自從那一天，我改變了: 第三章 (9)

~「你地係咪覺得好驚訝呢？」
「你地背叛我……」
「背叛？我地本來就係凱果邊嘅人。」
「林優，今次你徹徹底底咁輸咗！」六人組其中一位和盤托出後，凱開始總結一下。
「你輸嘅唔係頭腦，而係信錯同伴。」凱同我講。
「其他人，攞走佢地部電話！」於是幹部從我地褲袋裏掏出電話。
「但喺你死之前，我有條問題想問你，你生存為咗咩，你又為咗咩而生存至今？」
「估唔到連高高在上嘅你都要問一啲咁有趣嘅問題。好……」我對佢嘅問題感到不屑。
「喺呢場死亡遊戲未開始之前，我就讀一間Band 1中學，根本唔係擔憂成績以及前途嘅問題，而且屋企仲貼錢俾我讀大學，甚至我父母都做政府高官，唔做醫生律師都可以透過人搭人做官，根本唔係憂柴憂米，為咗享受呢種榮華福貴，我當然唔想死。
但係有錢又點，人一死，乜野都化為烏有，什麼名與利，一一都唔可以帶入棺材，呢啲物質享受根本唔珍貴；自從開始咗呢個遊戲，我遇上同伴，佢地徹徹底底咁改變咗我。我林優背負住好多人嘅性命，背負住責任，我想保護嘅人，我深愛嘅人，支持我嘅人……佢地係我生存嘅理由！




你呢，凱，咁生存又為咗咩理由？」
「我，本來同你差唔多，都一樣重視名與利，但自從呢場死亡遊戲開始之後，發現人一死，錢財只係身外物，而我看透了人性百態。有醜陋的，有美麗的。我……則非常信任我嘅同伴，即使到死果一刻，我都對佢地不離不棄，訊帶一提，佢地十二個都係『吊頸遊戲』嘅生還者。」
「本來我地已經歸西，凱哥代替我地上舞台估字，咁當然佢一隻字都無估錯，但當估到最後一隻字，佢叫哂我地上台估埋最後一隻字，結果彩華判定我地全員生還……」
原來彩華之前提及嘅「參與」呢指呢回事……
「我地條命係凱哥執番嚟，所以……所以……我地係唔會背叛佢，以死報答佢……」凱身旁嘅幹部邊講邊喊出嚟。
雖然凱哥有佢信賴嘅同伴，但我地果邊一樣都有。原來我同凱諗法不謀而合，甚至連生存方都一樣 – 犧牲他人來成全同伴！
「我仲未輸，好似你咁講，我相信我嘅同伴。」所以我係唔會死喺到。
生存人數：22
優勝人數︰6