冇錯,又係三日後,佢又pm我
(其實條友係咪想模仿穌哥呢?)

主題:「對唔住」
內容:「我求下你幫我一個忙。呢個世界得返你肯認真理下我。我係好人,完左件事我保證唔會再騷擾你。你唔信既,真係可以去查下我個名同我間中學,我名係……」


於是我隨意上網google下件事
唔多覺有新聞報過間中學有人死。
我開始覺得件事唔多尋常




講真,死人報夢就聽得多姐
死人報pm?唔多可能係真囉。
加上我google完都唔覺有資料
好可能只係條友老吹。


唉,好衰唔衰,我又真係衰好奇心重。
話說,我級入面有個聯校ball后
其實靚就唔係靚,勝在個人夠主動
因此佢識唔少名校男仔。




pm我條友(下稱鋒哥)聲稱自己係其中一間名校入面既學生
所以我就叫ball后幫我去打探下佢級係咪有個人死左。


「喂,艾莉嘉,你搵我咩事?」

「我有件事想你幫我,得唔得?」

「咩事先?」





「你應該識唔少XXX中學既男仔啦,係咪?」

「幾個咁啦,做咩?你睇中左目標呀?」

「咪玩啦,有時間我都要煲之前miss左冇睇d漫畫。
咁既,我聽聞有個人同我地同級既,係呢間中學一個月前死左,係咪真架?」

「下?冇聽佢地講過喎,我幫你問下啦。
做咩冇啦啦咁問既?你識架?」

「唔係!只係飲茶我親戚講起,我八下姐。」

好波,唔問都冇咁淆,一問就出事啦。

Ball后話原來間中學真係有人死左




原因係咩冇人知,因為study leave全級都唔係學校
學校唔想係非常時期公布,加上家屬唔想講之類既原因
件事冇人知背後原因,總之就係有人死左。


不過,大家形容為「明眼人都知」條友study leave個陣自殺既
好似話鋒哥本身都係神神化化既人
平時對手會有傷痕,唔知係比人打還是玩自虐
唔出聲,唔中意交際,淨係中意自己呢埋一二邊讀書
簡單d講,佢即係毒向左走向右走之中既毒向左走向右走


另加傳聞話佢暗戀左個女神級同學五年,但表白失敗
唔知會唔會加埋dse既壓力之下令佢爆煲自殺。






聽完ball后講既一大堆資料
我當堂倒抽一囗涼氣
心諗: 唔係咁邪下話 [[yipes]]  
唔通個pm係真既?鋒哥真係還魂搵我?


「咁單野即係堅架啦?咁即係點呀?你肯定佢係自殺?」

「係掛,點知咩,連佢級d人都唔清楚,我都係問到乜講乜架咋。」

睇黎鋒哥死左,佢級既人都係wfc既態度
冇人關心到底點解佢會死左。






「不過就算件事係真,都証明唔到個巴打係鋒哥本人呀!」
我心入面係度認真分析件事
加上鬼魂用pm,諗下都唔make sense
我同佢無仇無怨,非親非故,點都冇理由係搵我啦
我仲要只係一個陌生人,佢有心願,我都好難幫到佢架喎


我開始懷疑只係佢同班同學既惡作劇。

寄件人: 艾莉嘉
主題:「你到底係邊個」
內容:「就算真係有個人叫XX鋒死左又點,証明唔到你就係佢本人,可以係佢同學冒認佢。唔好搞無謂既惡作劇啦,人都死左,何必呢。」

點知今次唔駛1日,對方已經即刻覆我。
主題:「我講多少少。」




內容:「我屋企有三隻狗,無兄弟姐妹。另外,我曾經送過一個風鈴比一個叫Sharon既同班女仔,以及幫學校足球隊隊長XX朗設計過隊tee。呢兩件事,我冇同其他人講過,只有佢兩個人知。佢地兩個互相唔認識對方,唔會係串謀一齊冒認我。」


我睇完,心入面真係講左句粗口
DSE完左,我要查證都搵唔到班人啦大佬。
正當我拉落少少想回覆鬧佢一鑊個陣,原來佢段野仲未完。


「六月二十七日畢業禮,你應該會搵到佢地。」