那些年，當香港仲係百鬼夜行既時代 II: 47. 運頭塘村XVIII — 屍鬥

墓道中氧氣流量極低，而且有唔少分支路，唔打醒十二分精神就好易行錯路。所以唔單止我，連唔使控制靈屍既師父同Elaine都開始攰。就係我地想停低休息下時，打頭陣既我忽然見到遠遠好似有一道極微既光，係古墓呢種密封既空間正常黎講係唔會有光既，有光就代表前邊可能有人黎過，或者有另一班人係到。 唔通係福伯！？一諗到呢到，我當下立即倦意全消，打起精神，回頭向師父佢地打個手勢，示意佢地準備一下，同時又指示靈屍停低，免得太過接近福伯，令佢有機可乘可以趁亂奪回靈屍。我摸出兩道紅符，摸黑逐步逐步向著黑暗中既一點光進發。但係行得愈近，我就覺得愈奇怪。太靜。唔單止墓道靜到連我地既心跳聲都聽到，甚至連墓室中都係一聲不響。每趨近墓室一步，我個心就更沉，而且更聞到一陣愈黎愈濃既怪味。到踏出墓道時，我就完全知道答案！墓室中場面怵目驚心，我甚至嚇得倒退兩步，撞到Elaine！ 我眼前既墓室一片混亂，個啲既怪味原來係帶住濃烈臭氣既血腥味，胃中頓時翻江倒海，令我中欲作嘔！唔單止，墓室中到處都係由尚未乾涸既鮮血染成既玫瑰花，一朵又一朵，牆身彷彿就係個殺人兇手既畫布咁！斷肢，死屍散落一地，有啲死者甚至怒目圓睜，死唔眼閉！話呢到係人間煉獄都不為過！未曾見過此等大場面既Elaine早已經開始乾嘔，師父則係旁邊安撫佢。 我先叫師父佢地先退回墓道，企係一啲咁令人毛骨悚然既地方只會徒添幾分不安，令人隨時崩潰發癲！ 係退回墓道之後，我彷彿仲好似聞到個陣血腥味，雖然但係人已經可以慢慢冷靜落，慢慢平服一下。停低左接近十五分鐘，第一個平服到心情既我率先打破沉默。「你地點呀？好啲未丫？」Elaine輕輕點頭。本來皮膚已經白白淨淨既佢，比頭先既場景嚇到面無血色，成個人更似一張白紙。我見到佢口唇微張，好似想講啲咩，但係最後都係搖搖頭當無事。而師父雖然捉鬼軀妖無數，但係都好少見到有如屠殺場一般既畫面，故此佢都心有餘悸，但明顯狀態比Elaine更好。 「你地話...個班係咩人黎？點解佢地會...會死得咁慘？」我諗返起頭先個畫面，依然有啲激動，講野都唔係好靈活。 當師父想開口時，墓室中突然又傳黎一啲突兀既人聲同打鬥聲！我同師父雙目對視，抽出鐵鏟，吩咐Elaine唔好出黎，然後極有默契地從墓道跳出！第一時間映入眼簾既，竟然正正就係我地最唔想見到既福伯！ 但係此時既福伯全身都係血，甚至連衣服既原本顏色都已經比鮮血覆蓋哂！佢指揮住一隻殭屍，同緊一男一女浴血苦戰，而個兩個人都分別控制緊兩隻爛身爛勢既殭屍追殺緊福伯！我定睛一睇，咦？帶頭既男人唔係正正帶我地入村既何村長咩！？一時之間，好多問題係我腦海中彈出黎，到底發生緊咩事，點解何村長會同福伯打起上黎架，何村長又點解會識得控制殭屍！？ 「無可能！無可能！單憑你地何家區區幾條新煉成既屍，點解可以有咁強大既威力！」福伯反手一甩，一道黃色既符紙甩出，逕自飛往準備夾擊佢既何村長身上，而守護住福伯既殭屍亦與神秘女子所控制既殭屍對上一掌，福伯殭屍係力量上稍佔上風，女子既殭屍手臂一震，轟然向後倒下！同時，何村長不慌不忙，輕易而舉地避開左張符，右腳尖驟然點地，略施壓力，身軀就如一隻輕盈既飛鳥般，直往福伯背後繞去！福伯顯然無料到何村長有此一著，猝然以左手護頭，鏗地一聲，福伯既手就係電光石火之間，比何村長一刀劈斷！ 雖然環境極度混亂，但係福伯呢個老將又豈係省油既燈！？只聽到福伯大叫一聲，右手以迅雷不及掩耳既速度，將一道黑色既符貼上何村長心口，何村長頓時曈孔急劇放大，似乎唔相信福伯有此一著！何村長中符後倒地，佢控制既殭屍亦瞬間停下動作，神秘女子上前想扶起佢。而福伯無乘勝追擊，只見佢按住左手傷口，向後極速退卻。 雙方戰得如火如荼，甚至發現唔到我地呢兩個多左出黎既觀戰者。 「雖然我無左隻手，但係唔代表我就無哂戰鬥力！」福伯頹然靠牆而坐，拎住白色既攝魂鈴，猛力一搖！身邊既殭屍頓時往前躍，呢一跳竟然橫越左成四份一個墓室！ 「哼！」神秘女子冷哼一聲，竟然同時變出一個沾上血既攝魂鈴，同時亦係猛力一搖！