有一晚一個來電: 熱戀中的暑假(上)
沿途一路同大家步行去玩過山車既期間，
四周圍既空氣中，都被小朋友既聲音所劃破，
充斥著，他們天真，純情，簡單與真誠既歡笑聲。
小朋友，就是那麼容易滿足。
眼見到唔同一家大小一齊黎玩，望著那媽媽拖著孩童小手的身影，
望著那爸爸將小女孩放上膊頭，即使我既家，冇可能係咁，
我都可以感受到，他們家庭既溫馨，父母對子女既溺愛。
海洋公園，真是一個小朋友既天堂。
行到半路既途中，我見到一個大型既建築係度修葺興趣緊，
我就問：咦！原來仲有野起緊喎，
唔知係咩機動遊戲黎架咩？
阿紫：阿樂，你唔知咩，
呢個係越礦飛車黎架，
遲ｄ將會成為海洋公園第二個過山車遊戲。
Ａｍｙ：起係呢度呀，好似好危險咁喎。
阿欣：睇落應該會刺激過原本個過山車好多喎。
等起好我地再黎挑戰下囉。
唔知道，起好果時，我同阿紫會唔會一齊再黎呢。
行到差唔多，我已經開始見到過山車既路軌既輪廓。
隨之而來既係，一遍遍始起彼落既尖叫聲。
第一次見到咁大型既機動遊戲巖立係眼前，
聽到那一卡卡車狠狠地從高空急逐直下並與路軌發出猛烈摩擦既聲音，
我都不禁吞吞口水。
我：喂喂！你睇下果度，過山車行到去果個圈圈時候，
成架車同人會返轉左架喎，咁樣會唔會跌落黎架．．．．．
阿欣：哈哈，你驚呀！？
有安全帶架麻．．．．
我：係姐，我驚我太瘦，個安全帶夾唔實我，我就咁跌落黎咪死得。
ａｍｙ咁既身型就話冇問題姐，一定夾實晒！
Ａｍｙ：阿樂你咁婆媽架，係驚咪認囉。
唔玩既就去買定mcdonald等我地啦！
阿力：阿樂咪生人唔生膽啦，你睇下咁多人玩都無事！
阿紫走一走埋黎，同我講：阿樂，你唔駛驚喎，
我陪你，有咩事我都會係你身邊架！
哈，我竟然要比阿紫安慰返轉頭。既然一場黎到，無玩過過山車等於
無去過海洋公園姐！雖然我係有d淆，但唔撚理啦！
於是我地就排隊玩啦，
我就同阿紫一齊坐既，上到去等左好一陣。
安全帶終於牢牢地落下，我老死都check下實唔實啦，
點知又幾實。
我：阿紫，你實唔實呀？
阿紫點點頭，原來佢都有點緊張。
我：唔駛驚，好快可以返返落去架啦，我都會陪住你架。
阿紫：阿樂，你係咪真係冇問題架，
我仲係好擔心你．．．一陣病發點算呀。
我：點會呀，我每次見到你，
我個心都咁甜，佢會乖乖地聽話唔發作架啦，
因為佢都唔想你擔心呀麻。
阿紫聽到我咁講，先好開懷咁望住我笑，放心下來。
跟住，卡車就開始開動，
徐徐咁，沿住車軌上斜，一路聽住滾輪拉動既聲音，
一路望住車軌盡頭，個心開始加速咁跳，原來等死既過程都好緊張。
我望到差唔多上完斜，就同阿紫講．．
我：阿紫．．我地就沖落去啦．．．．．．呀．．．．．．．．．！！！！
！！！！！！！！！！！！！！！！！！！！！！！！！！！！！！！
啦都未講完，就已經衝左落去，果下離心力真係嚇到我仆街，
因為加速度既關係，卡車落去落得好快，然後卡車好快咁跟住軌道
左右亂竄，力道大到我個頭係咁撞落個安全帶倒，fing到甩一頭咁濟。
衝衝下終於衝到高空旋轉位，
好彩，倒頭過下咩事都冇。
玩完出黎之後，心跳都算快平復返，
為左保險起見都係搵ｄ靜態少少既野緩衝下先。
