(十年啦,你過得好唔好)


單身咗十年,本嚟已經唔記得以前同ex嘅嘢,但係因為今日聽倒一首熱門新歌「羅生門」,而令我諗返起佢。可能你會話,屌!又羅生門,聽都聽到厭啦,但我都係希望大家容許小弟講埋落去。


十年前你話我無上進心,無將來,終日無所事事,所以要同我分手。


十年後嘅今日,我事業有成,做咗大公司ceo,雖然人工就唔錯嘅,不過就日日有返工無放工。唔知係點啦,今日竟然因為聽倒條仆街下屬返工係度偷聽嘅呢首「羅生門」,而令我諗返起你。



我突然想問你最近過得點?仲係咪同?條新仔一齊?定係已經轉咗男朋友或者已經結咗婚?仲有無掛住我?

唉!百感交集。

我拎起手機,想用短信搵佢,但我發現我已經將佢聯絡人記錄刪咗,我苦笑一下,懶有情調咁嘆咗一口氣,然之後準備放低電話。就喺呢個時候,我電話突然間響起,屌!邊個阻我感性,阻我感性者死!


我一望,屌!係一個未見過嘅電話號碼。如果我唔係驚可能係老闆喺出面用其它電話號碼打嚟,我一定唔會聽。我拎起電話按接聽,聽筒即刻傳嚟一把有啲沙啞嘅女聲。



「喂...係我呀...」

「係你!?」

「係我呀...」咁多年無聽你把聲,你把聲唔同咗好多,仲沙咗好多,唔通係呢幾年過得唔好?有咩傷心事?!比男友飛咗?屋企有事?!唔通係因為後悔飛咗我?短短幾秒之間,我諗咗好多個可能性。

「有咩事?」

「你最近...點呀?」



點解過咗成十年先嚟搵我?唉,我盡量保持冷靜咁話:「無呀...都係咁啦!升咗做CEO之後,日日都忙OT。」

「你可以...幫我個忙?」

唔通佢想借機約我出嚟!?

「係?」

「可以借...我錢?」

「吓...?幾多?」

「我比大陸公安扣留住,要...」下刪唔知幾多字。

呢一刻,我搵返我嘅理性。



「屌!」我隨手就Cut佢線,然後將部電話掉埋一邊,繼續手頭上嘅工作。

<<十年啦,你過得好唔好>>完
已有 0 人追稿