《迷失披頭四》: 第二章

「老細！唔該一碟蘭花豆腐乾！」

我終於在OpenRice找到一家老式上海菜館，找到阿梅口中的蘭花豆腐乾。看她滿足地啃著這碟形狀奇怪的鹵水豆干，我竟不自覺地嘴角泛笑。

「試吓吖。」

她將原本約手掌心大小的豆腐乾用筷子分出三分一，夾到我嘴邊示意要我張口吃。那天，是我們最接近戀人的一天。現在的我，只能用力回想我們的每段對話，試著尋找線索，繪畫出將我帶回她身邊的地圖。

「吭緊咩歌呀？」



「Beatles囉。」

「我淨係識一首：Hey Jude。」

「咁你平時聽咩㗎？」

「少女時代囉。通常睇埋嘅，腿先係重點吖嘛。」

「我以為你聽……許志安添！哈哈哈！」



「你已經係第一千二百零一個咁講嘅人，或者我再重申一次，鍾意許志安嗰個係我老母，所以改我個名做許智鞍，我本人靚仔過佢好多，Okay？I now recap in English……」

「許志安唔好咩，起碼有鄭秀文。」

「痴線鄭秀文男人嚟㗎！佢平……咪住先，你話『起碼』係咩意思先！」

「你個名都唔好得幾多啫，徐自梅喎，咩名嚟㗎？」

「我阿媽鍾意徐志摩囉。」



「我突然覺得好欣慰，原來有人仲狼死過我阿媽。」

「都話係我阿媽鍾意咯！我鍾意John Lennon㗎。」

「乜你兩母女啲偶像都咁早死。」

「要咁長命做咩啫，早死但係有人戥你唔抵，總好過老死個個就覺得『哦都係時候喇佢』。」

想到這裡，不禁擔心徐自梅會做傻事……我還清楚記得她說這番話時的神情，看似是打從心底如此確信著。那刻她眼裡沒有透露出心灰意冷，卻有堅定的決心。


...（待續）