我：哇頂！頭先差ｄfing到甩頭，我感覺自己撞左好多次頭，
而家撞到暈暈地。
阿紫：哈哈，你冇事呀麻，我幫你捽下。（然後阿紫就輕輕摸摸我個頭）
阿力：玩左咁耐都肚餓架啦，不如食下野，行下抖陣再玩啦。
阿欣：好啦，阿樂你冇咩事呀可？
我：冇事冇事，我仲生歐歐，行啦。
原來係海洋公園度食野係咁撚貴，
屌佢真係唔撚抵，下次都係帶野黎食好過。
食完野之後，我地就四周圍觀光下，
睇下水族館，海洋劇場等等。
然後，我地就諗住去住摩天輪，
欣賞下風景，天氣咁好，唔好晒左佢阿麻。
諗到我地果時，
阿力就話：喂喂Amy識做少少啦，
有佢地兩個一架啦，我地三個等下一個車廂，
唔好阻住人地呀麻。
頂你阿力，估唔到你都幾識做架喎。
於是，我同阿紫就雙雙咁坐住摩天輪啦。
摩天輪上升得好緩慢，我同阿紫就一路望住外面既景色。
眼見慢慢咁，從高空望落去，見到好多人群既身影，
有大人，有小孩，有老人家。
我：你睇下，周圍ｄ人都玩得好開心呀可。
阿紫：咁你呢，你玩得開唔開心呀。
我：當然開心啦，有你陪住，
如果可以日日都見住你就好啦。
阿紫就挨左過黎我膊頭度，話：傻佬，而家咪見緊囉。
我地兩個，就一齊咁，見證住摩天輪登到最高點果一刻，
見證住海洋公園環海最美麗景色。
就好比我同阿紫既愛情，都已經漸漸上到高峰，
踏入熱戀既階段，見證著愛情最璀璨的一剎那。
我同阿紫講：阿紫，ｄ風景真係好靚．．．
因為我坐近窗口位，阿紫要將個身挨一挨過黎先望得清楚。
阿紫：係喎，真係好靚。
果一刻，我不禁錫左阿紫面豬一啖。（我仲係未夠膽錫阿紫個咀）
阿紫就紅紅地，話：阿樂，你咁鬼馬架！
雖然，我地只係身處於一個狹小既車廂入面
但正正因為空間感細，安全感亦大左，
空氣中所瀰漫住既幸福味道，我亦可以輕易咁嚐到。
高峰過後，車廂亦漸漸回落至低處。
幸福摩天輪，也是，有高，有低的吧．．．．
果一刻，我只期盼著，
我同阿紫既愛，
我同阿紫既熱戀階段，
唔好咁快回落就好。
落返地面之後，我地就去玩最後一站－滑浪飛船。
滑浪飛船其實當時我見到果一刻都幾新鮮，
因為見人地沖落黎果下水花四濺，一定好刺激。
講真濕身我又唔係好介意，黎得玩就預住放架啦。
不過．．．
阿紫：阿樂，唔好意思呀，
呢次我睇你地玩算啦。
我：點解既？
阿紫：我見會整濕個身，
女仔黎講我始於唔係咁方便．．．．．
阿紫咁講一講，其實我都好明白，
如果女仔件衫濕晒，一黎可能會容易惹病，
二黎海洋公園咁多人，眾目睽睽下咁濕法始終唔係咁好。
於是，我：你都講得岩既，
咁你係度等我地啦，唔好走開左呀知麻，
我地好快玩完架啦。
我考慮到阿欣都係女仔．．我：阿欣，你係女仔玩呢ｄ
會唔會唔係幾好？
阿欣好爽快咁話：唔會呀，我冇咩所謂，加上我又想玩呀麻。
既然佢都咁講．．．．．
我：咁好啦，你同amy一架，我同阿力一架啦。
點知阿欣話：我想同你一架喎！
我有點摸不著頭腦，問：點解呀．．．
你唔會係有咩陰謀呀
阿欣：車！我先唔似得你，
我鍾意點揀我既事啦，架車又唔係你一個坐晒。
（哎呀！而家又咁串呀）
阿力：下．．咁咪我要同ａｍｙ一齊．．
同佢坐會唔會反艇架．．
