於是我就係呢片咁尷尬既氣氛下捱過左個畢業禮
而我最後亦冇影到啊朗相
一完左畢業禮,我就嚇到九秒九跑走,離開肥師奶。


結束之後,我就不停搵Sharon身影。
「Sharon,個女仔係咪識妳架?」
Sharon身邊堆女仔friend指指我,佢就搖頭表示唔識我。

於是我向佢揮手,等佢主動行過黎問我咩事。






「妳……搵我呀?」

「係呀,妳係Sharon呀嘛?我有緊要事搵妳。妳介唔介意行去一邊傾?只會阻妳十分鐘左右。」

「不如妳講左咩事先啦,我朋友等緊我去影相啊。」

「佢地係隔離,唔係咁方便……」





「唔好意思,咁我走先……」Sharon見佢d朋友手肘撞一撞佢,就決定轉身離開。


「件事係關於啊鋒架!」我忍唔住大聲嗌左出黎。

「啊鋒?佢唔係死左咩?」Sharon身邊d朋友嚇到企左係度問
而Sharon就目定口呆咁望住我。

「十分鐘,只可以係十分鐘架咋。」







我同Sharon企埋一邊,我將件事既來龍去脈講一次佢聽
為免佢唔信,仲Cap埋圖佢睇。

「我係收過啊鋒既風鈴,不過之後我扔左啦。」

「件事只有妳兩個知道?」

「可以咁講既。因為我唔想其他人知呀鋒送野比我。」

「唔想人知?點解呀?」

「其實呀鋒係個好人黎,佢呢六年都對我好好,我亦估到啊鋒心入面點諗……」





「但係妳唔中意佢,所以扔左?」

「唔係……而係所有人都唔中意呀鋒,覺得佢好怪……我唔想比人笑……所以……」

「所以妳扔左個風鈴?」

「係。個風鈴,係佢Last Day個日送比我既。」

「Last Day?咁咪即係呀鋒自殺前冇耐發生既事?」


Sharon呆左望住我,忽然醒起呀鋒係送完風鈴後自殺。


「係咪……因為我扔左個風鈴所以啊鋒佢……」





Sharon嚇到有d手震,對眼突然紅左起黎,睇黎就快喊。

「如果我接受佢……或者唔扔個風鈴既話……」Sharon情緒開始激動,好用力咁捉住我隻手,「其實我之前都有諗過件事係咁,但估唔到啊鋒死後會同妳提件事,即係我冇估錯……真係因為我,啊鋒先會……」

「妳冷靜d先,呢d都係妳幻想姐,加上pm我個個人可以係冒認……」

「唔會!件事得我地兩個知道!」

「或者呀鋒有同其他人提過呢?」

「……」Sharon開始流眼淚,但聽到我分析,佢先至冷靜返少少。「我唔想係殺人犯……我唔想呀鋒係因為我死……」


「其實……妳係咪中意過佢?」





Sharon唔敢望我,只敢望住地下。

「……或者我一早就唔應該介意其他人點睇。」


睇黎毒男既命運就係
你女神中意你又點
女神怕比人笑,最後都會嫌棄你。


「個風鈴妳扔左去邊?」

「街邊d垃圾桶。」





「嗯……」我沉默左一陣,「我呀麻話過,以前d人思念一個人個陣,就會掛風鈴,聽下風鈴既聲音。或者,呀鋒送比妳之前已經有自殺既打算,所以先會送風鈴比妳。當然,都可以係代表佢想話妳知,佢好掛住妳。」

「Sharon……嘩,發生咩事呀?」佢朋友走過黎,見到Sharon喊曬咁,以為係我整喊佢。

「我會幫妳查清楚件事既來龍去脈,所以係未有結論既時候,希望妳唔好咁快自責住,妳介唔介意比手機我,方便再聯絡。」於是Sharon入左佢電話比我。