唔好玩啦，我係月老個助手？: 4.1

「你記住如果真係覺得好眼訓既話就一定要轉返黎呢到先，唔係你暈低左都冇人知咩事。」 月老係我出發前再三叮囑我。 

「知啦，好長氣呀你。」我拍拍佢膊頭，示意放心。 

我行到出去前面拜神既地方，月下老人既神像好端正咁擺左係到，前面仲有啲供品供奉住佢。雖然話久唔久淨係得一、兩個入黎拜下，但係我其實有時都見到月老好比心機咁打理個神像，清潔下張神主枱。 

話哂「入屋叫人，入廟拜神」，每朝我都會誠心咁拜一拜月老，祈求佢都可以快啲比段姻緣我。 

今日都唔例外。 



「希望月老爺爺你可以配一段最適合我既姻緣。」 雙手合十講完之後，我叩左三下頭，然後起返身。 

「其實我都係你隔離啦，使乜拜姐。」 月老冇打擾我拜神，但係我起返身之後就又開始串串口。 

「咁係咪想我對你三躹躬先？」我作勢就要彎低身。 

「得得得！你依家即刻出去做野，唔做到暈低都唔好返黎呀你！」 月老趕住掟我出去。 

「咁拜拜啦～」跟住我就消失左。 



「最好既姻緣？我係一開始就已經比左你啦…哈欠！眼訓訓返陣先。」 月老一路行返自己間房一路講。 
…… 
…… 
我諗左好耐，究竟咩地方最多啲情侶依泣，但諗諗下相處之道，通常都係咩患難見真情架啦，最多患難既地方……醫院！ 

拿唔係話咒人地，咁生老病死就梗有架啦，睇下自己另一半會唔會係身邊陪你走過呢段路姐。 

「痛苦既時刻，有自己最愛既人係你身邊，無異係一個最大既動力。」我係筆記簿到寫低。 

黎到醫院之後，我差啲就比一個搶住急救既病人張床撞到， 隱約見到係個女仔傷得好重下，個男仔就起勢嗌佢呀童，喊到就暈低咁。 



咁我就諗住行埋去安慰下佢咁啦，點知有人拉住左我隻手唔比我行。