Ａｍｙ：阿力，你試下咪知囉，
放心，你一定會變成落湯雞先準落船架。
阿力：阿樂你要救我呀
我：哈哈，你就將就下啦！
眨下眼就過去架啦。
於是，我就同阿欣一架，去玩滑浪飛船。
起初既時候，滑浪飛船既節奏都好慢．．．
上一輪長命斜咁．．．於是，我地途中都吹下水。
我：你睇我幾好，我專登坐前面，
費事一陣你濕晒係度賴我！
阿欣：車！駛鬼你對我咁好！
我：哼，終於露出你既真面目啦咩！
阿欣：哈，慘得過佢地信我呀，點呀？
我：今次算你好彩，下次實拆穿你！
阿欣：我好驚囉．．
阿欣繼續話：阿樂．．你同阿紫佢．．
都相處得幾好咁喎。
我：係呀，我地幾恩愛架。
做咩．．唔抵得！？
然後佢好大力拍我背脊：我先唔會唔抵得你呀！！
架船遊左咁耐花園，終於到戲玉啦！
就快落斜！
阿欣：阿樂，我一陣可唔可以捉實你．．
落斜我有ｄ驚．．．．
我：哈，唔似你喎，
認低威呀！
阿欣：認你個頭呀，比唔比呀！！
我：好啦好啦．．
比次機會你啦。
阿欣：車，懶係寶咁！
係飛船落車果一刻，
阿欣佢又捉實我，變成攬住我條腰，
我亦感受到佢個頭伏左係我背上．．．
落斜已經夠刺激，
阿欣佢忽然呢種行為．．．再繼而令我心跳加速．．
果一下有一種通電既感覺．．．
沖到落水果下，水花真係幾大，
我個頭都濕埋．．．不過真係幾過癮
落船之後，我即刻問阿欣：點呀，你有冇濕呀．．
然後即刻比左張紙巾佢。
我望下佢．．好彩都唔係好濕．．
因為我仲應過佢．．但佢就面紅紅。
我：喂！無料呀你，玩呢ｄ野都會面紅既，
刺激過度呀？
阿欣：紅你個頭呀！！抹下你個死樣先啦。
係喎，濕左梗要抹下。無耐，amy同阿力都落黎。
阿力冇咩事，ａｍｙ反而濕過佢。
我：哈哈，ａｍｙ你都有今日啦。
ａｍｙ：死啦你，快ｄ拎張紙巾黎啦！
我地同阿紫會合返之後，都係時候答車走。
今次呢個海洋公園，
無論阿欣同ａｍｙ阿力，
我同阿紫，又或者我同阿欣都好，
大家都玩得好開心，好融洽。
奇怪既就係，我居然有一下通電感覺，係出現係阿欣身上。
其實，去完果次海洋公園都已經七月尾，
踏入八月，暑假只係剩返一個月，阿紫亦已經搬左去新屋居住。
我同阿紫，得返一個月可以時時見面，
返左學之後，大家可能已經會各有各忙，要見面就更加難。
話明係熱戀期，我地都會好好把握一齊相處既機會。
有一日，阿紫打電話同我講。
阿紫：阿樂，之前你生日呢，我係咪整左ｄ曲奇比你食既？
我：係呀，阿紫你既手勢真係一流，而家諗返起都想再食。
阿紫：咁岩啦，我話過以後會整甜品比你食架麻，
近排咁得閒，不如大家一齊整甜品囉。
我：好呀，咁我一定有口福啦！！
但係邊度整呀？我屋企冇工具架喎！
阿紫：阿樂．．
不如黎我屋企整啦。（佢怕怕醜醜咁講）
阿紫．．竟然會主動邀請我去佢屋企．．
我上女仔屋企既經驗真係唔多，上次阿欣係朋友就話姐．．
今次．．係以男女朋友既身分．．
加上係阿紫，我就更加緊張。
我：你肯定冇問題？
我驚阻住你屋企人呀。
阿紫：傻佬，我梗係等我屋企人出晒去先叫你黎啦。
心諗，哦！咁都好ｄ．．．
見到佢地屋企人既話，我既壓力指數一定會爆晒燈。
一陣比佢地屋企人發現我地拍緊拖．．．咁咪．．．
