【明明就．分手了】: 7

【明明就．分手了】

７

「今次掂喇！上次我地見果間輝立，應該番到七，八張單！」栢耀在公司拍着我肩膀振奮地說。

「咁好？」我說。

「距離擎天半島又近一步！」



「唔…唔…」

「喂，你條女果邊點呀？」

「都係之前咁啦，有時番下黎，有時出下去咁啦…」

「唔掂喎咁樣！」

「係…係…卦…」



「喂，上去抖抖氣。」栢耀比了個手勢。

沿着後樓梯走上天台，這是我們煲煙的老地方。

「始終係前度嘛…唔通我掉曬佢ｄ野落街咩。」

「我覺得你比人搵緊笨七咁！」

「講我都講過喇，叫佢快手執走曬ｄ野…佢有時幾晚都唔會上黎，有時星期五晚飲完野又上黎訓下…
我承認，都幾影響到我…」



「你條女做行街sales架何？」

「係呀…係…之前條女。」

「超！咪係囉，你果到真係岩曬！約左客未夠鐘就上去hea下。幾好呀！」

「唔…」

「又知你一定唔會話佢ｄ乜，知你心軟！你話喇，比你，你會唔會搵到個咁好既地方？」

「係有…就好喇…」

的確，如果有的話，可以這樣無條件使用，交通又四通八達，又可當儲存倉，
要打發時間時上去歇歇腳，看看電視，為電話差差電，補補妝…毋須趕頭趕命…



或許…我應該狠心一點…

「ｄ女人真古惑！」栢耀推開天台門。「今晚，帶你上去揼個骨哩？試新場！全９０后！」

還沒完全踏出天台，我們就被眼前的景象打住了腳步，嚇了一跳。
只見天台石壆上站着一個西裝骨骨的年輕人，他正背着我們，只差一步就踏出四十層樓的半空中。

「喂！喂！同事！有事慢慢講！冷靜呀你！」栢耀大吼道。

那同事回頭，頸上繫着我們公司的工作證。是隔離Team的新仔漏口輝。
他經常被同事恥笑排斥，說話嚴重口吃及速度緩慢。

「煙…煙…煙…我想…食…食支…煙…」



「食煙咪幾好囉！拿！有事慢慢講！落番黎先！」

「我…」

「係咪俾Team Head屌呀？喂！唔緊要架喎，呢度果 個都係咁樣屌大架啦。人工包架，無野喎。」
栢耀打算以快打慢，不待他有任何負能量之說，一輪咀說着，並逐步靠近。

我跟在他背後，不敢輕舉妄動。人命關天，我們眼前的漏口輝離死神只有一步之差。

「我知…ｄ人成日笑你漏口呀嘛！話你入錯行，話你鈍，佢地真仆街，拿，你落番黎，我地兩個同你慢慢拆掂佢！」

漏口輝空洞的看着我們。

「你諗下你女友，見到你咁樣，佢點呀？關心你既人點呀？」



栢耀果真很適合當保險從業員，口若懸河，未有給客戶反駁提問的機會。

「我…我…我無…女朋友…」漏口輝斷斷續續的把話說完。旁聽也感吃力，望着他眼神，格外淒酸。

他喘着氣。

「無女啫！唔緊要喎，幾自由呀。想做乜就做乜…」我本想勉勵他，卻發現詞彙接觸風向後稍稍偏差了。

栢耀回口過頭來，怒盯了我一下，示意我不要插咀刺激到他。

「Fine, 我off」我雙手舉起比了個手勢。

「我…我…就係…想做…做乜…都…都做唔到…」
漏口輝激動起來，句與句之間的停頓更長，換氣更加用力。
整個身子在不到兩呎寬的石壆上搖搖欲墜，霎時險象環生！



「喂！o靚仔！你唔好睇我風風光光，我都好撚慘呀！少年，你太年輕喇！
個社會係咁九殘忍架啦，你呢ｄ算得係乜？你有無試過比ｄ闊太玩屎忽呀？」栢耀忙亂中激動地咆哮。

風也好奇地停止了半响。

鳥歇下來靜聽。

漏口輝聽到為之一征，當然，栢耀這番言論也太過出奇不意了。

我暗自先鬆一口氣，剛才如果他聽了我的話後就一躍而下，
當場斃命，我豈不是變相殺了人？想起也叫我毛管直豎。

「你試過？」漏口輝出奇地問得利落。明顯，栢耀成功挑起了客戶的好奇心，
能挑起客戶好奇追問，就等於掌握了七成勝算。

是…是那一課堂曾經教過的呢？

「我問你！三十萬支票放係面前，要同兩個呀姑仆野，被佢地玩屎忽，你點揀？」

「我…我…我…」

「要？定唔要？」

「我…我…」

「三十萬，夠你響到做一年喇！細侄」

「駛…駛駛…駛唔駛…用…用…用口…口？」

栢耀沒有說什麼，只耍了一個無可奈何，共勉之的表情。

我覺得這個表情有點帥，那絕不是演技，是實際歷練來的滄桑。
這段經歷，他也未曾向我提起過，三十萬…換了是我，我會如何選擇？

栢耀已步近漏口輝的身旁，扶着他走下石階。

「好…好…多謝你地…從來無人同…同我講過…呢ｄ說話…」漏口輝感激的說着。

「傻仔黎既，駛鬼咁睇唔開。」

「不不過，你…你地誤會曬喇…我唔係諗住…跳跳樓呀…頭先諗住上黎…煲煲煲煙…支煙…
呼一聲…吹左落街…我走近一睇…比我發現…對對面…多左張好靚既海報…我見咁岩…簾篷遮住左…
咪企…高ｄ睇囉…跟住…你地就衝入黎…一一一輪咀喇…」

接下來的時段，栢耀揪出了漏口輝的祖宗來問候，連珠發炮，
平平仄仄平， 鑑鏘有力，擲地有聲，險些就把他推下樓去。

我點燃起香煙，煙絲沙沙作響。我同樣站上石壆上，遠眺那究竟是什麼樣式的海報。
微風輕刮，險些把我口中的煙吹落四十樓層的上空外。

原來，是韓國女子組合少女時代的特大型性感海報。上面正宣傳着她們的新碟發佈日期。
旁邊的標語為：「為了 ____，你可以去到幾盡？」

哈哈…這好像是抄襲我們港人的創意。

那個 ____，有人說上車，有人說食女，有人說加薪，有人說特首下台， 有人說着夢…

晴空萬里的天台上，吹起一陣陣薄荷煙霧，飄得不高，很快被風吹散。
我們三人俯瞰着香港的心臟地帶，西裝友在路上急促飛馳，車輛的響安聲沿途示威，
滿街途人像是追趕着什麼，但稍一在紅綠燈前停下腳步時，卻發現，什麼也趕不上。

中環，是一個悲情的地方。

往後每次看到栢耀下巴位置的暗瘡時，我就明白到，
在大世界中，比我努力的人比比皆是，去得更盡的人大有人在，
我，算得上什麼？

三人就這樣一言不發地渡過了一個難忘寧靜的煙 Break…




中環塔倫天奴：http://www.facebook.com/liveincentral