[末日][極限生存][獵奇]　致人類的輓歌－首部－墮落: 9.9

阿Ca和阿申的下巴掉到地上。

亞力放下盾牌，舉起雙手以示友好。

「佢救過我，放過佢地。」亞力指著強盜們說。

「好似關我事咁。」阿申舉起弩指著大姐。

「求下你。。。」亞力慢慢走到大姐身前擋著。





另一個鬍子大叔站起來護著大姐，殺氣騰騰看著小隊。

「你識依班人？」大姐驚訝說。

「。。。。。嗯」亞力面有難色回答。然後指著小靜。

「佢。。。佢都救左我。」亞力淡然說。

小靜心底裡很激動，但一想到之前的事，她立即壓下自己興奮，握著箭矛沉著應對。





兩幫人馬就這樣對峙了一分鐘，樓下開始傳來騷動。

書生看著手錶，焦急得五官都扭成一團。

「可唔可以和平一陣？最少走到安全地方先再算？」亞力說。

小隊雖然火力上有優勢，但他們人數始終太少。

要麼盡殺強盜，要麼被強盜反擊兩敗俱傷。





「嘖！」阿申咬牙皺眉，不屑一聲。

他環視了房間一下，大家已經如箭在弦，稍有擦槍走火便不可收拾。

「你地行哂去個牆角到。」阿申說。

強盜慢慢聚集在一起，用身體保護著大姐。

「有咩古怪就開槍，唔好猶豫。」阿申向Carey說。

Carey點頭。她死瞪著雙眼，手指不停發抖。

在她面前的是一堆活人阿！

強盜都坐在地上，流露著擔憂的表情。





阿申蹲下來，在背包中找到地圖，不斷檢視附近的街道。

他看著強盜，再看一看難民，然後感到一陣頭疼。

「申，我地點都要物資，不如帶埋佢地番去？」小靜說。

「傻的嗎？引狼入室。」阿Ca強烈反對。

「番去到佢地就冇人數優勢。」小靜說。

「留佢地係到，拎完嘢就走啦！」阿Ca說。

古瑪拍阿申的肩。





「同你講兩句。」古瑪說。然後把阿申帶到房間另一角說

「冇時間，下面班怪物唔知幾時衝上嚟。一定要走，用佢地做肉盾同運嘢，落到去上船就走。好唔好？」古瑪焦急說。

阿申點頭。

「阿姐，一齊落去，之後分道揚鑣，互不相干，如何？」阿申鐵價不二，半強逼說。

大姐看著身邊的同伴，書生默默點頭。

「睇怕我冇選擇。」大姐聳肩，晦氣說。

「馬松山，叫幫乞丐準備走喇。」大姐向書生說。

馬松山點頭，起出房向難民開始解釋。





強盜們站起來，不懷好意瞪著小隊。

所有人也放下武器，收拾行裝，樓層頓時熱鬧起來。

「阿申，班強盜好似好忠心。個大姐一定唔簡單。」Carey說。

「嗯。都唔關我地事。」阿申皺著眉打量著強盜的背影。

「估唔到我地仲會再見。。。」亞力走到小隊面前說。

「我都估唔到。」阿申輕挑回應。

「阿靜。。。我。。。」亞力欲言又止。





小靜還未原諒他，但心底暗暗高興。

她蹲下來假裝收拾背包。

阿申擋在小靜身前，眼露殺意盯著亞力。

「我。。。出番去守門口。」亞力知難而退。

「係唔係去橙堡呀依家？」亞力若無其事甩下一句。

阿申僵硬在原地，握著弩箭不停顫抖。

「。。。之前佢識華叔。華叔同佢講過我地位置。佢係強盜。。。」阿申推演，已經動了殺機。

「橙堡？未去過。」小靜急忙說，一邊捉著阿申的手。

小隊目瞪口呆看著小靜。

「咦？唔係話你地個基地係橙堡咩？」亞力不識趣追問。

阿申的手再次抖起來。

「唔係。我地係海。。。點解要講你知？」小靜作厭惡樣避開亞力目光。

「係囉，問。走啦！」古瑪粗魯說，附和小靜。

「。。。。。。」亞力微微點頭，面帶歉疚退出房間。

「not now, not here.」Carey按著阿申胸膛說。

 

