第148章:
 
游也多離開後,我們整晚都沒有說過一句話。不過始終我都需要知道真相,否則如果她或他們果真要對我們不利的話,僅餘的刺客兄弟會成員就會灰飛煙滅了。
 
吃喝玩樂了一整天,這天都算是近年來最快樂的日子之一。
 
「好喇,我地訓先喇,大家早抖喇。」我說。
 
分配好睡覺的位置後,大家都分別做自己的事。
我當然睡在自己久違的房間裡,不過這次空間變得有點狹窄,因為同床的還有露比。




 
「長長……我訓唔著啊。」露比在我旁邊說。
 
「點解啊﹖係咪同我一齊訓好緊張啊﹖」我笑著問。
 
「車,邊有緊張喎,係因為呢排咁緊湊嘅生活突然間咁平靜……有啲唔慣咋嘛。」她說。
 
我打了個呵欠,然後再說:「咪就係呢幾日都冇得好訓,咁攰點會訓唔到咖。」
 
「唔知啊……」露比一邊滑著手機一邊說。




 
「唔好睇電話啦,碌下碌下就訓得著咖喇。啊,試下窒息呼吸法啦,聽人講會易訓著啲。」我提議。
 
「哈哈哈,傻仔,窒室點呼吸啊,明明人地好似叫窒息睡眠法。好啦好啦,我試下啦。」她回答。
 
當然,我都一樣,儘管筋疲力盡,但是這種反差真的讓人睡不著。
所以我都加入窒息呼吸……不,是窒息睡眠法,只需吸氣、閉氣和呼氣就能放鬆身心安然入睡。
 
呼……呼……
 




「唉,都係訓唔著,出去飲罐啤酒先。你要唔要啊﹖」我問。
 
「唔喇……我驚賴尿。」露比說。
 
客廳早已經關了燈,我放輕腳步慢慢走向廚房,因為和人和阿純是在客廳睡覺,其餘的人都在伯父伯娘以前的房間裡。
「砰」的一小聲,光源隨著雪櫃門打開時成為了整個廚房的光源。最喜歡放滿東西的雪櫃,以前不時都會打開雪櫃,即使裡面沒有自己想要的東西。
我隨隨伸手從雪櫃中拿了一罐啤酒,然後靜靜的走出露台,慢慢的細喝。
 
「吓……飲返杯冰凍啤酒,高歌一曲氣量厚……」雖然想高聲唱出來,但是夜闌人靜,獨自歸家……不不不,夜闌人靜,為免被樓上樓下投訴,我還是靜靜的坐在露台外的躺椅,望著大廈、僅有的星空靜靜的喝。
 
「過黎啊,我地宜家講清楚佢……」突然在我背後的屋內傳出兩人竊竊私語的聲音。
 
我探頭一看,只見阮桐貴和游也多在拉扯,似乎在傾談什麼的,不過他們亦知道不能把其他人吵醒,所以阮桐貴做了一個指向上的手勢,表示他們先到天台再談。
既然他們沒有發現我,待他們打開門出去時,相隔數十秒,我也隨後跟上,果然就跟他們上了大廈天台。
我蹲下,並貼著天台出口的門旁邊,嘗試偷聽他們說的話。




 
「有咩講你宜家好講喇……」游也多說。
 
「唔使咁驚嘅……呢度室外我都唔會對你做啲咩。」阮桐貴說。
 
「驚你老味啊﹗上次好彩阿隼趕到咋,如果唔係比你屌左啦﹗」游也多說出的竟然是一件我想不到的事。
 
「係果條仆街阻住曬姐……宜家連果個守衛都死左啦,唔會有人知咖。」阮桐貴說。
 
「宜家唔係有冇人知嘅問題囉,問題係……係無錯,你係好好嘅隊友,但係我係冇諗過會同你任何一個兄弟一齊囉。屌,總之,你明唔撚明啊﹖阮桐貴啊……你做咩仲要繼續幫聖殿騎士佢地奶袋底,你唔係都想改變佢地咖咩﹖」游也多問。
 
「咁點解要幫刺客奶袋底﹖係咪因為果個阿隼﹖我唔會比佢接近到你咖,因為我鍾意你啊……」阮桐貴突然表白。
 
「痴撚線,關咩佢事姐﹖估唔到平時見到正正常常咁,原來都係痴撚線嘅……咪撚講咁多,一係sa個冧我可以當咩都冇發生過,一係即刻同我躝屍趷路﹗」游也多正想轉身離開,可是卻被阮桐貴拉住。
 




「我唔會走咖,我係唔可以睇住你地比班刺客洗腦咖﹗唔得啊唔得啊﹗」阮桐貴突然發狂的叫嚷。
 
「縮開啦﹗」游也多掙扎著。
 
「喂,你好停手喇喎。」事情快到了一個失控的地步,我唯有及時走出去阻止,否則後果不堪設想。
 
「阿隼﹖﹗」他們同時望向我。
 
「乜你喺度咖﹖即係你聽到曬啦……」阮桐貴指著我說。
 
「係啊,我係聽到曬啊……我都估到你有啲古怪咖喇,但係估唔到你係個咁嘅人。」我說。
 
「既然係咁,我都唔隱暪喇……係……其實我一直都唔係同你地同一陣線,只不過同游也多你地幾個一齊得耐唔係咁捨得。」阮桐貴和盤托出。
 
「咁你一直扮野,只係上頭嘅意思﹖」我問。




 
「講到明就譖啦。」阮桐貴說。
 
突然間,身邊刮起一陣風,游也多趁阮桐貴一鬆手就跑過來我這邊。
 
「既然比你地發現左,我都唔繼續留喺度喇……」阮桐貴說罷,正想仿效蜘蛛俠似的離開。
 
可是我和游也多當然都沒有放過這個機會,她說:「真係要搞到咁撚樣咩﹖有咩事點解唔一早同我地傾﹖」
 
「仲有邊個係你自己友﹖」我問。
 
可是他沒有回應,就飛盪離開了。