異塵餘生香港2277: 86 撕裂

流主他們來到貓頭鷹的基地，向康師傅提出請求。可惜，如眾人所預期，康師傅斷然拒絕營救雪絨．．．然而，鎖匙萱這次卻站出來質疑康師傅！
 
 
鎖匙萱說：「師傅你以為咁樣真係對個組織好好咩？」
 
康師傅嘲諷：「區區一個被踢出組織嘅低級成員，憑咩質疑我嘅管治方針？」
 
「就係憑我係一個低級嘅成員！」鎖匙萱沉不住氣說：「就係因為我低級，所以我成日都走喺最前線，亦所以我先見到下面戰區最真真嘅一面！」
 
康師傅瞪著鎖匙萱說：「妳意思係話我根本咩都唔知？」




 
「係！」鎖匙萱反應更加激烈：你一直都只係離地觀察，根本無落過去親眼睇睇實況，你又能夠知道啲咩？？你以為只要唔得罪人地，人地就唔會搞我地，咁樣就係中庸、中立、高人一等．．．但係事實唔係係囉！人地根本只係當貓頭鷹係打不還手罵不還口嘅無膽匪類咋！！」
 
康師傅說：「只要保護到組織，我地無必要理人地點樣睇我地。我地貓頭鷹能夠成為唯一一個可以喺戰區屹立不倒嘅組織，就已經証明左我地嘅實力。」
 
「依個只係你一廂情願嘅膚淺想法咋！貓頭鷹到宜家都無事，唔係因為我地嘅實力，而係人地根本懶懶得對付我地，因為佢地知道即使對貓頭鷹嘅成員做啲咩，個組織都只會保持沉默！！」鎖匙萱激動說
 
「我唔在乎人地係咩原因，總之保護到貓頭鷹唔會受襲，就證明我一直以嚟與世無爭嘅方法係正確！」康師傅語氣強硬
 
孖根忍不住問說：「哼，你保護到貓頭鷹？你保護到嘅唔係依個組織，而只係依個地方。你依啲亦唔係與世無爭，係比人踩到上心口都唔識反抗。」




 
流主也搭話說：「真正嘅與世無爭，係你唔會傷害人地嘅同時，亦都唔會比人傷害自己。」
 
康師傅不屑說：「你地依啲好似好有道理嘅空話，有邊個唔識講？但係現實係如果有其他組織真係大軍襲擊我地，我地分分鐘連宜家有嘅嘢都無埋。」
 
「所以你明知應該救都唔救？」孖根說：「就係因為你有啲咁懦弱嘅諗法，人地先會踩上你心口。依一秒你唔幫身邊嘅人出聲，因為你以為唔關自己事，到下一秒都你有事嘅時候，你就會發現已經無得再出聲。」
 
鎖匙萱眼神堅定地說：「真正保護到大家同依個地方嘅方法，就係話比所有人知道，我地係一啲都唔好蝦！！」
 
康師傅想了一下，說：「．．．．．．宜家對方係政府軍，無力量同咁大個組織對抗，你就算講得再好聽，都只不過係廢話。」




 
流主說：「就係因為係政府軍，先更加要出手，話比所有人知，如果夠膽搞貓頭鷹，就算係政府軍都無面比！」
 
「你應該都知道政府軍嘅真正身份係乜嘢，你應該都知道佢地有幾強大。」康師傅說
 
「你應該都知道正勢力打算同殘黨開戰。」流主說
 
康師傅冷道：「你以為憑正勢力就可以對付到殘黨咩？」
 
「當然唔可以。」流主說：「所以我已經說服左Bitch Kingdom，鄉土、甚至係U記同幾個城鎮，喺戰爭入面加入我地依一邊。事實上，我地都希望可以得到你地嘅幫助。」
 
