[新手][校園] 當你中六果年先遇到教畜，最好嘅解決辦法就係‧‧‧‧‧‧: 16. 出師不利

經過既黑箱又不公開不透明嘅抽籤之後，我哋「正義聯盟」係被編入A組，同死教畜果隊仲有一隊Form 5同組。以嬴面嚟講，對中五果隊基本上就係新特蘭對曼聯(註︰係費sir果隊曼聯)咁，姐係好難嬴。至於對教畜果隊(下稱︰畜隊)，係冇得輸，就好似皇馬對巴塞，你踢斷美斯隻腳都唔可以比佢嬴一樣。
 
因為咁，我哋個「非常規訓練」變成每課3個鐘，每日個programme內容都唔同，不過都係射波、猜波同守門員訓練(姐係射9阿風)。
 
日日4點鐘放學，補習補到成8點，跟住仲要踢3個鐘波，對於我哋班文弱書生嚟講簡直係極限過極限運動。所以，我哋果8個鐘頭返學其實係瞓教。大個咗諗番，咁嘅時間安排真係痴膠線，但係你又會好佩服當年真係可以自律到咁先吹漲。
 
抽咗籤兩個星期後就已經要打第一場，係對班Form 5。我哋真心輕鬆因為預咗輸，所以有前冇後打死罷就，淨係放兩個人系後面，其他人全部攻上去。
 
上半場，對面因為阿風一下世界級巴夫斯式彈琵琶領先一球。之後，我哋盡力希望可以扳平，但係我哋兩個前鋒比利同小夫各有各踢，有波亂扭亂射，所以點都入唔到一粒。臨完半場前，因為對面一次反擊，單刀扭過阿風之後入埋空門，變成二比零。
 




「你哋班人係度踢乜春呀！」威廉忍左半場終於忍唔住發火。
「屌有啲人囉，係度亂扭亂射！」小夫都開始單單打打。
「唔通傳俾你呀，有幾多球黃金機會射咗去巴基斯坦。」比利即刻反駁。
「你自己又射失咗幾多呀吓廢托！」小夫好似想郁手。
「夠喇！」聽到佢兩個又係度嘈，威廉再喝多一聲。
「哎呀，內亂呀，咁下星期不如唔好踼喇，同隊垃圾踢盞整污糟隻腳，我之後仲要係出面踢聯賽。」個死教畜唔知係邊度死出嚟。
「收嗲喇！」喱吓簡直仲齊過大合唱。我哋十條友，再加埋嚟撐場嘅十幾個女同學，廿幾個人屌埋一條友。個場面都咪話唔震撼。
「我唔理你哋前世今世有啲咩恩怨情仇，總之你哋同我踢好佢。下半場文仔入黎替聰哥。」
 
雖然下半場成隊人個精神面貌都好咗，但係因為本身個形勢已經比人壓住，再加上啲大意犯錯，所以仲輸多兩粒。我哋只係靠比利一球勁靚嘅遠射攞返些少面子。第一場就咁俾人大炒1 : 4。