【驚慄】《冥婚：血紅色的裙褂》點解會係我同你？: 十一、儀式
十一、儀式
身穿紅衣但赤腳的寶賢居然在眾人面前，一刀刺死自己！
「寶賢！」敖正宇崩潰大叫，可是已經阻止不了寶賢的死亡。
現場一片混亂，猶有餘悸的藍朗蕎這時環顧四周，她實在很害怕，恐懼讓她覺得時間變慢、聲音變細，這是她有生之年第一次遇見這些事情⋯⋯
藍朗蕎走到一旁休息，大口大口呼吸著，她深信只要休息一陣子便會安全無事。而嘉駿、汪蔓渟也忙於處理敖正宇及寶賢的屍體而沒空理會她。
「命中注定⋯⋯哈哈⋯⋯避唔過避唔過⋯⋯哈哈哈哈哈哈！」忽然藍朗蕎身邊傳來一把陰森恐怖的老女人聲音！
藍朗蕎看去附近，竟有一個披頭散髮的老女人正在觀望著混亂的人群，可是她臉上卻是瘋狂而扭曲的猙獰笑容！
「哈哈哈哈⋯⋯哈哈哈哈⋯⋯」她仍然在瘋狂失笑，令藍朗蕎心中一寒。她不禁在想，這個到底是什麼鬼地方？
「蕎姐姐！」汪蔓渟終於發現藍朗蕎不在人群中而出來找她，當汪蔓渟看見那老女人時，馬上將藍朗蕎拉走，神情緊張。
「佢係邊個來？」藍朗蕎輕聲問汪蔓渟。
「佢咪就係孫老太，上一任冥婚新郎孫洋個媽媽囉！自從佢個仔冥婚死左之後就變成咁喇⋯⋯」汪蔓渟說，藍朗蕎聽後，心中不禁替孫老太難過。
-
瘋狂的一天過去了，當地的警局只視寶賢的死為自盡便結案了事。
嘉駿、藍朗蕎和汪蔓渟則聚在酒館的房間商議下一步該如何著手調查。
「寶賢死既時候，同郭小蘭都係一樣著紅色既裙褂，而且都係無著鞋⋯⋯」嘉駿說。
「咁郭小蘭好有可能都係因為想好似寶賢咁同冥婚儀式對抗？」汪蔓渟說。
「有可能，寶賢咁樣自殺絕對唔正常，我懷疑佢應該係見過好可怕既野，又或者係畀人落左咒，而落咒果個人好有可能就係陳影紅。」嘉駿分析道。
「咁我地應該要點樣查落去？」汪蔓渟問。
「不如⋯⋯」是良久沒作聲的藍朗蕎。
「去搵下孫老太。」藍朗蕎說。
-
汪蔓渟帶領兩人前往孫老太的住處，跟陳影紅的不同，孫老太只是住於簡陋的小屋，鄰居也沒多個，可能因為她已經變得瘋瘋癲癲的緣故吧？
「咦⋯⋯門都無閂⋯⋯」汪蔓渟帶領兩人走到孫老太的家門前，發現孫老太並沒有關門。
「佢好似唔係屋入面？」嘉駿瞄了瞄裡面的說。
「蕎姐姐，其實你真係覺得可以係孫老太到問到資料？佢都⋯⋯傻傻地架喇喎⋯⋯」汪蔓渟說。
「我覺得佢知道，佢一定知道冥婚到底係咩一回事⋯⋯我覺得我地要搵佢。」藍朗蕎說。
「洋！係咪你呀？洋！」他們回頭望，竟然是孫老太在叫道！
孫老太沒有理會藍朗蕎和汪蔓渟，卻是衝到嘉駿的面前。孫老太一臉感動、百感交集的看著嘉駿的臉，她甚至眼泛淚光，實在讓他們都大惑不解。
「你終於返來我身邊喇⋯⋯仔，阿媽今晚煮好野過你食！」孫老太興奮的拉著嘉駿跑進屋內，眾人也只好一同跟往。
他們坐在小屋的飯桌，藍朗蕎留意到四處都擺放著一個年輕男子的相片。藍朗蕎心頭一震，因為讓她驚訝的是，她居然見過這個男子⋯⋯
「呢個就係孫老太個仔，孫洋。佢係上次冥婚既時候，就同一個叫方允兒既女仔冥婚，最後死埋⋯⋯」汪蔓渟說。
「孫老太一定係愛子心切先認錯你係孫洋，你都唔似！」汪蔓渟說。
「佢個仔都眉清目秀丫⋯⋯」嘉駿說。
「不過佢個仔得一隻手架呢⋯⋯」汪蔓渟說，震驚了藍朗蕎！
「同佢冥婚果個方允兒就聽講幾靚，不過最顯眼既係佢頭髮有一執白髮，好特別！個陣佢死，聽講好多人都話好婉惜，話佢係幽山村咁多年來最靚既女仔⋯⋯」汪蔓渟繼續說。
