「幾歲呀!?仲玩插眼踩腳指呢啲小學雞野!? 」我咆哮一聲,隨帶成個人踎低,咬破舌尖,轉頭將口中既一口陽血噴落偷襲者身上!
 
舌尖血乃殺鬼兇器,雖然我唔係童子之身姐,但係呢一口淬鍊已久既陽血對鬼既殺傷力依然係唔能夠睇少!但係,來物竟然無比我擊退,竟然依然一直挺進!我定睛一望,原來個兩條長而尖既野根本唔係手,而係兩條一青一紅既尖頭蛇!為左攻擊我,佢地既身體依家伸到好似間呎咁長!無論指尖血定係舌尖血,其實都只係對鬼起到作用,對於其他一切既生物黎講?普通液體黎架咋!而個兩條蛇既個個駝背老女人,唔使問,肯定就係百鬼中既蛇骨婆。
 
雖然我掛住法師個名,但絕對唔係只係識揮下符,UP下咒語咁簡單!我雙手擊出,以極快既手法徒手捉實雙蛇。哼,蛇骨婆,如果你用真蛇而唔係用自己既氣幻化而成既靈蛇,我諗你會死得仲慘,因為…因為我平時唔單止鐘意食蛇,仲鐘意親自捉蛇呀!!我將氣力快速集中係左右各兩隻手指上,對準兩條蛇既上五吋,下五吋,大力一掐!!兩條原本仲仍然想掙扎,想纏上我雙手既蛇當下立即停止扭動,死了。
 
哼,我諗阿明點算都算唔到我識捉蛇掛。我隨手掉低纏係手臂上既蛇屍,輕輕抽出之前出過一次場既毛筆。毛筆係代表鐘馗既聖器之一,請神除左講勢,仲要講形!有毛筆係手,意識單一既鬼就會將我幻化為鐘馗天師既樣,自然百邪不侵!
 
果然,一見我渣筆,百鬼中力量較弱既妖都開始有啲縮,只有當中既十部首依舊敢抬頭挺胸瞪住我。唉,連埋陰陽師,人地就一隊足球隊既人數,我就得一個,牌面就咁睇都已經有啲不利啦。望住佢地,我已經感覺到腦開始有啲變得空白,但係同時,我腦海中忽然隱隱約約泛起左一個「字」字。字?咩字呀!?我用力甩一甩自己個頭。唉,人一急,好多時就會諗到一啲奇怪野,多數仲要係一啲不必要既無謂野,但係,今次我覺得應該要信呢個「字」,就好似師父比我個「緣」字咁。
 




「上!」阿明發號師令,一聲令下,十部首當即空群而出!為首既正係以個鼻聞名既天狗,緊接住既就係二口女,火車頭等妖。氣勢凌厲,附近既空氣彷彿比佢地既殺氣強行壓縮成炮彈,不停向我猛轟!
 
面對巨大既威逼感,我腦海中既「字」字愈發清晰,心中慢慢開始明瞭到個字係表達啲咩,但係好似又未完全了解…唉,差少少…我仲差少少就諗到點解架啦!
「轟」!天狗以自己身軀為攻擊手段,打算直接撞落我到!緊接落黎既又係一聲清晰可聽既「轟」聲!不過今次既轟聲係由天狗同牆壁互憾而爆出。企係完地既我,右手依然保持住剛才一掌打出既姿態,渣係左手既毛筆依然滴住血水,而右手既手心就赫然多左個震字!