異塵餘生香港2277: 81 仇恨的終結

事情發展飛快，上百個食屍鬼守衛在發哥和食屍鬼之父的帶領下手持重裝備，把欣澳重重包圍，更揚言要攻打欣澳．．．．．．就在千鈞一髮際．．．
 
 
「戇鳩。」阿寶突然說
 
此言一出，眾人也都目瞪口呆，不知應該如何反應．．．特別是發哥．．．
 
阿寶續說：「聽流主講話你係孖根嘅好朋友，仲以為一定係啲咩不得了嘅人物，原來都係一條戇鳩仔。」
 
「你話我戇鳩！？」發哥火冒三丈，更舉槍指著阿寶




 
「大話都唔識講，你話你戇唔戇鳩？」阿寶毫不忌諱說：「孖根如果真係去行刺食屍鬼之父，又點會無啦啦炸左你間屋？你同食屍鬼之父一齊住嘅咩？」
 
「呃．．．．．．」發哥一時間無言以對
 
阿寶乘勝追擊：「即係唔係話唔比你講大話呀，但係你可唔可以認真少少講，唔好咁求其呢？」
 
發哥惱羞成怒：「我就殺左你先！」
 
「殺我即係我無講錯啦。」阿寶立刻說




 
「你．．．」發哥反應不來
 
阿寶知道已經控制了情況，續開始借機諷刺其他食屍鬼：「你唔尊重自己個腦，都尊重下人地個腦啦！係你啲所謂兄弟姊妹先咁蠢會信晒你講嘢。」
 
其他食屍鬼果然都激動起來：「我地．．．我地幾時有信晒佢呀！我地係講證據！」「我地先無咁蠢！」「唔．．．唔使你講，我地都知有古怪啦！」「嗱發哥．．．唔係話唔撐你呀，但係你真係要解釋下．．．」
 
「大家冷靜啲先．．．」發哥被群眾你一言我一語的問得不知所措
 
乞丐看來也是聰明人，他趁亂走出來指證說：「其實之前欣澳醫院有輻射單嘢都係佢搞出嚟架！我親眼睇住依條仆街痴舊嘢喺醫院入面，之後醫院就開始有輻射啦！」




 
「唔係掛！？」「係真唔係呀．．．」「咁講法話唔定啲瘟疫都關佢事喎．．．」「使唔使咁無良呀．．．」人類那邊也開始鼓譟
 
「哼．．．乞兒講嘢你地都好信！」發哥焦急起來，只有出言中傷對手
 
流主放聲責罵：「根本成件事都係你一手一腳搞出嚟！你用隱形裝甲暗殺其他食屍鬼，之後再嫁禍比欣澳嘅居民，目的就係想挑起民憤，激發其他食屍鬼同食屍鬼之父出兵剷除欣澳！！」
 
「哼！無證無據，你話我識飛都得架啦！我有咩理由要剷除欣澳？？」發哥齒口否認
 
「理由只得一個！就係你對你老婆嘅死仍然懷恨在心！！你夠膽當住咁多鄉土嘅兄弟姊妹面前唔認咩！？」流主指著發哥說
 
食屍鬼之父開始懷疑：「發哥，你真係要好好解釋。」
 
「老豆你唔好聽佢地講！」發哥垂死掙扎：「我．．．我係有懷恨在心，但係依班人類係抵死架！！」
 




鎖匙萱也搭嘴說：「咁即係你認認啦！」
 
「我．．．」發哥仍然死撐：「我懷恨在心唔等於我會殺死鄉土嘅兄弟姊妹同陷害欣澳嘅居民！！」
 
「夠啦！！！」就在情況混亂，發哥死不承認之時，孖根終於按捺不住
 
一向沉著鎮定的孖根竟然也會如此大吼，這使得流主等人甚至是食屍鬼之父和發哥也呆住了．．．
 
「你唔好再狡辯啦．．．回頭是岸呀．．．」孖根勸說
 
「我．．．」發哥想了一想，突然又面目猙獰說：「哼！妳唔好扮好人啦！妳都係想氹我，等我認我講大話咋嘛！！我係唔會中計架！！」
 
阿寶一臉無奈說：「邊有食屍鬼咁蠢架．．．」
 
「唉．．．」孖根搖頭嘆息，然後拿出一台手提錄音裝置：「我開頭都唔想．．．但係最後我都信左鎖匙萱，帶埋部錄音機先潛入你度．．．．．．估唔到真係用得著．．．」




 
「妳．．．！」發哥臉色驟變
 
 
隨著孖根按下手提錄音裝置的重播按鈕，發哥與孖根的對話和打鬥的聲音，以及剷除欣澳的陰謀都頓時曝光。不只是欣澳的居民，就連鄉土的食屍鬼們也大感難以置信，平日正氣凜然的發哥，居然會做出這種事．．．
 
 
食屍鬼之父說：「發哥，你仲有咩說話好講？」
 
「你．．．你收聲！！」發哥突然發難：「你依個老嘢又做過啲咩？？幾十年嚟我都一直忍氣吞聲，當日我地死左幾多兄弟姊妹你記唔記得呀！！我地啲兄弟姊妹點樣比人類虐待你又記唔記得呀！！你唔單只無幫我地爭返口氣，仲笑笑口咁同佢地結盟！你作為大家嘅領袖，你除左人地講乜就信乜之外，仲有做過啲咩呀！」
 
食屍鬼之父聞言大怒：「我就係你講乜我都信所以先做錯！守衛！！」
 
 
豈料，守衛們還未及反應，發哥居然舉起他的霰彈槍打算近距離向食屍鬼之父開槍！反應快如閃電的孖根馬上拔槍開火試圖阻止，她雙管齊下，以雙槍同時向發哥的霰彈槍和發哥的頭顱射擊！兩顆子彈風馳電制地從天使.50的槍管飛彈出去，嘗試趕在不堪設想的結果出現前擊中目標！！




 
時間彷彿又再一次停頓下來，抱著滿腔仇恨的發哥被子彈貫穿了腦袋，他的霰彈槍也在同一時間被打飛．．．．．．而食屍鬼之父的半邊腦袋，卻比一切早了千分之一秒被轟掉．．．
 
孖根的反應並沒有趕上命運，要死的，還是活不過來。看著食屍鬼之父緩緩倒下，她只能無力地上前抱著他．．．
 
 
只剩下半張臉的食屍鬼之父，嘴巴抖動虛弱地說：「．．．發哥．．．無講錯．．．．．．我咩都無做過．．．如果唔係．．．．．．就唔會．．．發生今日嘅事．．．」
 
孖根眉頭深鎖：「佢只係比仇恨蒙蔽左，所以先睇唔到你為鄉土所做嘅其他嘢．．．」
 
食屍鬼之父沒有回應，一臉懊悔地死去．．．．．．
 
 
事件過後，鄉土和欣澳冰釋前嫌，更決定維持同盟關係，並意外地大比數通過由天程以兩地共同生活、和平共處為目標，暫代管理鄉土的事務。而流主也得到了天程和食屍鬼們的承諾，在正勢力與賤黨的戰爭中，全力協助流主。
 




 
「唉．．．估唔到會發生啲咁嘅事．．．結果你地今次嚟，我都無得好好咁招待你地．．．」天程嘆道
 
「唔緊要啦，依啲嘢無人想嘅．．．」流主說
 
「咁你地宜家就起程返去正勢力總部呀？」天程問
 
「未呀，我地仲要去多個地方．．．我地需要一個掌握大量情報嘅組織支援我地。」流主說