[刺客教條][長篇故] 果晚玩完刺客教條，家姐同我講……: 第121章：車呢？

第121章：
 
在跟《聖音騎士》成為了合作的關係後，我們迫不及待的共同進行第一項任務，就是搜集合成結界終端機用的零件。
大家都分成好幾個小隊，各自去找相應的零件，然後再回到音樂酒吧再進行合成。
 
在這個時候，剛剛出門的我和游也多在門外正相討現在應如何開始任務。
 
「呃……我地宜家去邊個結界﹖」我問。
 
「如果我地要去搵天線返黎，就去香港最高嘅地方，大帽山。」游也多說。




 
「但係乜天線唔係求其一個結界機都有咖咩﹖點解要去到咁遠﹖」我問。
 
「你係咪戇鳩咖﹖咁冇理人喺人多出名嘅地方去攞咖嘛，咁易比人發現……何況全香港最高嘅地方，接收能力一定好啲啦。」游也多說。
 
「你就戇鳩，大帽山唔出名嘅﹖其實我知道西貢係有一個結界喺入面，去果個會唔會好啲﹖」我提議。
 
「西貢咪一樣咁出名……」游也多說。
 
「就咁話啦，一黎果度比較近，二黎又唔會話太多人咁……」我說。




 
「好囉，你係刺客大師，你話事。」游也多雖然沒有用不屑的語氣說，不過態度依然讓人生厭。
 
「咁……宜家呢個鐘數，可以點去啊，刺客大師﹖」游也多問。
 
「咁……我諗除左揸車都冇第二樣啦。分分鐘的士都可能唔載添，以為我地係鬼。」我說。
 
「車呢，大師﹖」游也多問。
 
我沒有回應，在街上，我走到一輛舊款的私傢車旁邊，幸好它不是用搖控鎖，所以我很容易的就用我的袖劍打開了車門。




我自豪的看了游也多一眼，然後踏上車子的副駕座。

「你做咩坐隔離﹖唔係你揸咩﹖你唔係以為我識吓嘩﹖」游也多問。
 
「我都冇車牌嘅……」我說。
 
「你冇車牌學咩人講揸車啊﹖﹗」游也多說。「點解咁都做到刺客大師……」她埋怨。
 
「我有去考咖，不過肥左咋嘛……」我尷尬的說。
 
「考車都肥﹖﹗哈哈哈，你係咪男人黎咖﹖不過都係嘅，你咁都做到刺客大師，就算比你考都，街上面就多個計時炸彈喇。」游也多諷刺的說。
 
每當一個男人，被別人，尤其是女生問「你係咪男人黎咖﹖﹗」的時候，他的鬥志就會幾何級數的上升，以表示作為男人應具有的能力。
 
所以我就說：「好﹗咁我揸囉……不過你就唔好坐喇，廢事炸親你。」




 
「咁你自己去搵囉，睇你搵唔搵到……」游也多不屑說。
 
我回到駕駛座，關上車門說：「好啊，開車咖喇。」
 
還以為游也多真的會自行想辦法去或者就這樣回去，豈料她把另一邊車門打開了，並坐在副駕座：「哎，廢事你入左去出唔返黎，或者搵極都搵唔到喇。」
 
「好彩，唔係真係走左去姐……」我鬆了一口氣的說。
 
「咁係咪好想我走啊﹖」她問。
 
「唔係唔係，邊會想你走姐，仲需要你咖嘛多姐……」我尷尬的笑著。
 
「咩多姐啊，真係好難聽啊，開車啦。」她說。
 




「噠，噠，噠」說罷，我用袖劍插進鎖匙口，開啟了引擎，就踩下油門離開了。