逆向思維: 後記

終於都寫完呢部三萬字既處女作啦。
真心好滾動。 回想起係十一月中果陣就係因為一個古怪既念頭而令到我呢個放低左枝筆好幾年既人拎返起枝筆， 硬著頭皮咁寫左呢個故。
 
雖然我都知個故唔是太多人睇， 但係都好多謝高登咁多位巴絲既支持。 其中最想多謝既係流主巴打。 我呢個新人一開波寫野無人回無人推無人睇既時候係佢俾到小弟好多支持。 之後仲要不停咁同小弟一齊研究個故事， 係post道回左各種意見諗法， 令到好多巴打都開始討論起上黎。 真心俾到好大鼓勵我。
 
呢個故事其實除左推理之外， 都想帶俾大家一d我既諗法同埋價值觀。
 
因為而家既香港我實在係覺得太奇怪了。
 
香港就好似個系統咁， 而我地就係咁多個玩家既其中之一。 有d人一出世就有特別身份， 有d就注定一世平民。 系統亦都俾左好多規則我地去守， 好似唔守既話就會死咁。




 
就係因為無人質疑過d規則， 無人敢去take risk試一d新既野， 先會攪到每個人都好似魔鬼咁， 迫住要殺人， 設計， 或者去玩個遊戲。 就算到左遊戲既最後， 你能夠好彩汁返條命， 但你都唔是贏家。 最後真正嬴既仍然係系統， 仍然係果個乜鬼[暗影]。
 
小弟既文筆自問唔是好， 而且描寫方面亦都唔係太出色。 好多我想表達既人性可能未必真係呈現到係大家面前。 所以而家請大家花多少少時間睇埋下面既野佢， 聽下小弟發up風。
 
先講講主角陳大文。 原本係一個普通上班族， 答左條唔知乜iq題就變左遊戲既平民， 之後仲做埋設計者。 雖然故事入面既佢好似幾醒， 但係佢都係俾人牽住個鼻走， 而且差d就成為魔鬼。 天使同魔鬼真係可以話係一線之差。 如果唔係阿欣既死， 我諗佢到而家都仲可能係個變態幫兇。
 
之後到藍天， 一個所謂殺人犯。 其實呢個角色係同王經理既角色做一個對比。 小弟想表達既其實係「唔好單憑感覺或者身份去judge一個人「。 故事入面既藍天沒做錯過野， 心地都算善良， 但係就係個殺人犯。
 
相反王經理自私自利， 又無憐憫之心， 同藍天簡直無得比。 但係佢偏偏係陳大文上司， 仲要係一個無負擔既中產人士。 就好似係香港入面1D所謂既既得利益者。 佢地但求三餐溫飽， 得過且過。 呢種人唔求進步， 唔會去爭取， 剩係識得一味附和， 對個社會既感情就只係得錢。




 
最後到陳怡。 一個俾仇恨攪到變成殺人魔既可憐媽媽。 小弟覺得每個人心入面其實都有陰暗面， 可能都對某d野仇恨十分。 但係要記住千奇唔好俾仇恨蒙蔽到理性既眼睛， 亦都唔好不停咁供養仇恨呢隻殺人魔。 因為當有一日你發現到仇恨已經大到你都控制唔到既時候， 就一切都已經太遲了。
 
最後希望大家睇故愉快! 之後都繼續多多支持小弟!

http://forum10.hkgolden.com/view.aspx?type=SY&message=6141318&highlight_id=0&page=1&authorOnly=False <-係紙言睇文既各位都可以睇返高登唔同巴打對於案件既分析, 全靠咁多位巴打既留言同支持小弟先寫得完個故事. 多謝大家#HOHO#
 
敗筆