點睇都好似要冒好大個險咁．．
但係，我真係好想同阿紫一齊整野食．．．
我：咁整咩食好呀？
阿紫：Um...不如整芝士蛋糕呀？
我：好提議，我鍾意就係食芝士蛋糕架啦！
但你搬左新屋．．
我唔識黎喎．．你近邊頭架．．
阿紫就講左個地址比我知道，
但我完全唔知道係邊．．．．．
新界果頭我又點會熟呢．．
我繼續問：咁答咩車可以黎呢度呀？
阿紫：呢層．．我唔係好清楚呀，
我出去都係媽咪車我既。
阿紫屋企．．．原來有私家車嗎．．．
出去都係媽咪接送，唔怪得唔知道有咩車可以去到啦．．
對比起我呢ｄ答公共交通工具多既人，
我就知道．．．我根本冇得同阿紫相提並論。
我：咁．．唔緊要啦．．
我自己上網search下點黎啦．．
應該冇問題既．．．
阿紫：對唔住呀阿樂，
要麻煩你走黎走去．．我又住得遠．．．
我：冇所謂．．可以見到你既話．．
幾麻煩我都願意架。
阿紫：咁好啦，我買定材料，
到時我會整得好好味去報答你架。
我：好啦，咁我去search下先啦，
遲ｄ再搵你啦！
其實search左之後，大概都知道點去既．．
不過好似幾遠下．．
阿紫過左幾日之後，同我講，話今日佢媽咪會出去．．
所以就提議我今日去佢屋企整蛋糕。
咁我當然冇問題啦．．．
阿紫佢話會係門口接我。
於是，我就出去坐巴士過去，
因為火車都冇可能去到佢果邊．．．
一路坐巴士，一路留意新界既景色．．
的確係比九龍冇咁密集．．
高樓大廈都冇咁多．．
但因為答去果度都要個幾鐘．．
我就更加要集中精神去留意每一個站．．．
不過．．我真係唔識路．．
最終．．．
頂！點解會咁．．．車到我去左總站添．．．
咁次仆街啦．．
我直覺上覺得呢架車應該係答錯．．．
因為我記得睇地圖，個地方都唔係咁既．．
阿紫住果度係半山黎．．
但我總站果度就係市區．．．
睇返隻錶．．頂．．遲大到．．
比起預定時間已經遲左１５分鐘。
於是我就開始急．．．
因為我又冇手提．．我唔想阿紫係度呆等咁耐。
咁我惟有答的士啦．．
同的士大佬講左邊度邊度．．．
然後就車我去．．
今次應該實無死冇去錯啦掛．．
架車就黎駛到阿紫屋企既時候．．
係路口處．．我已經見到阿紫等緊我．．
心諗：唉．．佢一定等左好耐啦．．
都怪我唔好．．
我記得係答左三十幾四十蚊，
落左綠色的士之後，
我就拿拿林跑過去阿紫度啦，唉，佢一定企係度等左好耐啦．．．
其實佢身後，仲有一個人既，應該係菲傭黎啦．．
想必是連工人都唔放心阿紫自己落黎，所以陪住佢吧。
我：阿紫，阿紫．．．
唔好意思呀真係，我答錯車．．
已經盡量答返的士趕黎架啦．．好彩都唔算係差好遠．．．
對唔住呀。
阿紫走一走埋黎，佢今日著左件紮身既小背心（天口真係熱）
同埋一條有短短地既牛仔裙，加一對黑色拖鞋。
右手拎住銀包同一部白色既手提電話。
唔駛問，佢行緊過黎果時，我已經扯左。
（我認！我意志力果時非常薄弱！
咁又點！？呢ｄ先係激進份子既表現！）
阿紫行到埋黎時，我又聞到佢果浸體香．．．真係官能刺激樣樣有，
差在未有味覺可以品嚐同觸覺可以摸下。
阿紫微笑住咁話：阿樂唔緊要架，
我都知呢度有ｄ偏僻架啦，