藍朗蕎呆住了，原來她的夢境似乎是真實的，在山神殿被怪物奴役的正是孫洋和方允兒，所以他們才會穿著裙褂和喜服！
「飲住湯先！我整好味野畀你地幾個食！」孫老太從廚房端著兩碗湯出來。
「孫老太！唔使麻煩你喇⋯⋯係呢，我地有事想問你架。」嘉駿說。
「你做咩唔叫我做阿媽？仔？你係咪仲嬲阿媽當時無救你呀⋯⋯對唔住阿仔⋯⋯」孫老太哭著說。
「孫老太！我唔係阿洋呀，我係阿洋既朋友呀！」嘉駿連忙說。
「係呀係呀！」汪蔓渟連忙附和。
「真係？」孫老太狐疑的打量了兩人，不過很快便釋疑。
「係喎⋯⋯哈哈⋯⋯係我太掛住我個仔⋯⋯佢好乖架⋯⋯」孫老太說著說著眼眶又濕了，令人心痛。
「係呢，孫老太，我地想知有關⋯⋯有關冥婚既野⋯⋯」嘉駿問，孫老太立時臉色一變。
「你地做咩咁問⋯⋯我唔知架我唔知架⋯⋯」孫老太驚慌的連忙搖頭耍手。
「孫老太，求下你幫下我地喇！」汪蔓渟說。
「唔⋯⋯」孫老太還是想拒絕，不過她覺得嘉駿是孫洋的朋友，又不想讓嘉駿失望，於是心頭一轉，決定相告。
「等等呀，唔好畀人聽到呀，聽到就死喇！」孫老太緊張的說，然後連忙關上門窗，令嘉駿、藍朗蕎和汪蔓渟都緊張起來。
「你地聽完唔好講出去呀⋯⋯知唔知道呀？」孫老太輕聲說，三人連忙點頭。
於是，孫老太便將冥婚的事，娓娓道來。
「幽山村幾百年來，都有個習俗，就係每二十年，都要挑選一對男女進行冥婚，冥婚既男女完成婚禮之後都要死架⋯⋯」孫老太說。
「二十年前⋯⋯佢地揀中左我阿洋仔同埋方家個女做新郎新娘，我個陣不斷求個個女人放過我個仔，同佢講我做咩都得，但係個個女人叫我放棄，又話我唔可以阻止冥婚、唔可以逆天而行，如果唔係呢條村就會世世代代遭殃！到最後，我都救唔到我個仔⋯⋯佢行完禮之後就飲毒酒死左⋯⋯」孫老太哽咽的說，他們都知道孫老太口中的「個個女人」就是陳影紅。
「之後個天頻頻落大雨，附近仲有山泥傾瀉，個排個天都好黑好黑，好似黑暗吞噬左太陽一樣，之後就傳出個個女人既囡囡仲有文家既仔，竟然一齊失蹤，佢話係畀山洪沖走左⋯⋯哈哈，一定係報應⋯⋯佢壞事做盡抵佢絕後！」孫老太的面目又變得猙獰起來。
「點解⋯⋯要做呢個冥婚儀式？你知唔知？」嘉駿問。
「個個女人一直都係代言人，而呢個冥婚，其實係一場儀式⋯⋯係將死去既新郎新娘既靈魂獻畀山神，等山神照顧我地呢個小鎮！」孫老太說。
「咁即係⋯⋯揀人做新郎新娘個個，唔係陳影紅，而係山神？」汪蔓渟問。
「無錯⋯⋯山神只會同個個女人溝通，由個個女人通知班長老，然後就執法⋯⋯」孫老太說。
嘉駿、藍朗蕎及汪蔓渟面面相覷，一時間難以接受這個真相！
「唔好意思⋯⋯孫老太，我唔係太舒服，我要走先！」藍朗蕎起身便走，嘉駿和汪蔓渟馬上匆匆跟孫老太道別便走。
「喂！得閒返來飲下湯呀！洋仔朋友！」孫老太望著遠去的三人大叫道。
-
「蕎！」嘉駿拉住半跑手走的藍朗蕎的手臂，不讓她再亂走。
「做咩事？你做咩咁既樣？」嘉駿問，只見藍朗蕎不斷在顫抖，是因為極度的恐懼和不安⋯⋯
「我⋯⋯我見過孫洋⋯⋯仲有個山神⋯⋯」藍朗蕎說，令嘉駿和汪蔓渟呆倒當場！
-
孫老太收拾著家中的碗碟，忽然一個人步入了她的家。
「順利？」那人聲音陰沉的問道，孫老太那傻懵的樣貌忽然一變，變得異常邪惡。
「順利，佢地一定會繼續查。」孫老太說。
「咁就好，我地既計劃唔可以出任何差錯，如果唔係，你就報唔到仇。」那人說。
「無錯⋯⋯佢地係時候要還返條命出來喇⋯⋯」孫老太陰險的說。
未完待續