之前來的時候,因為是一整班,所以選擇乘搭普通船的普通位,船程因而增長了大概二十分鐘。
今次我和方晴選擇了高速船,船程縮短至三十五至四十分鐘,希望情況會更好。
.
上船後,我們選了上層較中間的位置。方晴選擇了近窗邊的位置,我當然坐在她身旁,而Carrie竟然也擠到我身旁。
.
「Carrie,不如你坐後面個排?咁樣我會好逼」
「咩姐,人地已經唔介意你左擁右抱,你仲想點?」
唉,我真的鬥不過她。
「方晴,快啲食左粒藥,唔係等陣又會暈船」
.




船開了不久後,方晴就捉一捉我衣袖,好像有事想跟我說。
「呀駿,可唔可以借個膊頭俾我?我有啲攰想訓陣」
我打了個OK的手勢給方晴,我倆如此秘密,當然是因為旁邊的那一位…
.
當方晴的頭倚在我的肩膀時,心想這個旅程真的要完結了。
很短的一程,但已經和她經歷了很多事情。
在回想的時候,我也開始覺得有點累,頭也慢慢倒下,剛好疊在她的頭上,聞著她的香氣。
雖然身旁好像有人在吵鬧,有人在搖我,但我還是不顧週邊,慢慢地睡著。
.
「渡輪即將到達中環碼頭,請乘客收拾個人物品…」




.
「唔~」
我終於醒來,伸了個懶腰,同時也弄醒了方晴。
「唔~到喇?」
「係呀!你兩個終於醒喇!你地就開心喇!」Carrie不爽
「你又係度講咩呀?」
「你個衰人,成程船都無理過人,枉人地仲特登陪你行咁遠,我嬲呀!」
「哦~」
「我走喇!你唔好追黎呀,你真係唔好追黎呀!」
「你真係唔追上去呀?」




「唔追」
「你唔怕佢會有咩事咩?」
「可以有咩事?成程都唔見佢有暈過船」
「但你唔知道,女仔話無事…」
「就係有事嘛!唔好追就一定要追嘛!我知,做戲咩…我追落去,佢又會誤會我緊張佢,到時又死纏爛打」
「佢唔好咩?」
「唔係…不過佢唔係我杯茶」
「咁你杯茶係點架?」
「好喇好喇,係時候落船喇…」
.
我知道她是知道的…
.
「你地終於肯出黎喇咩?!!司徒駿,你真係唔追番我架喎!」
「小姐,我對你真係無感覺架…」
「感覺呢樣野可以慢慢培養既!你睇住,終有一日,我一定會令你鍾意我,我唔會放棄你既!」




.
原本,有人喜歡我是一件該值得慶祝的事,但是…
我愛的,是另有他人!
.
「你真係唔理佢?」
「我怕愈理佢,佢踩得愈深,我唔想hurt佢」
.
「寶貝女!」
「Daddy!」
原來世伯會來找方晴
.
「點呀寶貝女!有無暈船浪?」
「原本都有架,不過好彩有佢咋!」
「佢???」
「係呀Daddy,等我介紹你識,佢係司徒駿,我地班既班長;呀駿,呢個係我Daddy」




「Uncle你好」
「司徒同學呀,你想追我個女呀?」
「下?!!」
「Daddy呀!」
「我想問下你屋企住係邊?租定買?你爸爸做緊咩?一個月有幾多錢?」
「Daddy呀!」
「女呀,Daddy唔係想管你,但你知我地屋企喇,有好多人想黐我地家」
「世伯,其實我同方晴係同學咋,我都唔阻住你喇,走先」
「呀駿…」
「你都攰喇,早啲番去喇」
「咁我地星期一見喇…」
.
我終於明白,為何方晴會說她爸管得她很嚴,看來,又是一個把女兒當成搖錢樹的「好」爸爸。
.
Facebook:微言




Instagram:smallpotatosay
一至六每晚7點,重溫當年走過青蔥的歲月
Facebook, Instagram, 紙言, 高登共同發佈
已有 0 人追稿