樓奴: (13)

阿權:”其實, 我係住係個怪物對面單位光華苑52樓H, 原本對面單位係租俾一家人, 都好好地既, 唔知咩事, 呢家人租約未完就俾業主趕走, 佢地走時都話租樓最麻煩既就係俾人加租同埋要成日搬屋, 每一次搬屋煩到死已經唔好講, 仲要晒時間晒錢買過D傢私, 有仔女又要搵番同區樓, 仔女撞岩要考試就連溫書都冇心機…租樓真係好鬼煩…就係呢家人走左之後, 呢個怪物就搬左入去, 佢本身已經怪模怪樣, 係唔知佢竟然係一隻惡毒既妖怪! 回想當日…”
 
“我老婆叫劉新悠, 新移民, 做sales, 佢見對面隻妖怪咀唇上面好多唇毛, 雖然一把年紀, 但不竟都係一個女人, 都要注意下儀容架, 又加上當時佢要跑數, 就試下向隻怪物落下咀頭, 希望佢買少少product…”
 
劉新悠按鐘:”婆婆…婆婆…我係對面屋架…”
 
隻妖怪從來好少開門, 佢竟然開左條門隙望一望劉新悠然後開門
 
劉新悠:”婆婆呀, 我叫新悠呀, 係對面屋架, 你介唔介俾我入一入黎呀, 我見你一個人住, 大家係左鄰右里, 要互相照顧架…婆婆, 你點稱呼呀…”
 




個怪物一路答佢一路開門:”方…你叫我方…婆婆啦…”
 
劉新悠:”方婆婆…你好呀, 你一個樣住架? 好少見你出去既? 不如咁啦我多D過黎坐, 同你傾下計啦…”
 
個怪物望住著住白色貼身褲既劉新悠行入屋, 一股迷人既香氣飄過,已經High到忍唔住緊跟其後…
 
劉新悠:”婆婆…你間屋都幾簡…潔喎…冇傢私既…”新悠開始有D驚, 續講:”哈哈哈…婆婆呀, 女人咩年紀都要注意儀容架, 例如好似我咁, 你唔好見我咁fit, 我生左兩個架喇, 好彩我有食呢隻F&X丸丸, 食左真係好, 我生完之後日日食佢, 日日同自己講幾十次我要消脂我要健康, 咁我咪fit番晒囉, 拿拿拿,仲有, 你咪眼甘甘望實我對42吋長腿呀, 我成日著呢D窄身褲, 對女性敏感部位做成磨擦, 會令膚色變深,我用左呢隻叻切神潔膚水, 真係連比基尼位都靚晒, 拿仲有呀, 唔只比基尼位喎婆婆, 仲有呀, 我已經全身都做晒Domust呢個激光永久脫毛療程, 真係好滑…好正…你都攪攪你…咀唇上面…D鬚…唔係…係唇毛”