「錢家? 」我心生好奇,因為我從來都未聽過師父提及過御鬼門同埋本地大家族既任何恩怨,而同時,我都未係任何正式或者非正式既渠道中聽過錢家呢股人馬。 「嗯,Elaine就係錢家既二小姐。」師父點點頭,抬起手指一指個位女靈童。女靈童輕輕點頭,接過話題: 「你好,叫我Elaine得架啦,我係錢家僅餘唯一一個仲識通靈既女將。唔好睇我好似十五六歲咁呀,其實我成十九歲架啦嘻嘻! 」Elaine嫣然一笑,算係自我介紹完。語畢,就將目光放係我既身上,好似好期待我會接落去咁。我當下尷尬一笑,唯有講出自己既名,敷衍過去就算,始終,我既心機都係放哂本陰陽全書既下落身上,暫時唔係好想理其他野住,只係想快啲搵到本野。 Elaine風鈴般清脆既聲音再次響起:「不如我試下幫你地問下我既老豆啦,的而且確,呢個姐姐係受到陰卷中既詛咒影響,唉,我可以幫到幾多我就盡幫啦…嗯…之不過,我唔能夠肯定到底我地錢家仲有冇你地口中所講既陰陽全書,同埋即使可能有,我老豆都未必肯借出黎。嗯…聽晚啦,聽晚我同我老豆都會係鋪頭黎,你地到時再黎,我諗我講我老豆唔掂,但係睇在宇文叔叔既面子份上,有呢本野的話,佢都應該會肯借既!」 我聽到呢到,雖然知道有方法可能可以解決到眼前既困境,但係心中仍然係有一種唔係好踏實既感覺,好似有一股就黎收到考試成績既個種感覺咁,忐忑不安。坐係旁邊既師父稍加思考,就淡然開口道: 「麻煩哂你啦Elaine。我地聽晚會到,嗯…地址一樣嘛? 」 「一樣呀!紅磡老龍坑街公利!」Elaine微笑回應,笑得含羞答答咁又真係幾可愛,個形態就好似…好似一隻我識既鬼咁… 「得!黎,我送你出去,聽晚再見! 」師父係櫈上索利地企起身,幫Elaine開門,送走左佢。 【錢氏家族,祖上皆為北方倒斗之人,家族勢力係中國既民國時期仍至文革前都甚為強大,當時,佢地係北方倒斗一族中既大阿哥,族中發丘中朗將,摸金校尉,搬山道人不計其數,但與南方淘土一族既呂氏不和,經常係長江一帶因為盜墓既關係發生械鬥。時至今日,錢家既勢力亦因無墓可盜同埋據說係因果循環既關係而沒落,錢家依家勉強就只可以係紅磡老龍坑街打骰。】 「師父,錢家係…?」我等Elaine走左之後,始終都係按捺不住,開口問師父。咁至少要搞清楚,到底呢班人係忠定係奸先丫嘛! 「以前中國既盜墓世家,依家香港殯儀業既龍頭,成個紅磡都係由佢地打骰架! 」師父輕捋留長左啲既白鬚,若有所思輕嘆道。「唉,因果呀…以前盜人墓,依家就幫人做法事整墓…」 「咁…其實你請Elaine黎其實係咪一早知雨瑤出左咩事,你想借請人地黎名,做場大龍鳳,借走人地本書為實呀!? 」我不懷好意地對住師父奸笑,始終,我太熟我師父,雖然佢為人本性老實,但係慢慢地,佢都開始學到一啲係社會上生存既必要技巧,例如做戲。 「衰仔!關咩事丫!無巧不成書,真係咁岩架咋! 我係你心目中既形象未賤格到咁既地步,要呃個小妹妹下話!?!?」 一眨眼…一日咁就過去,雨瑤依然係迷迷糊糊,而我同師父檢查好保護雨瑤既陣之後就準備動身,前往老龍坑街。本身我有抗議,我覺得我地其中有一個人一定要留低睇住雨瑤,但係師父一口拒絕。佢解釋話佢留低,我又唔夠錢家話事人古惑,比人玩到都唔知咩事,入左老龍坑街就分分鐘出唔返黎;相反,我留低,雨瑤出左咩事我都係一樣幫唔到手,甚至會連我都比圍係雨瑤身邊既惡鬼玩,咁係個咁既兩難局面底下,倒不如就帶我出去見識下世面,速去速回仲好喎。 經過一程既車程,我地話咁快就企係話長唔長,話短唔短既老龍坑街既街頭。