【突發】有個巴打PM我，話我聽佢死左。: 拾陸【終】

「艾莉嘉，你都黎左呀。」Sharon捧住鮮花，向我招手。

佢身旁既仲有呀鋒既父母、呀俊同呀朗，
呀俊只係敢向我點點頭，有點尷尬，
然後佢父母見到咁多年輕人係度，就行開一邊唔阻住我地傾謁。

「呢個位都幾好啊，望住個大海，空氣又算幾清新。」Sharon彎下腰，放低鮮花係骨灰龕前。

「自殺既人好似上唔到天堂，」啊俊好細聲咁講，「奈何以前我地無法拉佢爬出地獄。」





「你地諗住放左榜之後點呀？」氣氛太深重，我試圖轉移話題。

「嗯……DSE應該唔會太好成績，之前學校派個Predicted grade都唔係太好。所以我諗住睇下有冇咩辦法去做足球員，或者去台灣讀體育。」呀朗苦笑咁講。

「我仲未諗到呀，如果成績ok，可能會報英文既。」Sharon講道，「妳呢？」

「嗯……學業既野我未諗好啊。」我望向呀鋒既骨灰龕位，「但，呢刻我既目標，應該係上高登寫一個關於呀鋒既故事。」

「呀鋒佢應該都想做畫家既。如果佢當日冇放棄，就好啦。」Sharon都望住呀鋒幅相，頓時有點傷感，「至少，一日唔放棄，一日都仲有轉機。放棄左，就真係咩都冇曬，永遠都唔會完成到自己心願。」





「不過，事實都証明左Miss Tang同妳講既野係正確。如果唔係Miss Tang主動搵妳，我地今日都未必會企係度懷念呀鋒。可能會繼續好似以前咁，當冇事發生過，永遠留低條刺係心度，但又冇膽面對呀鋒既事。」呀朗突然講道，「呀鋒真係傻，要人重視佢記住佢，唔係自殺就可以做到，而係主動去搵人同人溝通啊。」

「嗯……就算自殺，最終只會極度傷害重視既佢既人，而唔重視佢既人就繼續不痕不癢。咁到底又有咩意思呢？」

「差唔多夠鐘要走啦，唔想搞太晏，下午我仲有d事做。不如大家一齊食個Lunch再解散？」呀朗望一望手錶，然後我地就一齊離開墳場，準備去搵間餐廳食飯。


「我！」走在最後既呀俊突然向我地大聲講道，「我第時，想做社工。」

「太好啦！加油呀！」Sharon聽到好開心，拉住佢一齊追上我地。







食飯既時候，我無聊上高登打發時間。


[blue]「您有一封私人訊息。」[/blue]




【終】