(突發!)我買咗杯咖啡俾女神,點知見倒個師奶...

一見倒今日買一送一,我即刻由公司趕出嚟買咗兩杯咖啡。點解?嘻嘻!當然係拎返公司請我女神飲啦!加下分都好嘛!於是乎呢,我而家就左手拎住一杯Mocha,右手拎住一杯Cappuccino,一邊心情愉快咁行出連鎖式咖啡店,一邊幻想緊女神飲咖啡嘅美態。

可能你會話我當死一世兵啦!但我好肯定我好快會升做將軍!唔係好耐啫...應該...

返公司嘅路上要經過一條馬路,由於等緊交通燈嘅關係,我百無聊賴咁周圍望下,就見倒對面街口有個師奶拖住個仔都係等緊過馬路。我望住佢地,好溫馨,個細路就好開心圍住個師奶轉嚟轉去,而個師奶亦都望住個細路笑,兩個都笑到見牙唔見眼。

望住佢地,我不禁開始諗返起自己細細個嘅時候...





講明先,?時我冇做圍住老豆老母轉嚟轉去嘅傻仔嘢!

當時,屋企雖然唔算有錢,老豆老母買唔倒啲咩俾我,我亦唔敢要求啲咩,但我仍然好滿足。?時我要做嘅只係返學、放學、做啲少到好似冇咁嘅功課、食嘢同埋玩...仲有瞓...咩都唔洗理,咩都唔洗諗。因為咩都係老豆老母會幫我搞掂哂。

肚餓,老母會煮飯俾我食...眼瞓,老豆會背住我返屋企...病咗,老豆會一手抱起我帶我去醫院...唔開心,老母會安慰我...

記得有一次出去玩,我左手拖住老豆,右手拖住老母,身邊仲有嗰時仲係正常嘅阿哥,一家四口。我唔記得嗰次係去邊玩,只記得當時依稀嘅畫面,但嗰個時候真係好開心...好開心...人生之中唯一一次齊齊整整...最開心嘅一次。

雖然好可能已經冇呢個機會,但我真係好懷念當時嘅情境...





再睇返而家啲細路,幾歲人仔就要俾人拎出嚟比較,細細個就要同人鬥呢樣鬥嗰樣。生活除咗返學之外,仲要補習、上興趣班同埋做好多好多嘅功課。佢地細細個就要俾人強迫接受呢個社會嘅現實...完全冇得揀...呢個競爭直至到佢地死嗰日都好可能未完。

唔通只係想簡簡單單,好好咁享受一個純真童年,做返一個普通細路嘅權利都冇?!點解咁快就要強迫佢地理解呢個社會嘅現實呢?

諗到呢到,我忍唔住揸緊拳頭嚟宣洩我嘅不滿,仲唔小心流咗幾滴男兒淚。喺我冷靜返少少嘅時候,先發現對面嗰兩母子已經過咗嚟。個細路就手指指指咁指住我笑,而個師奶就用一個好驚嘅眼神望一望我,再同個仔話:「衰仔!咪亂指!唔好望!快啲走!」

我頓咗一頓,望一望已經走遠嘅細路同師奶,望一望地上面嘅啡色液體,再望一望我雙手......

「Holy~Shit!」





<<(突發!)我買咗杯咖啡俾女神,點知見倒個師奶...>>完
已有 0 人追稿