錯的感覺對的人: Vol.7

影樓上。

Bryan 同 亞雅都同樣眼定定望住亞穎，雖然大家心態完全唔同。

亞穎見到兩人，主動咁打招呼。

亞穎向亞雅打個招呼：”叫我……亞穎得啦……今次多多指教，你男朋友？好靚仔喎~”

Bryan 心諗大鑊，咁好機會，亞雅實認做自己女朋友，等佢無得溝亞穎，點知亞雅：”唔係呀……佢係……我亞哥……唔係唔係……我朋友……總知好難解釋比你知啦~係亞穎面前亞雅就覺得自己就好似小妹妹咁。



亞穎轉向Bryan，Bryan 即係道：”你好呀，我係Bryan”

亞穎：”呀，有無中文名呀？？我覺得叫中文名親切d。”

“咁……你叫我亞朗得啦。”連Bryan，都覺得自己好似細路一樣。

下午，一點，影樓中。

亞雅換上較高貴既服飾，眾人哇然，連Bryan 今次有 d 反應啦。



亞雅其實好驚，緊係啦，第一次比人影。

跟手，亞穎出0黎，今次無人叫，但個個目定口呆。

Bryan 今鋪真係有反應啦，心諗：”去選港姐，殺晒，真可以同李嘉欣鬧得難分難解……”

亞雅見到 Bryan 個樣，個心係極唔舒服，從前亞雅唔會有妒忌既感覺，呢刻……總知個心非常唔舒服係啦。

亞穎見到亞雅唔自然，就同攝影師講：”攝影師呀~~比三個字時間我地0丫……我拍擋唔係好慣。”



有時靚女真係大晒，咁樣delay人都可以？而且今鋪仲要兩個靚女，攝影師等三個鐘都可以。

幕後。

亞穎好友善咁問亞雅：”唔慣？？？”

亞雅點頭。

亞穎：”嗯……你咁樣一定唔收貨0架喎。”

亞雅：”但係我真係有d慌……連笑都好似唔係好識…”

亞穎：”但係上到0黎，set晒0野，你依家唔得都要試下。不如咁啦…我教你…唔好諗其他野…諗下你近排發生過而又最開心既事，自己到咁擺下post轉下圈，咁就可以令其他人好似唔存在咁…應該會好d。”

亞雅點頭，個樣好似輕鬆0左，跟住佢好奇問：”亞穎呀……點解你好似好累咁0既？”



亞穎說：”係呀……返五日半，成日加班，返埋 partime model 呢~~個人係幾累0架”

亞雅：”點解要咁辛苦呀？？？”

亞穎終於露出友善之外既另一種表情，甜蜜：”嗯……想同男朋友快d搬出0黎住呀嘛……趁我依家個樣仲值少少錢，咪努力0下咯。”

亞雅終於明白，點解同亞穎年紀只差兩三年，但好似咁大分別。

根本係連活著既目標都不同。

亞穎佢搵到自己既幸福，但自己終日都諗緊點整蠱 Bryan。

自己細路女，唔怪得之係佢面前會自卑。



亞雅廿一年來第一次問自己目標何在。

三個字之後，攝影師都覺得好奇怪，點解亞雅改變0左咁多？過程好順利，好快就完成工作。

工作後，更衣室。

亞雅：”我好似見過你0架~~~但唔見得係邊~~~~”

亞穎：”係………”

亞雅：”我記得啦………係大酒館既合照，同一個叫亞鋒既男仔！！”

亞穎突然有點黯然，喃喃自語：”原來…仲係到……”

亞雅：”乜仲係到？你男朋友唔係亞鋒咩？”



亞穎回神過來：”sorry 呀………要走啦……比個電話你，得閒搵我0丫……”

跟手大家就散去…亞雅依舊好奇怪，點解亞穎變得咁突然。

整個硬照廣告，非常順利。

廣告中，亞雅穿上高貴既晚裝，幻想住Christmas Party既一晚。

諗住係一個好浪漫既地方，同 Bryan 係到慢舞。

原本只係亞穎提供既一種方法，但完全比0左亞雅第二種感覺。

佢變得自然，係因為佢完全沉醉0左係自己既幻想之中，唔記得有其他人，或者，只係記得一個人。



好奇怪，點解只係幻想，就咁開心？？

而亞雅，就係0個一日，映0左佢人生第一張極美既硬照。

開始走進佢人生既另一個新階段。
 
 

有人說過，戀愛是精神多於肉體，你愛他，就等如他精神上佔有了你。
就算他是你的戀人與否，也可以精神複製另一個他，繼續和他談戀愛。

<待續>
故事全屬虛構~
如有雷同~實屬巧合~