我就係知你可能會答錯車，又冇帶手提電話，
所以我唔敢走開呀．．
我唔介意遲到．．我只係怕你蕩失路咋．．
你擔心死我啦知唔知呀。
阿紫佢，竟然唔怕係度曬住．．（雖然有樹好遮蔭）
但佢萬事都係為我著想先，真係好體貼．．
同時，我對佢個傭人say左個hi。
阿紫同佢傭人互望左一下，佢地都微微咁笑住。
果種眼神交流，應該係話比佢傭人知：呢個就係我男朋友啦。
一路同佢地行既時候，我望望周圍既景色。
其實環景好明顯係半山黎，但唔係村屋。
人煙非常稀少，基本上唔係住呢度既，都冇可能特登過到黎果隻。
住宅亦隔得好開，答的士上黎既途中見到幾座富貴級既私人大廈，
而且樓層都唔係好高．．．．．．
唔怪得知．．．阿紫出入都要私家車啦．．
呢度連巴士經過都少之有少．．．
咁我蕩失路．．都好正常姐。
我地沿少少斜路上去阿紫度，
呢刻我仲未見到阿紫既居所，因為斜路盡頭要再轉彎上既．．
係呢個時候．．．
阿紫佢講左一句．．．好驚人既說話，令我無所適從。
行緊上去既時候．．
阿紫同我講：阿樂．．．
我媽咪仲係屋企未出去喎．．．
我即刻卻步，個心真係差ｄ跌埋出黎咁濟．．．
唔係掛．．佢媽咪係度．．咁見到我咪．．．．
我好緊張咁問：下．．咁．．咁點算呀？
阿紫：對唔住呀，
其實我都好想通知你一聲架啦，
等你有心理準備，但你已經出左門口。
呢一刻，我點失落咁講：咁．．咁我．．
駛唔駛返去先呀．．．
你媽咪見到我．．唔係咁好．．
阿紫：唔駛啦傻佬．．
我已經同媽咪講左你會黎。
我即刻好大反應（阿紫你有咩想嚇我就一次過啦．．
我唔受得好大刺激架）
我：下．．．．你同你媽咪講左．．我地既關係．．？？
阿紫：傻佬．．
梗係唔係啦．．
我話有暑假作業唔識做．．
想請同學過黎教一教我咁囉。
一陣佢會出去架啦．．
我地扮做住功課先啦。
阿紫佢，咁乖女，竟然會為左我，講一個小小既大話。
雖然係善意既謊言．．．．但我始終覺得有點唔好意思。
沿斜路轉彎之後，映入眼簾既．．．
係一道好高大而華麗既閘門，主要係比私家車出入既。
我地就去旁邊果道小閘門入．．．
好彩阿紫落黎接我．．．如果唔係我呢ｄ得閒之輩．．
根本冇可能過到保安果關入去到。
入到去之後．．冇記錯只係得四至五幢我諗八至十層樓高既
富貴級私人住宅．．．（阿紫係最入果幢）
沿路我都冇出過聲．．．
應該係話，我係比呢類住所既氣勢懾住左．．．
我有幾可會步足呢ｄ富豪住宅呢．．．
唉．．．．．
沿路經過既，有會所，私人泳池，私人網球場等等．．
阿紫話：阿樂，我地遲ｄ可以係度打羽毛球喎。
咁咪唔駛去公共果度book場囉。
呢度少d人打，我地玩幾耐都得啦。
我：都好喎，搵機會再打呀。（應該說，再有機會比我，先再算吧．．）
阿紫佢住幾多樓我就唔講啦．．．
入到阿紫既層數，嗯，係一梯兩伙而已。
果然．．．呢類住宅係貴精不貴多．．．．．．
除時佢地兩伙加埋既月租，
已經等於我公屋果度一整個樓層既月租．．．．
真係夠晒痴撚線！
傭人拎起鎖匙準備開門入，
果時我個心真係跳得好急（我未食藥）
加上就黎會見到佢媽咪，我真係緊張到唔識形容．．
咔吒的一聲，門終於打開了．．．．．
