《青春的回憶錄》 (女同愛情小說－微甜走冰): 28
＜第二十八章＞ － 芋頭
芋頭住在我媽的朋友馨姨家，那時我才初中，有時陪媽媽上馨姨家吃飯。
更小的時候常常上去那個家，跟馨姨的兒子肥仔和其他朋友的子女一起玩，明明才認識不久，卻可以不分你我，在複式的家玩捉迷藏，躲在房間裡打電動，落街踢足球，什麼都玩一餐。馨姨還常常說要我嫁給他的胖兒子，叫我新抱仔。長大後，馨姨還是叫我新抱仔，但我和肥仔已經沒有一起玩樂，越大越生保。
第一次見芋頭，我就坐在馨姨家的飯桌等吃飯。
「肥仔，食得飯喇！叫埋芋頭落黎啦。」馨姨捧著一煲湯從廚房走出來。
「HI。Hello Auntie。」芋頭從樓梯走下來，跟我打招呼，然後到我媽，因為他先見到我，我點點頭。
芋頭的輪廓分明，蓬鬆帥氣的短頭髮造型，配上棕色染髮，左邊耳珠有一顆黑色的耳環。
是帥哥。
吃完飯之後，芋頭跟肥仔回到樓上打機，我們沒有對過話。
「肥仔D朋友成日都係度食飯架？佢個頭染到咁，唔洗返學咩？」我媽開動師奶吹水mode。
「芋頭佢冇讀書喇，出黎做野架喇，話想係我度住，日日同肥仔仲有幾個fd玩，我都有同佢屋企人傾過電話問過得唔得先比佢係度住架，佢屋企人話無問題我都好歡迎，得閒戈時都會幫下手做屋企野既。」馨姨對芋頭的評語似乎不錯。
不知道為什麼，那幾天我媽都帶我到馨姨家吃飯。那段時期我還是非常沉默，我只坐在一旁，然後偷偷看著芋頭和肥仔聊天。
芋頭有跟我說過兩句無關痛癢的說話，重點是，我不知道為什麼我能在ICQ上如此輕易找到他，我只知道他叫芋頭。
「不如你做我女朋友。」我告訴他我是誰，然後他突如其來的一句。
「下，但係我都唔識你。」好自然的反應。
「我係芋頭囉。」好自然的回答。
「我唔係咁既意思……我係話我都唔知你係咩人。」
「咁你想知D咩？你問我，我答你囉。」
「我連你叫咩名我都唔知。」
「李枑騰，枑騰、枑騰，所以D朋友叫我芋頭。」
「哦……。」
「咁而加得未？」
「下…..但係…...」
「你對我有冇好感先？我對你有喎。」
搞乜野，而加究竟係度搞乜野？有冇人同我講下發生咩事先？
「都有少少既……。」我竟然沒有否認！對靚仔的抗拒力果然比較低。
「咁咪得囉。」
「等我再同你傾耐D，了解你多D先啦。」
我才跟芷晴在一起沒多久，既然她對我忽冷忽熱，我也得找點樂子。
「你住邊？」過了兩天，晚上差不多十一點多，芋頭在ICQ問我。
「我就住馨姨隔兩條街戈間藥材舗隔離之嘛。」
「我而加黎搵你好冇？」
！！！！！！！！！！！！！！！！！
本人詞彙有限，用文字不足以表達我內心的激動。
「搵我做咩呀？」我裝作鎮定，幸好隔著螢幕，他看不到我快要火山爆發似的表情。
「掛住你囉。」拿，呢句我一聽就知道好假。
「做咩掛住我先……？」我已經不知道在說些什麼屁話。
「掛住你……想同你做D同女朋友做既野囉。」這句才是真話。
我完全怯撚哂，想點？想抽我水，想索我油，想食我豆腐？
我真的覺得男女生十分不公平，女性的身體對男生來說如此吸引，我卻對男性的下體毫無興趣，而且那時還是覺得做愛是會對女性造成傷害的時期。
「但係……咁夜，我屋企人唔會比我出黎。」我也沒有說謊。
「淨係落樓下都唔得？」
「唔得呀……最多同你繼續傾計。」作為一個謹慎怕事的山羊座，我只能拒絕。
「咁好啦……你想傾咩？」
「我想問……點解會揀我？」
「我拍過六次拖，高矮肥瘦靚同唔靚都試過，咪想試下你呢TYPE囉。」我那時的頭髮很短，剛剛剪錯頭過了不久，頭髮開始長出來一點的時候。
「哦，姐係如果有其他我呢TYPE，你都會試？」
「唔一定架，我第一次見到你上黎肥仔屋企戈時，已經對你有好感架喇。」
「你咁容易對人有好感架咩？」
「唔係架，啱FEEL先有好感架嘛。老婆。」
！！！！？？？？？？？？？？？？？？？？？？
我抑壓住自己激動的情緒。
「咩老婆呀，我都未應承你。」
「但係我想叫喎，老婆。」
用言語已經表達不到我內心的澎湃。
「我咁似男仔，你唔怕D FD話你咩？」
「哈哈，咁我咪照拖住你出街，如果撞到FD，佢地問我做乜拖住個男仔，以為我變左基佬，我同佢地講『我老婆黎架。』，咁囉。」
我笑了笑。
有時就算我知道他是在說謊，我還是很想聽。
我們交換了電話，他有時會打給我，或者傳短訊給我，但我都拒絕見面，只會在聽筒裡聽聽他的甜言蜜語。
我不想背叛芷晴。
到了有一日，我在ICQ叫他，他的回覆令我很錯愕。
「你係邊個？」從芋頭的ICQ發過來。
「我係芋頭個FD囉。你又係邊個？做乜用佢ACCOUNT?」
「我係佢女朋友。」
「哦，佢都叫我做佢女朋友喎。」我頓時對他沒有了幻想。
「原來係真既……」
「點解咁講？」
「唔止你一個，佢ICQ仲有其他人話係佢女朋友……。」
「我同佢乜都冇做過，放心，你都小心D佢啦。」我覺得她有點可憐。
「我同佢已經做左……。」
男人，哼，男人，是不是都用下體去想事情？
「你同左佢一齊幾耐？」我問。
「半個月左右啦……」
有時女生也不值得可憐，她也太不懂得去保護自己了吧。
「你自己再諗下點做啦，既然佢唔止一個，上床都唔會淨係同你一個。」
「我會架喇……」
有時我很恨自己的理性，恨自己的怕事，如果我可以不那麼拘謹，不那麼認真，或者可以試一下，被男生疼愛的滋味。
可是，我這個男仔頭，應該沒男生喜歡吧？說喜歡我的，都是這種寧濫勿缺的人，都是獅子座，都是一堆謊言。