時近黃昏,Kitty再次返回瑪嘉烈醫院,來到Coral的病房門前 


"咦!!係郭大師? " Sally見到Kitty再度開門步進,大感驚訝 

"我同呢個女仔總算有緣,佢醒左妳代我交呢樣野俾佢啦" Kitty從袋中取出一黑色小葫蘆交予Sally 

"呢樣係..." Sally放在手中細意檢視 

"佢本身係黑曜石,我見呢位小姐不時發惡夢,睡不安寧,帶左黑曜石除左有助睡眠,易d進入夢鄉之外,仲可以吸病氣和濁氣,預防負能量向自己埋身,同埋避邪化煞,唔好運既人帶左仲可以轉運。 " Kitty細說其功效 





"咁真係幾啱佢...." Sally無奈望向熟睡Coral " 如果唔係醫生開左鎮靜劑要佢多d休息,呢幾日係咁有妖怪要殺佢,真係怕佢接受唔到驚嚇,精神崩潰都似..." 

"Madam唔介意我問句..." Kitty借意探問 "妳係咪自細就見到靈異野呀,我覺得妳同普通人唔同...." 

"郭大師真係犀利...." Sally直認不諱 " 我自細就見到靈體,果陣成日唔舒服,又嘔又起雞皮,好辛苦,爹地媽咪同我求神問卜,中西醫睇過都冇用,咁啱1990年弘法聖尊黎香港做法會,媽咪帶我去求醫,我即時皈依,聖尊俾左句口訣我,話持續咁唸就會慢慢好番..." 

"口訣? 咩口訣 介唔介意話俾我知呀...." Kitty再加以查問 

"唔介意...." Sally大方唸誦 "天與地之靈,日與月之精,山與河之氣,人與物之情,上天下地賜我無窮力量,高山流水助我濟世為懷 " 





"~聖尊傳佢天地人心訣?~" Kitty心中暗暗驚嘆 

"其實睇到都唔係一件好事...." Sally感慨道來 " 大多數都係愁眉苦臉,滿肚冤屈,初時我話俾同學知我見到咩,同學唔信之餘仲當我怪物,係咁排斥我,爹地於是送我去外國讀書,同埋我自己收歛左唔再講,先至可以完成學業..." 

"不過唔係妳有呢種能力,都保護唔到佢...." Kitty自覺不便再追問,於是轉身離去 

"我走喇....有緣再見啦!!" 

"放心啦,我會交個葫蘆俾佢架喇...拜拜!!" Sally笑面相送 







"~你唔係上次已經接受超渡投左胎咩? 點解仲未走?~"房門關後,Kitty以靈覺傳話正殘留靈體 

"~Coral仲有危險,我唔放心走~" 原來靈體正是John 

"~人鬼殊途,佢既安全自然有人負責,唔好再執迷不悟喇~" Kitty不願John仍浮游塵世 

"~唔得!! 我唔可以掉低Coral唔理!!~ "John一意孤行,無視勸告 

"~你知唔知你圍繞佢身邊,令佢陰氣增加,夢不安寧,再係咁佢身心都會受到傷害,你忍心見到佢咁咩~? Kitty痛陳利害,望John收手
 
"~Coral就快會返去,到時我先可以放心,希望大師成全~ " John再三哀求 





"~咁好啦...如果佢離開香港你仲唔死心,到時休怪我無情用縛靈索縛你去見轉輪聖王~" Kitty被其真誠打動,故網開一面 

"~多謝大師成全!!~" John隨即隱去 

"唉....." Kitty不禁輕嘆,亦緩步離開醫院
 
 
 
入夜時分,愉景灣山上別墅內,木美剛到達書房向鮑文方匯報今日試探小咪詳情.... 


"估唔到妖女藉淫慾殺人,結果因淫慾而冇再害人...." 鮑文方聽過詳情後嘖嘖稱奇 

"呢d正係諸法無我,以八萬四千法門普渡眾生....." 木美顯得無奈 " 只係我唔知應唔應該勸佢放棄,始終人魔有別,唔會有咩好結果,對雙方都係傷害..." 





"如果佢一意孤行,相信冇人可以勸到佢...." 金美從其觀顏辨色技倆中得知 "我之後暗中觀察小咪同木美會面情形,從佢神情可以肯定完全為左果個Alan先上我地當,佢用情真係好深...." 

"如果佢早d同果個Alan一齊,個宅男就唔駛變左乾屍啦..." 土美顯得有點無奈 

"頭先好似講過小咪會不惜一切保護果個Alan....即係意味住...." 水美作出假設 " 如果妖孽用Alan作為要脅,小咪迫於無奈都要奉命行事,會去醫院殺人滅口...." 

"雖然小咪之前殺左人,但係我而家竟然開始有d同情佢..唔想同佢打..."土美對自己身為俠客竟有如此想法感到莫名其妙 

"冇人希望想再同佢打...." 火美步進書房 " 既然佢有心置身事外,我地可以先妖孽一步,暗中保護Alan,令佢無後顧之憂..." 

"火美意思係我地表露身份同佢傾? 會唔會冒險左d呢.." 金美似有疑慮 

"唔通佢會呃到觀察入微既金美咩?" 火美微笑向金美打了個眼色 

"我都覺得小咪本質唔壞....火美,有冇辦法可以令佢脫離魔道,變返普通人?" 木美一心想渡小咪脫離魔障 





"咁就要先知道佢既來歷喇...." 火美盤膝而坐,入定出神.....