唔好玩啦，我係月老個助手？: 3.4

「我…」呢個係洛賢。

「林。洛。賢。！！！！！！！！！」呢個係月老。

「…屌。」洛賢講完呢隻字之後就暈低左。

我同小玉都比呢個獅吼功震到差啲跌低。

等洛賢醒返之後梗係比人省到立立令，聲都唔夠膽出。主要內容都係鬧佢唔好再叫佢做老野，我係間房聽到笑得勁辛苦。



呀係啦，講起間姻緣鎖真係大到乜咁，不過就全部都係月老變出黎，但房就得兩間，我同小玉一間，洛賢就同月老一間。

你可能問點解唔變多幾間，因為大部分地方都係用黎做左廟之類既野，比啲有心人黎求下姻緣咁，而我地吹水做野食飯訓教既地方就係哂後面。不過依家少左人黎拜啦，加上個位置咁偏，唔係有心人都較難搵到，但七夕個陣都好似話會多返啲。

而配姻緣呢家野係做唔完既，即使冇人黎求都唔代表佢地冇姻緣架嘛。

長命功夫就長命做，我老豆教落既。

「食飯啦，爺爺洛賢沚緣！」加多句就係，小玉煮啲野食真係天上有地下無，餐餐都食到我勁飽。



「沚緣，你今日有冇咩收獲呀？」 月老食食下飯問我。

「我呀，今日返屋企探左我呀媽同埋執左行李過黎咋，仲未開始做。」 講完我又爬左啖飯。

「嗯…係啦，頭先我教完你你就即刻轉移左，唔記得同你講返啲要注意既野。」 月老準備夾左舊雞脾去。

「講之前放低舊雞脾先！又係到扮哂野就想夾左舊雞脾佢？冇咁易！」 好彩我反應快姐，及時打開佢對筷子。

「喂，你班友仔讓下老得唔得呀，我今個月食左一次咋。」見扮野唔得就開始用輩份壓我地。



「話之你玉皇大帝吖，公平競爭呀依家。」我絕對唔會輸比佢。

但我講完呢句之後就全部靜哂，仲好錯愕咁望住我。

「爺…爺爺，你冇提佢…佢咩…」 連小玉都窒哂口，搞咩呀？ 

「你死啦，玉皇大帝佢好小…」洛賢都未講完，我就感覺到一陣無形既壓力從後面傳黎。 

「乜咁好興致呀，月老。」一把粗獷既聲越黎越接近我，我完全唔敢望去後面。 

「皇上。」月老更加跪係地下，對住呢個粗獷既男人。