不消一會，物資房已經被清空。

物資裝成六個大背包由難民背著。

 

小隊和強盜頭目在房間裡討論退路。

 

「岩岩察覺到班瘦仔會驚。好好利用佢地既恐懼，一氣呵成衝到底。」馬松山說。

「點樣利用呢？」阿申問。

「岩岩佢地稍微遲疑冇衝上嚟，我地立即大叫嚇走左佢地。依啲叫士氣。」馬松山說。

「我地有三隻艇。日用兩隻，一隻後備。仲有一隻停係大堂入面應該係你地架啦？」大姐說。

阿申點頭。

「幫乞丐有九個，我地有八個，你地有五個。一隻艇可以坐八個人，再多就會翻艇。岩岩好。」馬松山說。

「你地唔係有十個人出去咩？」阿申問。

大姐面色一沉，強盜們一片黯然。

小隊明白了。

「你地打算點樣衝落去？」Carey問。

「你有張良計，我有過牆梯。」馬松山指著Carey的衝鋒槍，然後從背包拿起兩支化油器噴劑說。

「點行？」阿申問。

「兩個盾手行前，跟住兩個斧手，我同大姐，乞丐，你地行最後。」馬松山說。

阿申立即發難，推打馬松山的肩膀。

「玩嘢？點解我地行最後？」阿申十分不滿，挑釁說。

「你地好多遠距離武器。只係依個原因咋！」馬松山吃驚答。

「唔得，我地一定要行前。」阿申擰頭反對。

「你地冇盾，點打頭陣？」大姐不悅說。

「總知我地唔可以行後面。」阿申斬釘截鐵說。

氣氛再次僵持。

「算啦阿申。。。」Carey向阿申交頭接耳。

「我地冇時間再拗喇。」小靜也勸阻阿申。

阿申頭昏腦漲，總是有人要反對他的意見。

「你地手指拗出唔拗入！應該阿申講咩就咩！」阿Ca用手架開小靜和Carey。

「我地只要一開始衝就唔會停，依個係整個團隊既攻勢。所以前面一定要有盾手開路。前排只負責衝陣，殺敵由後排做，分工合作明唔明？！」

馬松山急忙解釋。

「依個女仔，佢用矛好叻，仲有依個反應好快。將佢地放去前排，你地兩個斧手留係留面。。。就咁話。」阿申說，指著小靜和古瑪。

小靜和古瑪猶豫在原地。

「阿申。。。我地應該一齊行。。。」小靜輕聲說。

「嗯。。。」古瑪擔憂說。

「你明唔明。。。行前面其實更安全。」阿申看著小靜說。

「咁我地更應該。。。」小靜立即爭論。

「夠喇！！！」阿申大叫，狠狠瞪了小靜一眼。

一行二十人在走廊排好隊型，阿Ca十分不爽走到隊伍後方。

 

「口罩，泳鏡。」阿申提點，小隊眾人帶上裝備。

強盜也拉起領巾掩著口鼻。

亞力走到防火門前拆走剛剛用來封門的傢俱。

 

他暮然回首，走廊的人群十分安靜。

昏暗的空間只由數支電筒照亮，看不清楚人群的臉容。

彼此肩靠肩，背靠背擠滿走廊。

衣服互相磨擦，不時傳來幾聲咳嗽。

厚重的衣服包不住暖意，所有人也對門外的世界感到心寒。

亞力握緊把手，呼出一口氣。

他猛烈踢開門，舉起木盾護著身體，和另一個盾手形成盾牆向樓梯衝鋒。

「Let’s go！！！」馬松山大喊。

「喝呀！！！」強盜們奮起大吼！

小隊也燃起高昂的士氣，被激發的勇氣剎那間驅散心底的寒意。

頂樓的人類開始向下殺出重圍。