(青春極少甜)原來曖昧真係最好既階段: 18-魏天培

我「鍾意」左個個女仔年幾，佢叫常穎珊，細我一年，係一個好溫柔既女仔，但係相比起溫柔，我諗更加係柔弱、軟弱，咩都好驚青。
我係係中四一次義工活動到識佢既，佢個陣細膽到自己坐埋一二邊唔出聲，個社工爭D當佢冇出席。
我見佢冇乜出聲，就主動同佢講下野。
開頭佢都係好怕醜，我問一句佢問一句。
活動完左我問佢拎左facebook，之後就一直用facebook交流。

後來幾次義工活動，我都係咁同佢講野，發現佢個人好天真，好似唔睇住佢佢就會受傷咁，令人好想保護佢。

就係咁，我將呢種感情當左做鍾意。



但係我一直都冇話俾佢知。


個陣我未同過妳同班，真係冇乜留意過妳，就算見過都冇乜望多幾眼。係識左穎珊之後，我係禮堂見到妳，爭D認錯人。
不過好快我都已經分到，因為妳地氣質好唔同。妳成日都笑住，好開朗，又多野講，而穎珊就成日縮埋一舊皺住眉頭。
由於妳地真係幾似樣，所以我開始忍唔住成日留意妳。

中五過左一半既時候，穎珊話佢終於都拍拖，對象係同班一個都幾怕醜既男仔。
佢地真係幾襯，穎珊同佢一齊都好似好開心，我惟有祝福佢地，叫自己放低佢。
我都慢慢知道自己對佢可能都係睇住個妹咁樣照顧，唔係真係鍾意佢，只係習慣擔心佢，先咁在意佢。



 然而我都係好習慣留意學校入面既「穎珊」，即係妳。
成日望住跟住楊紫晴同謝曉霜而變到好粗魯既妳，食野個陣再大舊都一啖塞入口咬、野食滴到周身都係，
又望住改極都咁論盡既妳，成日撞親跌親跟住又扮冇事。

但觀察咁耐我都只係覺得妳好搞笑，並冇好似想保護穎珊咁想保護妳。

直到有一日，個日我約左屋企人去飯，所以行左同平時番屋企唔同既路去同屋企人會合。
係天橋上面，我見到妳。妳向住我既方向行既時候，見到有個乞衣，妳望左佢好耐，但人流一直將妳推前。妳個樣好苦惱，然後好似下定決心咁，逆流行番轉頭，拎出個銀包摷左好耐，搵到一推散銀，俾左個乞衣。我仲記得妳個陣笑得幾開心。



自個次之後，我就對妳好有好感，更加留意妳。


上次，我見邱sir帶左妳入實驗室好耐都冇出黎，驚妳有咩事，就問黃sir借匙話入實驗室借對新手套。
一入去我真係嚇親，唔知點反應好。妳話唔追究，令我覺得妳更加蠢。
之後我見妳唔開心，就忍唔住成日去引番妳笑。
見到妳笑既樣，我知道自己係鍾意左妳。
但我都發現到妳望住周銘逸既眼神，好似我望住妳既眼神咁。我就因而暫時收起對妳既感情。

但有時都會忍唔住想俾妳知，所以有一次食飯，
我話可能我鍾意妳，
係真既。

我知妳好懶，寧願餓都唔去買早餐。
所以我買自己個份個陣，順便去買埋俾妳。



小食部個次，我好耐冇試過咁嬲，但同一日，妳話左俾我知妳同呀逸個件事，雖然我有D唔開心，但其實我都自覺瞞左妳穎珊既事，而妳又間接向我表白，所以我既開心係比唔開心多。

於是我約左穎珊出黎，確認我對佢既好並唔係愛情，放低左心入面舊石，輕鬆左好多。
點知俾妳個低b見到，仲喊得咁犀利，一定係自己係個腦入面唔知亂諗D咩啦。


「不過我而家話俾妳知，我鍾意既係妳，即使佢同妳外表相似，我都好清楚自己鍾意既係個個成日話自己冇事但其實只係怕麻煩到人既妳，個個自己蝕底都唔會出聲既妳，個個鍾意我既妳。」 

我聽完，又流左一滴眼淚，但我知道，呢滴係感動既眼淚。

「邊個話我鍾意你……」
「少少事就喊到豬頭丙咁，唔鍾意我唔通係憎我？」

我扁唒嘴。



「鍾意你都唔係唔得，以後有咖哩食D薯仔都係我既。」



「知喇， 



女朋友。」 

魏天培攬住我。





我好鍾意佢既懷抱。