門打開，迎面飄黎既係淡淡既木香。
我呆住左咁望住阿紫屋企既隔局．．．．
客廳．．．兩個字形容：好大。
我諗相等於，一個五人住既公屋單位既客廳大小，再乘以兩至三倍倒。
阿紫客廳既裝潢有點古典的味道，傢俬陳設同地板大多都係用深棕色既
木去打造。
大型既電視櫥櫃坐落住一部大型既plasma電視（果時岩岩推出無耐）。
客廳落地玻璃係對住個海景。
玻璃窗幕前放左一部按摩椅，正正對著海。（我幾鍾意坐係果度望住個海）
開門入黎後右手邊係廚房，廚房入面係雜物房。
廚房旁邊係工人房。
簡簡單單講左阿紫家既格局之後．．
我果刻其實仲未見到佢媽咪．．．．
終於，我正前方既門打開．．
佢媽咪．．出現了。
果時我真係有點慌忙．．
我連忙同阿紫媽咪打聲招呼：Auntie您好。
阿紫媽咪輕輕，語氣隱約帶點冷淡道：你好。
阿紫媽咪同阿紫講：呢位就係你同學？
阿紫：係呀，佢叫阿樂呀。
氣氛好壓抑，好凝重，
我感覺到我心口有點唔舒服。
阿紫媽咪依然有點冷冷地，
問我：聽講，你成績係學校算唔錯喎係麻！
阿紫話，你拎全級第二。
我輕輕點點頭，我：嗯．．
只係好彩架姐．．
阿紫媽咪：呢ｄ野冇話好彩唔好彩既，有能力就係有能力，
點都好，自己比心機吧！
我：嗯，我會架啦．．．
我跟住細細聲同阿紫講：阿紫．．．可唔可以倒杯水比我．．
我未食藥．．．
阿紫聽到，即刻入去廚房倒杯水比我。
我仲係成碌木咁企係原地唔咁郁。
阿紫媽咪：坐吧，
唔駛企係度啦。
坐低左之後．．阿紫倒完杯水出黎比我．．
其實我唔想係屋企面前食，但真係冇辦法。
阿紫媽咪：你唔舒服？
阿紫即刻幫我解話：係呀，佢有少少感冒姐，
已經好返七七八八架啦。
阿紫媽咪對阿紫講：嗯。
咁我差唔多出去啦，
做完野好離開啦知麻？
阿紫點點頭。
然後，佢就帶左我入房．．．．．
頭先係出面見住阿紫果時仲扯緊旗，
見到佢媽咪之後，旗都扯唔起，應該話連碌野都嚇得鳩縮。
心諗：你係咪咁撚無用，頭先先充當激進份子，
而家竟然向惡勢力低頭！？好！罰你一個星期冇得射精！以警效尤！
我同阿紫，就沿住頭先阿紫媽咪出黎果道門入去，
其實係一條通道黎，阿紫間房係盡頭尾二果間。
阿紫打開佢自己房門之後，
入到去．．．．
基本上成間房，都係充滿住阿紫體香果種香味。
正前方係書台，右手邊係張床同部鋼琴，
左手邊係書櫃同衣櫃。
裝潢依然以一貫古典木為主。
之後，阿紫就閂埋房門，
然後係我後面，用雙手答住我膊頭咁，
係後面推住我，一路講：你頭先真係好緊張喎。
然後我就坐低左係一張凳度，阿紫就坐左係床度。
大家互相對住大家咁坐。
因為阿紫坐係度既關係，條牛仔裙又有點窄，
所以坐住既時候，條裙亦會相對縮短左少少．．．．
我見到阿紫雪白又光滑既腳同大脾．．．
我又扯左．．頂！你真係唔爭氣！而家先抬返起頭做人！遲唔遲ｄ！
我視線移返去阿紫個面比較好。
我：係呀．．．真係完全無心理準備呀麻．．
希望冇咩失禮啦．．
阿紫：嘻，阿樂你點會失禮呢。
阿紫繼續問：咁我地一陣先出去整蛋糕啦，
你飲唔飲野？
我：好呀。
阿紫：檸檬茶？
我點點頭。
然後阿紫就出去拎．．．．
係果一刻，我自己不禁係度諗．．．．
