中三那年忘不了的三個月: 18

不在乎天長地久，只在乎曾經擁有。 


相信呢句野對大家都唔陌生，正當我心入面浮起呢句野個時，欣恩又攬緊我，講﹕「比我再攬多一次。」 

今次我都攬返住佢，因為我知道今次係最後機會。但佢好驚訝抬頭望返住我，之後我問佢﹕「做咩呀?」 

「冇，我覺得你對我好好。」佢露出滿足既表情，再次訓在我既胸膛上。 

「唔知我地仲有冇機會見面呢?」 



我冇答佢，因為我相信，如果有機會，上帝一定會安排機會比我地見面。 
(到呢加我都相信) 

飛機降落既沖力，令到我不自覺咁攬實左欣恩，而佢亦到明顯更加痴身，好似唔捨得分開咁。但飛機降落既時間只需要1分鐘多啲，不消一會兒就已經可以由窗外面望到台灣既機場跑道，不過我冇心情留意，大家都知道原因。 

如是者，飛機好快就停低左，咁樣意味住我地兩個係時候要分開。 

「我起身幫你拎埋個背囊先。」我微笑著同佢講。 



我企左起身，幫佢拎完背囊後，佢突然間開口﹕「你仲未答我條問題啵....」 

我個心，突然好似開左好大個洞，係呢一刻，我覺得好空虛。我係咁問自己﹕「唔通我真係鍾意上欣恩?冇可能家，我地先認識三個鐘，有乜可能咁快，錯覺黎既姐。我鍾意既係本莉，而唔係欣恩，係欣恩一相情願。」 

而我冇理到佢問既野，我將個袋帶左比佢，之後我就好似個浪子講左句﹕「保重。」之後我就轉身就咁走左。 

我一邊行，我個心入面就一直乸住乸住。睇黎，我真係鍾意上欣恩，但係我唔可能放棄我對女神既堅持。 

而事實上，我一邊行，我知道欣恩一路跟住黎。直到行到去機場同飛機既通道，我就企左係到，而欣恩就頭dupdup企左係我隔黎。 



我開口﹕「有必要咁執著咩，欣恩?你都知我地係冇可能。」 

佢抬頭好認真問住我講﹕「點解冇可能呀，你對我都唔係有感覺咩，你唔好同我講，你唔好同我講......」說罷，佢既眼淚就由眼框流左出黎，而且眼睛都由白轉紅，但佢冇喊到。 

佢個樣仍然保持住好認真既表情，我用手將佢眼淚擦走，之後緊緊攬住佢，之後佢都第一時間攬返住我，我地攬左差唔多三十秒左右，不過感覺上好似攬左一個鐘咁，可能我唔捨得欣恩既緣故，之後我輕輕係佢耳邊講﹕「對唔住呀，欣恩，我估唔到你咁認真。因為我早己有自己鍾意既人，所以....所以.....對唔住呀。」 

說罷，我都感覺到我既眼水準備流出黎，不過我係男人黎，唔可以係女人面前喊。 

欣恩慢慢放鬆，之後輕輕推開左我，我發現係佢臉上唔再係悲傷，而係一張帶有眼淚的傻笑臉。 

佢輕輕撫摸住我既臉頰，講﹕「原來係咁，哈，咁你可唔可以講你鍾意既人叫咩名?」 

「佢...佢叫黃本莉。」我極力壓制住顫抖既聲音。 

「喔，原來叫黃本莉。孖撚，希望你可以成功追到佢啦。」說罷，欣恩係佢背囊拎出一塊全新既LINTD朱古力比我，講﹕「啦，請你食啦，唔好忘記我呀!!!」我從佢手中將朱古力接過來。 



突然佢既手機響起，佢拎出手機黎聽， 

「喂，媽咪?咩事呀?」 

「係係，我呢加過黎啦。」 

「嗯，好，拜拜。」 

欣恩係我面前深呼吸一啖，﹕「再見啦!孖撚!記住唔好追過黎呀!!」 

說罷，佢擰轉身就走左。我連問佢拎電話既時間都冇，但我都冇去挽留佢，而係佢走到通道既盡頭，我就好大聲咁叫﹕ 


「拜拜啦，欣恩，我愛你呀!!」 




佢聽到之後，即刻擰轉身望住我，佢捂住嘴，看似係太激動，我彷彿見到佢喊，佢對我好大力咁揮手後，佢就學我好大聲咁講﹕「我都係呀!!!!!拜拜啦，有緣再會啦!!!」 

我連回答既時間都冇，佢就跑走左，而係呢三個鐘，我就好似發左一場好短暫既夢，我既眼淚，終於可以慢慢流下來了。