《易容師 II 模仿犯》: 第十一章-歐陽美琪
我，又比呢本書你？
呢句野，點解呀？
係指上次我黎到小欖個陣？
但唔係啵！個次汪震唔係神智不清既咩？
咁個「又」字，係點解？
在場，就連上次在場既陳仔同其中一位職員，都好似熊教授同其他人咁......
幾個人，幾對眼，全部既焦點都集中我身上。
然而，唔單只係佢地，就連我自己都搞唔清楚咩事！
「汪震，你到底......」
「劉SIR，你係咪有Ｄ野，應該同我地講清楚先？」
正當我抵受唔住眾人既眼神壓力，逼著追問汪震詳細個陣，熊教育就已經
截斷左我：
「你係咪有Ｄ咩隱瞞我地？」
「我冇！所有我知既野，都一一講哂比你地聽！」
「咁汪震點解又係講？」
「我點知？可能......佢係講我上次黎到小欖個次掛！」
「你講咩？」汪震，又一次講聲。
清朗，帶點兒沙啞既聲線，令所有人不自然咁停落黎聽佢講野。
你咪亂講野呀......
「明明，我地係第二次見面。」
「你個癲佬！」忍無可忍，眼前呢個汪震，真係令我非常之暴躁！
「冷靜Ｄ呀天哥！」我拍枱起身既一刻，陳仔馬上按著我。
「保護犯人！」同時間，兩名職員一齊拉開左汪震。
「你亂翕Ｄ乜呀？」冷靜？先比多年女友派緣帽，依家案件有阻滯之餘，
無啦啦燒埋我個疊！
冷靜？你冷靜比我睇呀！！
2015年10月17日，下午4點15分。屯門小欖精神病治療中心，門外。
「天哥......冇事嗎？」
「冇！」
岩先既事，小欖職員見我咁激動，本身都唔知應該點處理。
但忽然汪震又再次發癲，喊哂口話：「唔好打我啊，我會聽話架啦！」職員
就以此為藉口，請我地立即離開。
「劉SIR，我希望汪震頭先真係發翕瘋啦！」
屌，你呢個性變態犯依家黎懷疑我？
「熊教授，你係心理學權威。你應該睇得出我冇講大話架！」
「係......但我都睇錯過一次，唔想有第二次。」
佢老尾！又一個痴線佬！
又一次既冷場，我、陳仔同熊教授三個人，都冇出聲。
熊教授，由岩先開始懷疑我到依家。
我，就真係興過火屎，公事同私事纏繞下，我真係唔想再講野。
而陳仔，多數係呢個尷尬場合，佢都好識人咁靜觀其變。
「唉！算啦，返去啦！」吊那聲，唔係為左單案，我一定同教授撐到抵！
呀，點知佢串到馬撚咁款。
「我自己坐的士返去得啦。」好啊，我都唔係好想車埋你架炸！
就係咁，我地同熊教授分道揚鑣。
我同陳仔走去拎返架車，熊教授就去後面車站截車......
「的士！停啊！我叫你停啊！」
就係我地一上返車，熊教授就起勢咁大嗌的士，從後追上黎。
屌，係咪痴線架？最後一架離開地球既的士咩？
我心諗教授係咪痴撚左，同時叫陳仔去盤下佢......
「天哥，部的士啊！」
「又咩料呀？」我望著陳仔，陳仔雙眼追著的士咁去，係咁大叫，好似發
現左Ｄ咩咁。
就係呢個時候，教授所追著個部的士，岩岩同我部GTR擦身而過。
剎那間，一個似曾相識既臉孔打入左個腦海。
「嗄......劉......劉SIR，嗄......嗄......係歐......歐陽......」
熊教授扯哂哮跑到我車窗邊，我亦拿拿聲拋低句：
「教授，今次你真係要自己搭的士啦！」再立即撻匙，踩狠油門，高速追
上去！
「陳仔！」我一聲叫到，陳仔醒水，拎出個警示燈放係車頂。
藍光同響聲交接，引擎同速度既配合，唔洗兩分鐘已經追上左前面個架可
疑既的士。
的士司機亦醒目，我地岩爬過佢頭，佢已經收制停落黎。
我好快手咁將架車泊係的士前面，準備落車去查證後座個位少女......
砰呀！
「喂......警察，咪走！」
我地一落車，後座個位少女，亦同時打開車門，衝左出黎！
但係唔係主動接受調查，而係向山邊方向衝過去！
可惡啊！岩先線索斷左，依家眼前又係一個好機會，我唔可以再比佢白白
流走！
抱住打死罷就既精神，係少女往山坡跳落去既一刻，我亦飛身出去抱著左
佢！
只係，佢衝得太快，我亦拉唔切佢......
兩個人，攬埋一舊碌左落去！
啪！砰！砰......砰啪！啪.......砰砰砰......砰啪！
嗚呀！痛撚死我啦！
為左保護可能重要既線索，同埋眼前呢個少女，我不惜用盡全力抱住佢碌
落山。
但估唔到係，平時睇戲睇得多，都唔知真正碌落出，會比咁多石頭樹支插
到發花。真係痛到好似古代，係牢房被鞭打之刑咁傷。
「呀......」碌左唔知有冇十秒，我只係感覺到全傷多處比硬物割傷，手臂唔
知係咪斷左條骨咁。
不過，我依然要去確認一個，個少女既身份。
我忍著痛，爬著地上前，扶返正背脊向天，訓左係地既個位少女。
當我見到佢個樣個陣，就馬上同之前調查汪震一案時，失蹤人口報告中，
案件結束後依然未搵得返既少女──歐陽美琪，樣貌重疊一齊！
(to be continued...)