[新手][校園] 當你中六果年先遇到教畜，最好嘅解決辦法就係‧‧‧‧‧‧: 26. 2011最終章

Plan咗差唔多一星期嘅聖誕賤人報復大行動，就係因為果三隻嘢無段段M到發晒爛渣，所以就被迫腰斬咗。不過，最後果party咁搞法，都真係幾有「特色」嘅，都幾難忘呀玩到咁大。淨低果半個鐘基本上就係抽獎同埋自己圍內吹水。
「喂，你兩個到底之後果兩隻game玩落去會有咩surprise出嚟？」我好奇咁問力仔同威廉。
「踩波果個就冇咩特別嘅，純粹係比你哋趁機發洩，總之你哋點粗暴法，都唔會阻止。不過照情況嚟睇，如果玩喱個，應該班房都反轉。」頂，其實我最期待就係踩波果個，反而咁就冇咗。「仲有囉，狗公啲汽球會加咗料囉！」所謂嘅料只不過係水咁大把。
「至於智障恐龍*果個係純粹想佢哋出醜姐，你四個關節位夾飲管，個post已經夠滑稽。我仲安排埋啲咩扮狗叫呀，搵口咬啲嘢返嚟呀，呢啲咁嘅mission之嗎。至於女仔就叫佢哋騎住對方做mission啲囉。」威廉講返個plan出嚟之後，我都慶賀冇執行到喱個game，真係唔係人玩。
「咁至於大懲罰，頭先你哋係啲卡度見到晒喇！」講玩到盡，今次力仔同威廉真係幾到肉。
「嘩，你兩條友都幾激喎！」「不過，我相信冇人會估到根本成個Christmas party嘅結果一早比我哋控制咗。」我哋幾個都覺得喱次係玩得幾爽。
 

Christmas Party之後就係聖誕假，Form 6基本人假期有同冇係冇分別的，因為都係溫書、讀書同刨書。成個假期，我哋十條友日日約咁早去柴灣自修室「溫書」，因為考評局話有份Practice Paper，學校話當係Mock咁考多次，所以點都要準備一吓，有番啲作戰心態。可惜，十條友去自修室，你懂的！結果係，放低嘢就出去食一個鐘早餐，返嚟又補一補眠；十二點食lunch，返嚟又小睡片刻；四點半食下午茶，七點半食晚飯。Total八點坐到十點，有冇溫到四個鐘都成問題。
 





除夕果日，我哋決定比自己休息一日，成班人走出去玩，再去直落倒數。果日成個下奏就係十條友一齊屈係Neway度亂叫亂唱咗五、六個鐘。其實唱得多，真係開始唔知點解要比幾廿蚊唱K，明明自己係屋企都可以開youtube唱。不過冇所謂喇，成班癲佬搵地方hea，唔去Neway去維園咩。唱到十點零，我哋就埋單搭車去國金倒數。
我哋去到差唔多十一點幾，已經勁多人係碼頭個位。中學六年，今次已經係第三次嚟國金，係幾靚嘅個煙花，不過睇得多就覺得平平無奇。
「咁就到2012！」
「第三次喇，哈哈！」我已經係第三年同小夫一齊倒數。「果陣仲係中四，估唔到咁快就中學畢業。」
「下年grad咗之後10條友睇一齊睇，唔知會有咩感覺。」諗到下年大家可能各散東西都有啲sad。
「喂，就嚟夠鐘喇，你哋咪再係度感性喇！」威廉站亂歌柄個能力真係好強。
「10…9…8…7…6…5…4…3…2…1…PANG！」國金個外牆顯示咗2012四個數字。
「Happy New Year！」我哋十條友好無聊哋逐個逐個互相講。
「希望喱一年會平平安安咁渡過喇！」喱一刻，我突然有啲感概。




「希望喇！」威廉搭住我膊頭講。