食屍鬼，尚有一顆憐憫的心的他們，看到此情此景也感於心不忍．．．莫說是其他圍觀的人類．．．特別是走在最前的流主．．．．．．然而，他卻看到一個使他勃然大怒的畫面．．．
 
發哥他．．．竟然咧嘴笑了！！！雖然只有一瞬間，但他確實是笑了！！！！