傭人，私人樓，私家車，會所，看似眼角高既父母，
單純既阿紫．．．．．
我可以點樣取悅佢地呢．．．
雖然我既目標只係阿紫，但有佢地父母係度，
我總覺得，果一役巨大而無形既壓力，
再慢慢咁，行近去我度，我開始有點失去安全感．．．．
阿紫拎完野飲返黎之後，
我見佢手上，只係拎左一包。
佢入到黎就坐返係床度，
阿紫輕輕用手，係張床度拍左幾下，
示意坐過去。
坐就過去之後，
阿紫輕輕咁用手攬住我條腰，
同我講：傻佬，諗咩諗到咁入神呀。
阿紫，挨得好埋咁講。
我：冇呀，諗你囉，
唔係仲有邊個可以諗喎。
阿紫用手輕輕搣我個面一下：係咩？
好似唔似喎。
阿紫搣完我之後，繼續話：咦！？阿樂，
原來你塊面都幾滑架喎。
我：係咩？（我自己又摸一摸）
然後，我又摸返阿紫：唔係呀，你滑ｄ喎。
阿紫面紅紅咁講：嘻，女仔又點同男仔喎，傻瓜。
第一次，同阿紫有咁近距離，
同咁親密既接觸。
加上係房間果種氣氛渲染底下，
愛意甚濃烈。
面對首次咁既情況，理性有點失去。
我：不如飲野囉。（清醒一下都好）
我：阿紫你間屋真係好大好靚，
真係好羨慕你。
阿紫：有咩好羨慕喎，
我想去你屋企多ｄ呀，阿樂。
我：哈，我屋企冇咩特別，又細。
阿紫：有咩所謂喎，只要係你既野，
我全部都鍾意。
同到阿紫呢一句，我覺得，非常之窩心。
我：你唔凍咩？間房開左冷氣，
你又著咁少衫。
阿紫：唔凍呀，因為我攬住左你呀麻。
阿紫，比我想像中痴身，可能大家都係熱戀緊吧。
近距離望住阿紫，佢真係好可愛。
我隻手，亦不其然咁，攬住阿紫條腰。
我：阿紫，如果我一直都可以攬住你唔放就好啦。
阿紫：嘻，咁你而家唔好放手啦。
攬住阿紫既期間，其實我隱約感受到
阿紫身體果種凹凸感，可能因為佢著住小背心既關係。
身體與身體之間果種微妙既接觸，我每一吋神經都可以感受得到。
我輕輕感，係佢膊頭度，鍚左一啖。
然後，用手輕輕撫摸住阿紫，
又直又柔順既秀髮。
我感受到，這一刻，阿紫係完完全全屬於我。
我可以實實在在咁，觸到阿紫，我個心才安定下來。
我：不如去整蛋糕囉。
阿紫：好呀。
阿紫媽咪出街之後，我同阿紫就去返廚房準備整蛋糕啦。
入到去，阿紫就拎返Ｄ買左既材料出黎。
我：阿紫，我地今日整咩蛋糕呀？
阿紫：整藍莓芝士凍餅呀。
我：但我完全冇整甜品既經驗架喎。
阿紫：嘻，我教你咪得囉。
所以你一陣要乖乖地聽我話啦！
我：冇問題，我唔會只係食唔做野既！
阿紫：好，咁我地開始啦。
首先整左餅底先。
阿紫就拎左消化餅同牛油出黎。
我：咦！？原來餅底係用消化餅整架？
阿紫：係呀，不過用手指餅都得既，
我自己會鍾意消化餅多Ｄ。
我：哈哈，我都係喎，岩晒，岩晒。
然後我就拆開包裝，頂唔順肚餓得濟，拎左一塊黎
咬左一啖。
阿紫：哎呀，你個傻佬咁為食既。
我：哈，係呀，阿紫你食唔食呀。
張開口，我餵你啦，呀～～～～～
然後阿紫就張口開咬左一小啖。
阿紫：拿你將個牛油煮溶先，
我就將Ｄ餅整碎佢。
我：好好好。
然後搞掂左之後我地就將佢混合埋一齊。
阿紫：你拎呢個碌碌平佢就得架啦。
但記住唔好太厚同太薄喎。
我：冇問題！YES,madam!!