「你意思係我可以放心反抗殘黨？」康師傅突然咧嘴笑問：「我做生意習慣清清楚楚。流主，我想問你．．．其實正勢力同殘黨嘅戰爭．．．你係企邊一邊？」
 
康師傅此言一出，眾人也頓時愣怔住了．．．
 




康師傅續說：「你所提及嘅組織同城鎮，都只係話會喺戰爭中企喺你嗰邊，從來都無人話過會幫正勢力．．．所以我想知道，究竟你嘅立場係乜嘢。」
 
阿寶插話說：「流主係黃金小子，佢當然係幫正勢力啦！」
 
「啊？係咩？」康師傅露出一個陰險的笑容：「流主，咩你原來一直都呃住佢地架？」
 
鎖匙萱不解：「師傅．．．你講緊咩．．．？」
 
「我仲以為佢實會對你地坦白添．．．仲枉你地為左佢出生入死．．．．．．流主根本就唔係黃金小子，佢嘅真正身份係200年前政府派去黃金力量嘅間諜。」康師傅說
 
「咩話！？」眾人聞言也為之震驚，尤其是屬於正勢力的阿寶
 
孖根說：「你真係以為我地會信你？」
 
阿寶質疑說：「咪係，200前．．．仲要係咁秘密嘅嘢，你點解會知？」




 
康師傅笑說：「司徒寶，你作為正勢力嘅科學家，居然會唔知道電腦係會將重組左嘅記憶備份？．．．啊，定係你知道，不過呃住大家呀？好似你將大家嘅戰鬥數據同基因都偷偷備份晒喺正勢力嘅主電腦咁．．．」
 
阿寶一時間說不出話來：「我．．．我唔係．．．」
 
「咪住先．．．」流主問：「你係點樣得到依啲情報？？依啲嘢全部都係喺戰區外面發生個喎！」
 
「我地貓頭鷹一向都有派資深嘅成員出廢土探索，從來都無人話過我地淨係留喺戰區。」康師傅裝出一個意外的表情：「鎖匙萱，人地咁好心收留妳，妳做咩唔話比佢地呀．．．妳有無話埋比佢地知妳好鍾意偷嘢呀？」
 
「我．．．貓頭鷹有邊個唔偷嘢架！搵搵嚟講！」鎖匙萱反駁
 
「咁即係妳唔否認啦？原來妳除左偷嘢，仲鍾意呃身邊嘅人．．．」度師傅笑說
 
「我．．．我無呃佢地．．．」鎖匙萱一時不知如何招架
 




孖根說：「我相信佢地唔會呃對方，大家都只係無機會講啫。」
 
「好似妳一早知道欣澳有個著住隱形裝甲嘅人出現都唔出聲咁？」康師傅囂張地瞪著孖根說：「如果妳一早講左出嚟，可能就唔會有咁多人死，食屍鬼之父亦都可能仲在生，妳真係辜負左大家對妳嘅信任。」
 
孖根一時間也語塞起來．．．
 
阿寶接著打破沉默：「．．．流主，你真係政府嘅間諜？」
 
流主猶豫了一下，嘆道：「．．．．．．係，我的確係政府嘅間諜．．．但係依啲已經係200年前嘅事．．．」
 
「．．．我點知你宜家係咪仲係幫緊政府？」阿寶質問
 
「如果我係幫政府，就唔會同你地一齊保護金鐘啦！」流主自辯說
 
阿寶反駁：「當時你都仲未重組記憶，所以你唔知自己係間諜．．．宜家諗返，你一有返記憶，搵到伊甸園創造器，MR就出現將佢搶走．．．有無咁啱呀？」




 
孖根插話說：「阿寶，你唔好唔記得流主都有份剿滅MR。」
 
「係呀，但係個伊甸園創造器已經喺殘黨手上呢！」阿寶瞪著流主說：「可能你根本就係去殺人滅口，毀滅證據！」
 
鎖匙萱也搭話說：「咁寶寶你自己呢？你將我地啲戰鬥數據同基因比晒正勢力，但係無話比我地知．．．你究竟要依啲嘢嚟做咩？？係咪有一日要用依啲資料嚟對付我地？？」
 
阿寶愣了一下：「．．．啲資料只係備份，仲會用嚟做咩？？我地點會對付妳地呀！」
 
孖根說：「正勢力一個咁大規模嘅武裝組織，你唔係想話佢地拎埋咁多數據只係要嚟儲掛？」
 
「唔．．．」阿寶咬牙切齒：「咁妳呢？？妳明知有隱形人喺欣澳出現又唔講，我地差啲就死晒喺發哥手上啦！！啊．．．定係妳一早知道佢就係兇手，妳其實同佢有啲咩關係，所以就呃埋我地呀！」
 
孖根大感受到冒犯，而且回想起傷心的事，頓火冒三丈：「係我親手殺死佢架！！！」