阿紫：抵錫。（然後就錫左我面豬一啖）
我：咁阿紫你整咩呀而家？
阿紫：將ｄ忌廉呀，芝士呀，糖，魚膠粉，蛋黃果ｄ
mix埋一齊lo。
我見阿紫對ｄ份量都幾熟，完全唔駛秤咁濟。
我：阿紫你又知夠唔夠既ｄ份量？
阿紫：嘻，秘密。
然後阿紫再落ｄ藍莓醬將佢用機器攪勻。
我：阿紫，等我幫你呀，
唔想你咁辛苦呀。
阿紫：打到變黏就得架啦。
用時，我就用左好一陣時間，將佢打成黏狀。
跟住我就問：阿紫，咁得未呀？
阿紫：你試下將佢倒轉放係你個頭度，
唔跌落黎就得啦。
於是我就好聽話，諗都冇諗就將佢倒轉放係我個頭度。
好彩．．．冇流落黎。
阿紫就笑住話：哈哈，阿樂你又會咁聽話既，
一陣真係流落黎你咪成頭都係囉，
我講下笑架咋，點知你真係會放係頭頂。
我：哎呀，咁衰既你，想整蠱我。
（然後我就用手去吱佢條腰）
跟住阿紫即刻攣起個身，我就笑左話：哈哈，阿紫原來你咁怕吱既。
哦，你死啦有痛腳係我手。
然後我就梗係變本加厲啦。
我：阿紫我今次唔會放過你架啦，鬼叫你咁狡猾。
阿紫一路笑住一路講：阿樂，唔好唔好
我投降我投降。
然後我地就將個慕思倒落個模度，
最後將ｄ藍莓醬再塗多一浸係面，然後就將佢放去雪櫃啦。
我見ｄ藍莓醬仲剩返好多，
我就點再少少黎試下。
我：都唔錯喎ｄ藍莓醬，有ｄ果肉係入面添。
阿紫：阿樂，你正一為食鬼黎。
然後阿紫就吱返我條腰，即刻跑出廚房諗住入房。
我當然承勝追擊啦。
不過我都好少見阿紫咁頑皮既一面。
諗返起都好開心。
於是，我就一路追到去入左佢間房。
心諗：今次你仲就得去邊。
我就將個房門閂一閂埋。
（屌！搞到我好似變態佬咁，
不過果時既mood真係好正．大家都好hyper)
我：阿紫，你今次冇得走啦喎。
阿紫就坐左係床上面，攬住左個公仔。
阿紫同我講：阿樂，我知你唔會既．．．（佢裝作好可憐既樣子）
係佢未講完之際，我已經衝左埋去吱佢。
而佢就一路想用個公仔抵擋住我既攻擊。
當然唔夠我身手靈活啦。
阿紫：阿樂，真係好痕呀．．
我：投降未？
阿紫用一用個公仔打一打我。
哎呀，你個死妹釘真係唔識死。
我就再變本更厲一點，
狠狠地去吱佢，阿紫就輕輕話：非禮呀．．．（當然我知佢係開玩笑）
然後我就話：哈哈，阿紫你嗌破喉嚨都冇人黎救你架啦。
（屌．．而家打返即刻諗起破喉嚨果個故仔）
因為阿紫係床上面都有反抗既，唔係任我魚肉果隻，
佢已經開始比我吱到訓低左．．．
而我又變相係佢身上面．．．
有一下失左平衡，我就稍稍壓左係阿紫身上。
我見到佢頭髮有少少凌亂，
但唔知點解果時配合埋佢個樣望住我果種表情，
襯托倒一款凌亂美出黎．．．實在太吸引．．．．